皇家金边大学完成外部质量评估 ACC认证团现场核验

**"បញ្ចប់ការវាយតម្លៃ បន្តដំណើរលើកកម្ពស់គុណភាពអប់រំ"** នាថ្ងៃទី១ ខែវិច្ឆិកា ឆ្នាំ២០២៦ សាកលវិទ្យាល័យភូមិន្ទភ្នំពេញ បានបញ្ចប់ដោយជោគជ័យនូវការចុះវាយតម្លៃខាងក្រៅ ដើម្បីទទួលស្គាល់គុណភាពអប់រំកម្រិតគ្រឹះស្ថាន។ ពិធីបិទបានប្រព្រឹត្តទៅនៅមជ្ឈមណ្ឌលសហប្រតិបត្តិការកម្ពុជា–កូរ៉េ (CKCC) ក្រោមអធិបតីភាពលោកសាកលវិទ្យាធិការរង ប៉ាល ដែស តំណាងឯកឧត្តមសាស្ត្រាចារ្យ ជេត ជាលី សាកលវិទ្យាធិការ។ កម្មវិធីនេះមានការចូលរួមពីគណៈប្រតិភូនៃគណៈកម្មាធិការទទួលស្គាល់គុណភាពអប់រំនៃកម្ពុជា (ACC) ដឹកនាំដោយឯកឧត្តមបណ្ឌិត រ័ត្ន ឆាង អគ្គលេខាធិការ ព្រមទាំងមានការអញ្ជើញចូលរួមយ៉ាងច្រើនកុះករពីថ្នាក់ដឹកនាំគ្រប់លំដាប់ថ្នាក់នៃគ្រប់អង្គភាព លោកគ្រូ អ្នកគ្រូ បុគ្គលិក និងភាគីពាក់ព័ន្ធរបស់សាកលវិទ្យាល័យភូមិន្ទភ្នំពេញ។ នៅក្នុងពិធីបិទ គណៈប្រតិភូ ACC បានចែករំលែកមតិយោបល់បឋម ទាំងចំណុចខ្លាំងជាច្រើន និងសំណូមពរ ព្រមទាំងចំណុចដែលត្រូវបន្តពង្រឹងចំនួន ២០។ សាកលវិទ្យាល័យបានទទួលយកមតិទាំងនេះដោយស្មារតីបើកចំហ ហើយនឹងប្រើប្រាស់ជាមូលដ្ឋានក្នុងការរៀបចំផែនការកែលម្អជាក់ស្ដែងបន្ថែម ដើម្បីបន្តពង្រឹងគុណភាពស្ថាប័ន និងលើកកម្ពស់លទ្ធផលសិក្សារបស់និស្សិត។ សាកលវិទ្យាល័យក៏បានថ្លែងអំណរគុណយ៉ាងជ្រាលជ្រៅចំពោះគណៈប្រតិភូ ACC សម្រាប់ការវាយតម្លៃប្រកបដោយវិជ្ជាជីវៈ និងមតិយោបល់ដ៏មានតម្លៃ ព្រមទាំងកោតសរសើរចំពោះការចូលរួមយ៉ាងផុលផុស និងសកម្មពីថ្នាក់ដឹកនាំ លោកគ្រូ អ្នកគ្រូ បុគ្គលិក និងភាគីពាក់ព័ន្ធទាំងអស់ ដែលធ្វើឱ្យដំណើរការនេះប្រព្រឹត្តទៅប្រកបដោយប្រសិទ្ធភាព និងប្រសិទ្ធផល។ ការវាយតម្លៃអាចមានថ្ងៃបញ្ចប់ ប៉ុន្តែការលើកកម្ពស់គុណភាពអប់រំ គឺជាការប្ដេជ្ញាចិត្តជានិរន្តរ៍របស់យើងទាំងអស់គ្នា៕ #RUPP #ACC #Accreditation #QualityAssurance #ContinuousImprovement #HigherEducation