澜湄合作经贸对接会在昆明举办 聚焦跨境物流与投资

ព្រឹត្តការណ៍ផ្គូផ្គងធុរកិច្ច និងវិនិយោគក្នុងក្របខណ្ឌនៃកិច្ចសហប្រតិបត្តិការមេគង្គ-ឡានឆាង ស្តីពី “ការធ្វើឱ្យប្រសើរឡើងនូវសេវាកម្មទាក់ទងនឹងកិច្ចសម្រួលពាណិជ្ជកម្ម និងវិនិយោគរួមចំណែកដល់ការជំរុញកិច្ចសហប្រតិបត្តិការសេដ្ឋកិច្ចឆ្លងកាត់ព្រំដែន”។ ក្រុងគុនមីង ខេត្តយូណាន ប្រទេសចិន៖ នាព្រឹកថ្ងៃទី១៦ ខែមិថុនា ឆ្នាំ២០២៦ ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា បានអញ្ជើញចូលរួមជាអធិបតី ក្នុងព្រឹត្តការណ៍ផ្គូផ្គងធុរកិច្ច និងវិនិយោគក្នុងក្របខណ្ឌនៃកិច្ចសហប្រតិបត្តិការមេគង្គ-ឡានឆាង ស្តីពី “ការធ្វើឱ្យប្រសើរឡើងនូវសេវាកម្មទាក់ទងនឹងកិច្ចសម្រួលពាណិជ្ជកម្ម និងវិនិយោគរួមចំណែកដល់ការជំរុញកិច្ចសហប្រតិបត្តិការសេដ្ឋកិច្ចឆ្លងកាត់ព្រំដែន”។ កម្មវិធីនេះ មានការអញ្ជើញចូលរួមពីសំណាក់ លោក MA JUN អគ្គនាយករងនៃមន្ទីរពាណិជ្ជកម្មខេត្តយូណាន, តំណាងក្រសួង ស្ថាប័នពាក់ព័ន្ធក្នុងវិស័យវិនិយោគ ពាណិជ្ជកម្ម សាធារណការ និងដឹកជញ្ជូនកម្ពុជា, គណៈប្រតិភូតំណាងបណ្តាប្រទេសមេគង្គ-ឡានឆាងចំនួន ៥ ផ្សេងទៀត រួមមាន ចិន ឡាវ ថៃ វៀតណាម និងមីយ៉ាន់ម៉ា ព្រមទាំងវិនិយោគិន និងធុរជនក្នុងវិស័យពាក់ព័ន្ធសំខាន់ៗសរុបប្រមាណ ៣០០ នាក់។ កម្មវិធីនេះត្រូវបានរៀបចំឡើងក្នុងគោលបំណងចម្បងៗចំនួន ០៣ រួមមាន៖ (១) លើកកម្ពស់ និងផ្សព្វផ្សាយអំពីកាលានុវត្តភាពវិនិយោគនៃបណ្តាប្រទេសមេគង្គ-ឡានឆាង (២) ផ្គូផ្គងដៃគូធុរកិច្ច (Business Matchmaking) និង (៣) បង្កើតវេទិកាសម្រាប់ផ្លាស់ប្តូរមតិយោបល់ទៅវិញទៅមកក្នុងក្របខណ្ឌគោលនយោបាយ ព្រមទាំងកិច្ចសម្រួលនានាក្នុងវិស័យវិនិយោគ ដឹកជញ្ជូន និងភស្តុភារកម្ម ក៏ដូចជាការតភ្ជាប់ទីផ្សារតំបន់ និងសកលផងដែរ។ ស្ថិតក្នុងកម្មវិធីដ៏ឱឡារិកនេះ តំណាងក្រសួង ស្ថាប័នទទួលបន្ទុកវិស័យវិនិយោគ ពាណិជ្ជកម្ម ដឹកជញ្ជូន និងភស្តុភារកម្ម នៃបណ្តាប្រទេសមេគង្គ-ឡានឆាង បានធ្វើបទបង្ហាញ ក្រោមប្រធានបទសំខាន់ៗ ចំនួន ៣ រួមមាន៖ (១) កាលានុវត្តភាពវិនិយោគ និងក្របខណ្ឌនៃកិច្ចសម្រួលនានា (២) ការតភ្ជាប់ទីផ្សារ និងការជំរុញពាណិជ្ជកម្មឆ្លងកាត់ព្រំដែន (៣) ការអភិវឌ្ឍហេដ្ឋារចនាសម្ព័ន្ធរូបវ័ន្ត និងបណ្តាញភស្តុភារកម្មផងដែរ។ ថ្លែងក្នុងព្រឹត្តិការណ៍ខាងលើ ឯកឧត្តមអគ្គលេខាធិការរង បានសម្តែងការស្វាគមន៍ និងវាយតម្លៃខ្ពស់ចំពោះកិច្ចសហការក្នុងការរៀបចំព្រឹត្តការណ៍ដ៏មានសារៈសំខាន់នេះ និងថ្លែងអំណរគុណយ៉ាងជ្រាលជ្រៅបំផុតចំពោះរដ្ឋាភិបាលនៃសាធារណរដ្ឋប្រជាមានិតចិន បណ្តាប្រទេសមេគង្គ-ឡានឆាង និងគ្រប់ភាគីពាក់ព័ន្ធទាំងអស់ ដែលកន្លងមកបានផ្តល់នូវការគាំទ្រក៏ដូចជាកិច្ចសហប្រតិបត្តិការយ៉ាងស្អិតល្មួត ក្នុងការជំរុញការអនុវត្តគម្រោងកិច្ចសហប្រតិបត្តិការមេគង្គ-ឡានឆាង ដ៏មានសារៈសំខាន់នេះ ឱ្យទទួលបានជោគជ័យជាផ្លែផ្កាយ៉ាងត្រចះត្រចង់ស្របតាមការរំពឹងទុកផងដែរ។ 🌐 Follow Us 🧭  [Website (CIB](https://cib-cdc.gov.kh/en)) | 👨‍💻 [Facebook](https://www.facebook.com/cib.cdc.cambodia/)| 💳 [Telegram](https://t.me/cib_cdc_cambodia)