金边太阳升医院成立十周年 举办国际科学研讨会

ពិធីបើក «សន្និសីទវិទ្យាសាស្ត្រអន្តរជាតិ និងខួប ១០ឆ្នាំ នៃការបង្កើតមន្ទីរពេទ្យជប៉ុនសាន់រ៉ាយស៍ ភ្នំពេញ»។ —— រាជធានីភ្នំពេញ៖ ថ្ងៃទី២៤ ខែតុលា ឯកឧត្តម វេជ្ជបណ្ឌិត ស៊ិក ប៊ុណ្ណា រដ្ឋលេខាធិការក្រសួងសុខាភិបាល និងឯកឧត្តម អ៊ិស៊ិហ្សូគី ហ៊ីដេអូ ឯកអគ្គរាជទូតជប៉ុនប្រចាំប្រទេសកម្ពុជា បានអញ្ជើញជាអធិបតីក្នុងពិធីបើក **«សន្និសីទវិទ្យាសាស្ត្រអន្តរជាតិ និងខួប ១០ឆ្នាំ នៃការបង្កើតមន្ទីរពេទ្យជប៉ុនសាន់រ៉ាយស៍ ភ្នំពេញ»** ដែលប្រារព្ធឡើងនៅសណ្ឋាគារ សុខា ភ្នំពេញ។ កម្មវិធីនេះប្រព្រឹត្តទៅក្រោមមូលបទ «ការរៀបចំប្រព័ន្ធថែទាំសុខភាពរួមបញ្ចូលគ្នា សម្រាប់អ្នកជំងឺមហារីកតាមគ្រប់ដំណាក់កាលនៃជីវិត៖ ការថែទាំដែលផ្តោតលើអ្នកជំងឺ ចាប់ពីការបង្ការជំងឺ រហូតដល់ការថែទាំសម្រន់»។ ការរៀបចំប្រព័ន្ធថែទាំសុខភាពនេះ គឺឆ្លើយតបយ៉ាងចំទិសដៅទៅនឹង យុទ្ធសាស្ត្របញ្ចាកោណ ដំណាក់កាលទី១ នៃរាជរដ្ឋាភិបាល នីតិកាលទី៧ ដែលបានកំណត់យក **«មនុស្ស»** ជាអាទិភាពគន្លឹះទី១ ក្នុងការកសាងមូលធនមនុស្សដែលមានសុខភាពល្អ និងសុខុមាលភាពខ្ពស់។ សន្និសីទនេះ ជាយន្តការទ្រទ្រង់ដោយផ្ទាល់ដល់ផែនការជាតិប្រយុទ្ធនឹងជំងឺមហារីក ឆ្នាំ២០២៥-២០៣០ និងផែនការយុទ្ធសាស្ត្រសុខាភិបាល ឆ្នាំ២០២៥-២០៣៤ ក្នុងការប្តូរទិសដៅពីការព្យាបាល ទៅការផ្តោតលើការបង្ការ និងការលើកកម្ពស់សុខភាព ដោយឈរលើគោលការណ៍៖ (១)គំនិតយុទ្ធសាស្ត្រ​ (២)ស្ថាប័នមានទ្រព្យកោសល្យសមស្របនិងការអភិវឌ្ឍធនធានមនុស្ស (៣)ហិរញ្ញវត្ថុសុខាភិបាលចីរភាព និងសមធម៌ (៤)សេវាថែទាំសុខភាពមានប្រសិទ្ធភាព និងស័ក្តិសិទ្ធិភាព និង (៥)អនុលោមភាពនិយ័តកម្ម និងគោល     នយោបាយ។ ក្រសួងសុខាភិបាល ប្តេជ្ញាចិត្តយ៉ាងមុតមាំក្នុងការសម្រេចឱ្យបាននូវ ការគ្របដណ្តប់សុខភាពជាសកល (UHC) ដើម្បីធានាថាប្រជាពលរដ្ឋកម្ពុជាគ្រប់រូប ទទួលបានសេវាថែទាំសុខភាព ប្រកបដោយគុណភាព សុវត្ថិភាព និងតម្លៃសមរម្យ ដោយមិនប្រឈមនឹងហានិភ័យហិរញ្ញវត្ថុ។ ឯកឧត្តមរដ្ឋលេខាធិការក៏បានផ្តល់អនុសាសន៍គន្លឹះ ដើម្បីពង្រឹងការថែទាំអ្នកជំងឺផងដែរ រួមមាន៖ 1-ពង្រឹងប្រព័ន្ធបញ្ជូនអ្នកជំងឺរវាងមូលដ្ឋានថែទាំសុខភាពបឋម មន្ទីរពេទ្យរដ្ឋ និងឯកជន ឱ្យមានភាពរលូន និងទាន់ពេលវេលា។ 2-ជំរុញការបណ្តុះបណ្តាលធនធានមនុស្សផ្នែកឯកទេសជំងឺមហារីក និងការថែទាំសម្រន់។ 3-អភិវឌ្ឍប្រព័ន្ធទិន្នន័យ និងការចុះបញ្ជីជំងឺមហារីកថ្នាក់ជាតិ (National Cancer Registry) ឱ្យបានត្រឹមត្រូវ។ 4-ពង្រីកសេវាថែទាំសម្រន់ (Palliative Care) ដល់កម្រិតសហគមន៍ និងតាមផ្ទះ ដើម្បីជួយសម្រាលការឈឺចាប់ដល់អ្នកជំងឺដំណាក់កាលចុងក្រោយ។ សន្និសីទនេះមានការចូលរួមពី វេជ្ជបណ្ឌិត គិលានុបដ្ឋាក សិស្ស និស្សិត និងភ្ញៀវជាតិ អន្តរជាតិប្រមាណ ៥០០នាក់។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)