柬埔寨基层行政预算科普 每乡镇年均获20万美元

សួស្ដីបងប្អូនទាំងអស់គ្នា! ថ្ងៃនេះ ខ្ញុំបាទ ប៊ុន ធឿន ហៅ ខ្លាពីរ សូមលើកយកចំណុចសំខាន់មួយមកបង្ហាញ ដើម្បីឱ្យបងប្អូនប្រជាពលរដ្ឋបានយល់ដឹងកាន់តែច្បាស់ អំពី ការបែងចែក និងការប្រើប្រាស់ថវិការដ្ឋបាលឃុំ-សង្កាត់ នៅទូទាំងប្រទេស។ ជាទូទៅ រដ្ឋបាលឃុំ-សង្កាត់ទទួលបានកញ្ចប់ថវិកាផ្ទេរពីថ្នាក់ជាតិ ជាមធ្យមប្រមាណ ៨១៥ លានរៀល ឬប្រហែល ២០ ម៉ឺនដុល្លារអាមេរិកក្នុងមួយឃុំ-សង្កាត់ សម្រាប់រយៈពេលមួយឆ្នាំ។ កញ្ចប់ថវិកាមូលនិធិឃុំ-សង្កាត់នេះ ត្រូវបានបែងចែក និងប្រើប្រាស់លើមុខសញ្ញាសំខាន់ៗចំនួន ២ រួមមាន៖ ១. ចំណាយអភិវឌ្ឍន៍ មានប្រមាណជាង ១០ ម៉ឺនដុល្លារ សម្រាប់ការអភិវឌ្ឍហេដ្ឋារចនាសម្ព័ន្ធ និងសេវាសង្គមនៅមូលដ្ឋាន ដូចជា ការសាងសង់ និងជួសជុលផ្លូវលំ ផ្លូវបេតុង ប្រឡាយ លូ ស្ពាន និងសកម្មភាពអភិវឌ្ឍន៍ផ្សេងៗដែលបម្រើផលប្រយោជន៍ប្រជាពលរដ្ឋ។ ២. ចំណាយរដ្ឋបាល មានប្រមាណជិត ១០ ម៉ឺនដុល្លារ សម្រាប់ចំណាយពាក់ព័ន្ធនឹងការបើកប្រាក់បៀវត្ស និងអត្ថប្រយោជន៍ផ្សេងៗជូនក្រុមប្រឹក្សាឃុំ-សង្កាត់ ស្មៀន មេភូមិ អនុប្រធានភូមិ ព្រមទាំងចំណាយប្រតិបត្តិការរដ្ឋបាល និងការិយាល័យប្រចាំថ្ងៃ។ ដូច្នេះ បងប្អូនប្រជាពលរដ្ឋគួរយល់ដឹងថា ថវិកាឃុំ-សង្កាត់មិនមែនសុទ្ធតែជាថវិកាសម្រាប់សាងសង់ផ្លូវ ឬហេដ្ឋារចនាសម្ព័ន្ធទាំងអស់នោះទេ ព្រោះថវិកាមួយផ្នែកត្រូវបានប្រើប្រាស់សម្រាប់ការងាររដ្ឋបាល និងប្រតិបត្តិការរបស់មូលដ្ឋានផងដែរ។ សម្រាប់ខ្ញុំបាទ ការលើកយកព័ត៌មាននេះមកបង្ហាញ គឺដើម្បីឱ្យបងប្អូនបាន យល់ដឹង សួរដេញដោល និងចូលរួមតាមដានការប្រើប្រាស់ថវិកាសាធារណៈ ឱ្យបានត្រឹមត្រូវ និងមានប្រសិទ្ធភាព ដើម្បីជាប្រយោជន៍ដល់ប្រជាពលរដ្ឋនៅមូលដ្ឋាន។ ពីខ្ញុំប៊ុន ធឿន ហៅ ខ្លាពីរ — សូមអរគុណបងប្អូនទាំងអស់គ្នា!