柬埔寨农产品进入国际主流超市 品牌化成效显著

កម្ពុជាកំពុងពង្រីកវត្តមានផលិតផលកសិផល និងកសិ-កែច្នៃលើទីផ្សារអន្តរជាតិ តាមរយៈការជំរុញការកែច្នៃក្នុងស្រុក ពង្រឹងគុណភាព និងស្តង់ដា ព្រមទាំងពង្រីកទីផ្សារ ក្រោមយុទ្ធនាការ «Made in Cambodia» របស់ក្រសួងពាណិជ្ជកម្ម ស្របតាមទិសដៅរបស់រាជរដ្ឋាភិបាល។ ផលិតផលស្រូវ-អង្ករ ស្វាយកែច្នៃ និងគ្រាប់ស្វាយចន្ទីកម្ពុជា បានបោះជំហានចូលទីផ្សារសំខាន់ៗ ដោយមានវត្តមាននៅលើធ្នើផ្សារទំនើបល្បីៗដូចជា COSTCO, E.Leclerc, Carrefour, Cold Storage, AEON និង DFI Retail Group ព្រមទាំងទីផ្សារសហរដ្ឋអាមេរិក បារាំង អាល្លឺម៉ង់ ជប៉ុន សិង្ហបុរី និងព្រីតថេន (UK)។ ក្នុងនោះ អង្ករកម្ពុជាត្រូវបានដាក់លក់តាមបណ្តាញផ្សារទំនើបអន្តរជាតិ ខណៈផលិតផលស្វាយកែច្នៃរបស់ក្រុមហ៊ុន KFP បានឈានដល់ការចែកចាយក្រោមម៉ាក Kirkland Signature របស់ COSTCO។ ផលិតផលស្វាយរបស់ Misota ក៏បានពង្រីកទីផ្សារទៅជប៉ុន អាមេរិក អង់គ្លេស និងសហភាពអឺរ៉ុប។ ជាមួយគ្នានេះ គ្រាប់ស្វាយចន្ទីកែច្នៃកម្ពុជាក៏បានចូលទីផ្សារអឺរ៉ុប និងជប៉ុន ដោយមានការចែកចាយតាមបណ្តាញ FamilyMart ប្រមាណ ១៦,០០០សាខាទូទាំងប្រទេសជប៉ុន។ ក្រៅពីនេះ ម្រេចកំពត ផ្កាអំបិលកំពត-កែប ស្ករត្នោតកំពង់ស្ពឺ គ្រឿងទេស ទឹកជ្រលក់ និងផលិតផលជលផលកែច្នៃ ក៏កំពុងពង្រីកការនាំចេញទៅកាន់ទីផ្សារអាមេរិក អឺរ៉ុប អូស្ត្រាលី និងជប៉ុន។ សមិទ្ធផលទាំងនេះឆ្លុះបញ្ចាំងពីការរួមគ្នារវាងរាជរដ្ឋាភិបាល និងវិស័យឯកជន ក្នុងការបង្កើនតម្លៃបន្ថែមដល់កសិផល ពង្រឹងសមត្ថភាពប្រកួតប្រជែង និងប្រែក្លាយ «Product of Cambodia» ឱ្យកាន់តែមានការទទួលស្គាល់ និងទំនុកចិត្តនៅលើទីផ្សារអន្តរជាតិ។ [**Join AMS One-minute**](https://t.me/ams1minute)