卫生部在桔井省举办第九届医疗专业发展日

គុណវុឌ្ឍិ សមត្ថភាព និងសម្បទាវិជ្ជាជីវៈ គឺជាគ្រឹះនៃការកសាងគ្រូពេទ្យ ប្រកបដោយគុណភាព និងសេចក្តីថ្លៃថ្នូរ។ —— ខេត្តក្រចេះ ថ្ងៃទី១៦ ខែតុលា ឆ្នាំ២០២៦ ឯកឧត្តមសាស្ត្រាចារ្យ ឡឹម តារា រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាគណៈគ្រូពេទ្យជាតិ បាន អញ្ជើញជាអធិបតី ក្នុងពិធីបើកទិវាអភិវឌ្ឍវិជ្ជាជីវៈវេជ្ជសាស្ត្របន្ត (CPD) លើកទី៩ របស់ក្រុមប្រឹក្សាគណៈគ្រូពេទ្យខេត្តក្រចេះ។ ឯកឧត្តមសាស្រ្តាចារ្យ បានគូសបញ្ជាក់អំពីសារៈសំខាន់ នៃការបន្តអភិវឌ្ឍចំណេះដឹង និងជំនាញវិជ្ជាជីវៈ ការប្រកាន់ខ្ជាប់នូវក្រមសីលធម៌ និងការពង្រឹងសមត្ថភាពអនុវត្តជាក់ស្តែងរបស់គ្រូពេទ្យ ដើម្បីលើកកម្ពស់គុណភាពវិជ្ជាជីវៈវេជ្ជសាស្ត្រនៅកម្ពុជា។ ឯកឧត្តមបានបន្ថែមថា ការសិក្សារបស់គ្រូពេទ្យមិនបញ្ចប់ត្រឹមការទទួលបានសញ្ញាបត្រនោះទេ ប៉ុន្តែត្រូវបន្តពេញមួយជីវិត ដើម្បីឆ្លើយតប ទៅនឹងការរីកចម្រើនឥតឈប់ឈរនៃវិទ្យាសាស្ត្រ និងបច្ចេកវិទ្យាវេជ្ជសាស្ត្រ។ ដូច្នេះ ការបន្តអភិវឌ្ឍវិជ្ជាជីវៈ ឬ CPD មិនមែនគ្រាន់តែជាការចូលរួមបណ្តុះបណ្តាលដើម្បីបំពេញលក្ខខណ្ឌវិជ្ជាជីវៈប៉ុណ្ណោះទេ ប៉ុន្តែជាកាតព្វកិច្ចវិជ្ជាជីវៈ និងជាការទទួលខុសត្រូវរបស់គ្រូពេទ្យចំពោះអ្នកជំងឺ។ ក្នុងន័យនេះ ឯកឧត្តមសាស្រ្តាចារ្យបានសង្កត់ធ្ងន់ថា គ្រូពេទ្យដែលមានគុណភាពត្រូវមានធាតុផ្សំសំខាន់បី៖ -គុណវុឌ្ឍិ៖ មានសញ្ញាបត្រនៃការអប់រំ និងការបណ្តុះបណ្តាលត្រឹមត្រូវ ព្រមទាំងបំពេញលក្ខខណ្ឌប្រកបវិជ្ជាជីវៈស្របតាមច្បាប់ និងបទប្បញ្ញត្តិជាធរមាន។ -សមត្ថភាព៖ មានចំណេះដឹង ជំនាញគ្លីនិក និងសមត្ថភាពអនុវត្តជាក់ស្តែង (រួមទាំងការប្រាស្រ័យទាក់ទង) ក្នុងការពិនិត្យ វិនិច្ឆ័យ ព្យាបាល និងថែទាំអ្នកជំងឺប្រកបដោយប្រសិទ្ធភាព និងសុវត្ថិភាព។ -សម្បទាវិជ្ជាជីវៈ៖ មានសុចរិតភាព សេចក្តីស្មោះត្រង់ មេត្តាករុណា ការគោរពសិទ្ធិអ្នកជំងឺ ការរក្សាការសម្ងាត់ និងការទទួលខុសត្រូវខ្ពស់ចំពោះការអនុវត្តវិជ្ជាជីវៈ។ ជាមួយគ្នានេះ ឯកឧត្តមសាស្រ្តាចារ្យ បានអំពាវនាវដល់គ្រូពេទ្យគ្រប់រូប ឱ្យគោរពច្បាប់ បទដ្ឋានគតិយុត្ត ក្រមសីលធម៌ និងវិន័យការងារឱ្យបានខ្ជាប់ខ្ជួន ព្រមទាំងប្រកបវិជ្ជាជីវៈក្នុងដែនកំណត់ ស្របតាមសមត្ថរបស់ខ្លួន។ គ្រូពេទ្យត្រូវមានភាពស្មោះត្រង់ក្នុងការអនុវត្តការងារ ចេះពិគ្រោះយោបល់ជាមួយសហការី និងបញ្ជូនអ្នកជំងឺទៅកាន់អ្នកជំនាញសមស្រប នៅពេលចាំបាច់ឬលើសពីសមត្ថភាពដែលខ្លួនមាន ដោយតម្កល់ផលប្រយោជន៍ និងសុវត្ថិភាពអ្នកជំងឺជាអាទិភាព។ ឯកឧត្តមសាស្រ្តាចារ្យ ក៏បានគូសបញ្ជាក់ពីតួនាទីរបស់ក្រុមប្រឹក្សាគណៈគ្រូពេទ្យជាតិ និងក្រុមប្រឹក្សាគណៈគ្រូពេទ្យរាជធានី ខេត្ត ក្នុងការជំរុញការបន្តអភិវឌ្ឍវិជ្ជាជីវៈ ពង្រឹងស្តង់ដារប្រកបវិជ្ជាជីវៈ លើកកម្ពស់ការអនុវត្តក្រមសីលធម៌ និងជំរុញការចែករំលែកចំណេះដឹង និងបទពិសោធន៍រវាងគ្រូពេទ្យជំនាន់មុន និងគ្រូពេទ្យជំនាន់ក្រោយ។ «គ្រូពេទ្យល្អ មិនមែនគ្រាន់តែជាអ្នកដែលមានសញ្ញាបត្រខ្ពស់នោះទេ ប៉ុន្តែជាអ្នកដែលមានគុណវុឌ្ឍិត្រឹមត្រូវ សមត្ថភាពអនុវត្តច្បាស់លាស់ សម្បទាវិជ្ជាជីវៈល្អ និងមានបេះដូងដែលតែងតែគិតដល់សុខទុក្ខអ្នកជំងឺជាចម្បង»។ ទិវា CPD របស់ក្រុមប្រឹក្សាគណៈគ្រូពេទ្យខេត្តក្រចេះ មានការរអញ្ជើញចូលរួមពីលោកវេជ្ជបណ្ឌិត អី ប៊ុនឡែន ប្រធានក្រុមប្រឹក្សាគណគ្រូពេទ្យខេត្ត និងជាប្រធានមន្ទីរសុខាភិបាលខេត្តក្រចេះ ព្រមទាំងមានអ្នកចូលរួមផ្ទាល់ ៩៨នាក់ និងតាមប្រពន្ទ័ ZOOM ១១៥៩នាក់។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)