桔井省三波县65名贫困学生获赠自行车及学习用品

ឯកឧត្តម ប្រាក់ ថាវអមិដា ដឹកនាំក្រុមការងារនាំយកកង់ និងសម្ភារសិក្សា ចែកជូនសិស្សមានជីវភាពខ្វះខាត ៦៥នាក់ នៅស្រុកសំបូរ ខេត្តក្រចេះ (AKP) នាព្រឹកថ្ងៃទី១៧ ខែមិថុនា ឆ្នាំ២០២៦ នៅសាលាបឋមសិក្សាសំបូរ ស្រុកសំបូរ ខេត្តក្រចេះ, ឯកឧត្តម ប្រាក់ ថាវអមិដា អនុរដ្ឋលេខាធិការ និងជានាយកខុទ្ទកាល័យក្រសួងព័ត៌មាន បានអញ្ជើញដឹកនាំក្រុមការងារ នាំយកកង់ចំនួន ៦៥គ្រឿង ព្រមទាំងមួកសុវត្ថិភាព កាតាប និងសម្ភារសិក្សា ចំនួន ៦៥ឈុត ចែកជូនដល់សិស្សានុសិស្សដែលមានជីវភាពខ្វះខាតចំនួន ៦៥នាក់ មកពី ៣ឃុំ រួមមាន ឃុំសណ្តាន់ ឃុំកោះខ្ញែរ និងឃុំសំបូរ ក្នុងស្រុកសំបូរ ខេត្តក្រចេះ។ កង់ មួកសុវត្ថិភាព កាតាប និងសម្ភារសិក្សាទាំងនេះ គឺជាអំណោយសប្បុរសធម៌របស់ឧកញ៉ា ទូច គីម និងលោកជំទាវ ឈួន ហ្លូរីណា ព្រមទាំងក្រុមគ្រួសារ ដែលបានផ្តល់ជូនតាមរយៈឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ។ អំណោយដ៏ថ្លៃថ្លានេះ នឹងរួមចំណែកជួយសម្រាលបន្ទុកគ្រួសារសិស្សានុសិស្សដែលកំពុងជួបប្រទះការលំបាក ជាពិសេសសិស្សដែលរស់នៅតំបន់ដាច់ស្រយាលក្នុងស្រុកសំបូរ។ កង់ទាំងនេះនឹងជួយកាត់បន្ថយពេលវេលាធ្វើដំណើរទៅមកសាលារៀន លើកទឹកចិត្តឱ្យសិស្សមករៀនបានទៀងទាត់ និងជួយបង្កើនឱកាសសិក្សារបស់កុមារ ដើម្បីឆ្ពោះទៅរកអនាគតកាន់តែល្អប្រសើរ។ ពិធីចែកអំណោយនេះ មានការអញ្ជើញចូលរួមពីក្រុមការងារក្រសួងព័ត៌មាន តំណាងមន្ទីរព័ត៌មានខេត្តក្រចេះ គណៈអភិបាលស្រុកសំបូរ តំណាងការិយាល័យអប់រំ យុវជន និងកីឡាស្រុកសំបូរ នាយកសាលា លោកគ្រូ អ្នកគ្រូ មាតាបិតា អាណាព្យាបាល ព្រមទាំងសិស្សានុសិស្សដែលទទួលបានអំណោយ។ ក្នុងឱកាសនោះ ឯកឧត្តម ប្រាក់ ថាវអមិដា ក្នុងនាមជាតំណាងដ៏ខ្ពង់ខ្ពស់របស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងអំណរគុណយ៉ាងជ្រាលជ្រៅចំពោះឧកញ៉ា ទូច គីម និងលោកជំទាវ ឈួន ហ្លូរីណា ព្រមទាំងក្រុមគ្រួសារ ដែលបានចូលរួមចំណែកក្នុងសកម្មភាពសប្បុរសធម៌ជាមួយក្រសួងព័ត៌មាន ដើម្បីគាំទ្រដល់ការសិក្សារបស់សិស្សានុសិស្សនៅតំបន់មូលដ្ឋាន។ ឯកឧត្តមក៏បានផ្តាំផ្ញើដល់ក្មួយៗជាសិស្សានុសិស្សទាំងអស់ ត្រូវខិតខំប្រឹងប្រែងសិក្សារៀនសូត្រ គោរពវិន័យសាលា ស្តាប់ដំបូន្មានលោកគ្រូ អ្នកគ្រូ និងមាតាបិតា ដើម្បីក្លាយខ្លួនជាកូនល្អ សិស្សល្អ និងពលរដ្ឋល្អសម្រាប់សង្គមជាតិ។ ជាមួយគ្នានេះ ឯកឧត្តមបានណែនាំឱ្យក្មួយៗយកចិត្តទុកដាក់ខ្ពស់ចំពោះសុវត្ថិភាពក្នុងការធ្វើដំណើរលើដងផ្លូវ ជាពិសេសត្រូវពាក់មួកសុវត្ថិភាព និងប្រើប្រាស់កង់ដោយប្រុងប្រយ័ត្នរាល់ពេលធ្វើដំណើរទៅមកសាលារៀន។ **——————** Connect with AKP: 🌐[Telegram ](https://t.me/TheAKP)🌐[Facebook ](https://www.facebook.com/akp.official/)🌐[Website ](http://akp.gov.kh/)👉[X](https://twitter.com/kampucheapresse) ([Twitter](https://twitter.com/kampucheapresse)) 🌐[Instagram](https://www.instagram.com/akp_news/) 🌐[TikTok](https://www.tiktok.com/@agencekampucheapresse) 🌐[YouTube](https://www.youtube.com/@agencekampucheapresse/featured) #CambodiaWantsPeace #JusticeForCambodia