柬埔寨获选为第19届法语电影节荣誉国

ឯកអគ្គរាជទូតកម្ពុជាប្រចាំប្រទេសបារាំង៖ កម្ពុជាត្រូវបានជ្រើសរើសជាប្រទេសកិត្តិយស សម្រាប់មហោស្រពភាពយន្តនិយាយភាសាបារាំង លើកទី១៩ ថ្ងៃទី២៤ ដល់ថ្ងៃទី២៩ ខែសីហា ឆ្នាំ២០២៦ (AKP) ស្ថានទូតព្រះរាជាណាចក្រកម្ពុជាប្រចាំសាធារណរដ្ឋបារាំង បានសហការជាមួយក្រុមការងារមហោស្រព រៀបចំសន្និសីទសារព័ត៌មាននៅនិវេសនដ្ឋាន Charles Floquet ដើម្បីបង្ហាញអំពីព្រឹត្តិការណ៍ដ៏ពិសេសនេះ និងលើកតម្កើងវិស័យភាពយន្តកម្ពុជា ខណៈដែលពិធីនេះ ប្រព្រឹតិ្តទៅនៅថ្ងៃទី៩ ខែកក្កដា ឆ្នាំ២០២៦។ ក្នុងឱកាសនោះ ឯកឧត្តម លុយ ដាវីត ឯកអគ្គរាជទូតកម្ពុជា ប្រចាំសាធារណរដ្ឋបារាំង បានឱ្យដឹងថា ព្រះរាជាណាចក្រកម្ពុជាត្រូវបានជ្រើសរើសជាប្រទេសកិត្តិយស សម្រាប់មហោស្រពភាពយន្តនិយាយភាសាបារាំង លើកទី១៩ ថ្ងៃទី២៤ ដល់ថ្ងៃទី២៩ ខែសីហា ឆ្នាំ២០២៦ នៅទីក្រុង Angoulême ប្រទេសបារាំង។ ឯកឧត្តម លុយ ដាវីត មានប្រសាសន៍ថា៖ "យើងមានក្តីរំភើប និងមោទនភាពយ៉ាងជ្រាលជ្រៅ ចំពោះការដែលកម្ពុជាទទួលបានកិត្តិយសដ៏ឧត្តុង្គឧត្តមនេះ។ ការទទួលស្គាល់នេះមានអត្ថន័យយ៉ាងជ្រាលជ្រៅ ស្របពេលដែលព្រះរាជាណាចក្រកម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអង្គការហ្វ្រង់កូហ្វូនី លើកទី២០ ដែលនឹងប្រព្រឹត្តទៅនៅរាជធានីភ្នំពេញ នាថ្ងៃទី១៥ និងទី១៦ ខែវិច្ឆិកា ឆ្នាំ២០២៦"។ ឯកឧត្តម បានបន្ថែមថា នេះជាសក្ខីភាពបញ្ជាក់អំពីទំនាក់ទំនងជាប្រវត្តិសាស្ត្ររវាងកម្ពុជា និងសហគមន៍ហ្វ្រង់កូហ្វូនី ព្រមទាំងតួនាទីដ៏សំខាន់របស់វប្បធម៌ ជាពិសេស វិស័យភាពយន្ត ក្នុងការលើកកម្ពស់កិច្ចសន្ទនារវាងប្រជាជន និងប្រជាជន។ ការជ្រើសរើសកម្ពុជាជាប្រទេសកិត្តិយស ជាឱកាសមួយដើម្បីឧទ្ទិសចំពោះព្រះករុណា ព្រះបរមរតនកោដ្ឋ នរោត្តម សីហនុ ដែលជាបិតាស្ថាបនិកមួយរូបនៃចលនាហ្វ្រង់កូហ្វូនី និងជាឥស្សរជនដ៏សំខាន់ក្នុងវិស័យភាពយន្តកម្ពុជា។ ព្រះអង្គជាអ្នកនិពន្ធ អ្នកដឹកនាំរឿង ផលិតករ និងតារាសម្តែង ហើយទ្រង់បានចាត់ទុកភាពយន្តជាមធ្យោបាយដ៏មានឥទ្ធិពលក្នុងការផ្សព្វផ្សាយវប្បធម៌ អត្តសញ្ញាណជាតិ និងការពង្រឹងកិច្ចសន្ទនារវាងប្រជាជន និងប្រជាជន។ កេរដំណែលរបស់ព្រះអង្គ នៅតែបន្តរួមចំណែកបំផុសគំនិតសម្រាប់ការងើបឡើងវិញនៃវិស័យភាពយន្តកម្ពុជា និងរួមចំណែកដល់ការរីកចម្រើននៃវិស័យនេះនៅលើឆាកអន្តរជាតិ។ ក្នុងឱកាសនោះផងដែរ ឯកឧត្តមក៏បានរៀបរាប់អំពីដំណាក់កាលសំខាន់ៗនៃប្រវត្តិសាស្ត្រភាពយន្តកម្ពុជា ចាប់ពីយុគសម័យមាសក្នុងទសវត្សរ៍ឆ្នាំ១៩៦០ រហូតដល់ការបំផ្លិចបំផ្លាញក្រោមរបបខ្មែរក្រហម មុននឹងលើកឡើងអំពីការងើបឡើងវិញជាបន្តបន្ទាប់នៃវិស័យភាពយន្តកម្ពុជា ដោយសារការខិតខំប្រឹងប្រែងរបស់ផលិតករភាពយន្តជំនាន់ថ្មី ដែលស្នាដៃរបស់ពួកគេកំពុងរួមចំណែកលើកកម្ពស់កិត្យានុភាពរបស់កម្ពុជានៅលើឆាកអន្តរជាតិ៕ **——————** Connect with AKP: 🌐[Telegram ](https://t.me/TheAKP)🌐[Facebook ](https://www.facebook.com/akp.official/)🌐[Website ](http://akp.gov.kh/)👉[X](https://twitter.com/kampucheapresse) ([Twitter](https://twitter.com/kampucheapresse)) 🌐[Instagram](https://www.instagram.com/akp_news/) 🌐[TikTok](https://www.tiktok.com/@agencekampucheapresse) 🌐[YouTube](https://www.youtube.com/@agencekampucheapresse/featured) #CambodiaWantsPeace #JusticeForCambodia