磅清扬市发生严重车祸 摩托车被撞致1死1伤 肇事车逃逸

រថយន្តបុកម៉ូតូក្នុងផ្លូវខ្វែងទិសក្នុងក្រុងកំពង់ឆ្នាំងបង្កឲ្យយុវជនម្នាក់បានស្លាប់និងម្នាក់រករបួសធ្ងន់ ខេត្តកំពង់ឆ្នាំង គ្រោះថ្នាក់ចរាចរណ៍មួយបណ្ដាលឱ្យមនុស្សម្នាក់បានស្លាប់នៅនឹងកន្លែង និងម្នាក់ទៀតបានរងរបួសជាទម្ងន់ បានកើតឡើង នៅវេលាម៉ោង៦និង៣០នាទី យប់ ថ្ងៃទី ៤ ខែមិថុនា ឆ្នាំ ២០២៦ នៅផ្លូវជាតិលេខ ៥ ចន្លោះគីឡូម៉ែត្រលេខ ៩០ និងលេខ ៩១ ចំណុចផ្លូវខ្វែងទិស ទល់មុខផ្ទះសំណាក់ផ្កាយព្រឹក ស្ថិតនៅក្នុងភូមិឡទឹកត្រី សង្កាត់កំពង់ឆ្នាំង ក្រុងកំពង់ឆ្នាំង។ យោងតាមរបាយការណ៍បឋមរបស់សមត្ថកិច្ចនគរបាលនៅកន្លែងកើតហេតុបានឲ្យដឹងថា មុនពេលកើតហេតុមានម៉ូតូមួយគ្រឿងម៉ាកនិច ពណ៌ប្រផេះ  ពាក់ស្លាកលេខ កំពង់ឆ្នាំង 1M.6675 បើកបរដោយយុវជន ឈ្មោះ អ៊ុល រក្សា អាយុ ១៥ ឆ្នាំ មានទីលំនៅ ភូមិព្រៃខ្មែរ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង មានដឹកយុវជនម្នាក់ទៀតពីក្រោយឈ្មោះ មឿន រក្សា (ឈ្មោះរក្សាដូចគ្នា) អាយុ ១៤ឆ្នាំ មានទីលំនៅភូមិព្រៃខ្មែរដូចគ្នា ។បានធ្វើដំណើរពីវិមានឯករាជ្យសំដៅទៅទួលក្រឡាញ់ ក្នុងដំណើរពីជើងទៅត្បូង លុះ មកដល់ចំណុចកើតហេតុក៏ស្រាប់តែមានរថយន្តមួយគ្រឿងទៀតមិនស្គាល់ម៉ាកបាន ធ្វើដំណើរឆ្លងផ្លូវពីទិសខាងកើតទៅលិច បានបុកម៉ូតូជនរងគ្រោះពេញទំហឹង បណ្ដាលឲ្យជនរងគ្រោះ ឈ្មោះអ៊ុល រក្សា បានស្លាប់នៅនឹងកន្លែង ចំណែកយុវជនម្នាក់ទៀតជិះពីក្រោយបានរងរបួសធ្ងន់ ហើយត្រូវបានដឹកទៅសង្គ្រោះនៅមន្ទីរពេទ្យបង្អែកខេត្តកំពង់ឆ្នាំង។ ដោយឡែក រថយន្តបង្ករបានរត់គេចខ្លួនបាត់ស្រមោល ដែលពេលនេះសមត្ថកិច្ចកំពុងតែស្រាវជ្រាវរកអត្តសញ្ញាណរថយន្តនិងអ្នកបើកបរ។ ក្រោយពិនិត្យធ្វើការរបស់វែងសមត្ថកិច្ចនគរបាលបានប្រគល់សពយុវជនរងគ្រោះទៅក្រុមគ្រួសារធ្វើបុណ្យតាមប្រពៃណីចំណែកម៉ូតូត្រូវបានយកទៅរក្សាទុកដើម្បីបន្តនីតិវិធី។ សូមរំលឹកថាជារឿយៗចំណុចផ្លូវបំបែកខ្វែងទិស មុខផ្ទះសំណាក់ផ្កាយព្រឹក ចំណុចផ្លូវបែកជា៤ ជាប់របងវិទ្យាល័យព្រះបាទសុរាម្រិត គឺ តែងមានករណីគ្រោះថ្នាក់ចរាចរណ៍ជាញឹកញាប់ហើយកើតឡើងម្ដងៗធ្ងន់ធ្ងររហូតមានបាត់បង់ជីវិតមនុស្សទៀតផង ។ប្រជាពលរដ្ឋសំណូមពរថា រាល់ផ្លូវ បំបែកខ្វែង ទិសក្នុងក្រុងកំពង់ឆ្នាំង ទាំងផ្លូវវាងក្រុង ទាំងផ្លូវក្នុងក្រុង ទាំងអស់គួរតែមានភ្លើងសញ្ញាចរាចរណ៍ (ភ្លើងស្តុប)។