磅清扬省与柴桢省发生严重车祸 14名工人不幸遇难

គ្រោះថ្នាក់ចរាចរណ៍នៅខេត្តកំពង់ឆ្នាំង និងខេត្តស្វាយរៀង សម្លាប់កម្មករ ១៤នាក់ ក្រសួងការងារ និងបណ្តុះបណ្តាលវិជ្ជាជីវៈ សម្តែងការសោកស្តាយយ៉ាងខ្លាំង ចំពោះគ្រោះថ្នាក់ចរាចរណ៍ ២ករណី ដែលបានកើតឡើងព្រមគ្នា នៅព្រឹកថ្ងៃទី២៣ ខែឧសភា ឆ្នាំ២០២៦ នៅខេត្តកំពង់ឆ្នាំង និងខេត្តស្វាយរៀង។ គិតត្រឹមម៉ោង ១០ព្រឹក មានកម្មករនិយោជិតរងគ្រោះសរុប ៩៣នាក់ (ស្រី ៧៤នាក់) ក្នុងនោះ ស្លាប់ ១៤នាក់ (ស្រី ១០នាក់) របួសធ្ងន់ ១៥នាក់ (ស្រី ១២នាក់) និងរបួសស្រាល ៦៤នាក់ (ស្រី ៥២នាក់)។ ករណីទី១ កើតឡើងនៅស្រុកកំពង់ត្រឡាច ខេត្តកំពង់ឆ្នាំង រវាងរថយន្តដឹកទំនិញធុនធំ និងរថយន្តដឹកកម្មករ បណ្តាលឱ្យមានអ្នករងគ្រោះ ៥៣នាក់ (ស្រី ៥០នាក់) ក្នុងនោះ ស្លាប់ ៩នាក់ របួសធ្ងន់ ៩នាក់ និងរបួសស្រាល ៣៥នាក់។ ករណីទី២ កើតឡើងនៅក្រុងស្វាយរៀង ខេត្តស្វាយរៀង រវាងរថយន្តដឹកកម្មករពីរគ្រឿង បណ្តាលឱ្យមានអ្នករងគ្រោះ ៤០នាក់ (ស្រី ២៤នាក់) ក្នុងនោះ ស្លាប់ ៥នាក់ របួសធ្ងន់ ៦នាក់ និងរបួសស្រាល ២៩នាក់។ ភ្លាមៗបន្ទាប់ពីកើតហេតុ បេឡាជាតិសន្តិសុខសង្គម មន្ទីរការងារ និងអាជ្ញាធរមូលដ្ឋាន បានចុះអន្តរាគមន៍ជួយសង្គ្រោះ និងបញ្ជូនអ្នករងរបួសទៅមន្ទីរពេទ្យជិតខាង និងមន្ទីរពេទ្យកាល់ម៉ែត្រ។ ក្រសួងបានចាត់ទុកហេតុការណ៍នេះជាអំពើគួរឲ្យសោកស្តាយយ៉ាងខ្លាំង ហើយនឹងបន្តសហការជាមួយស្ថាប័នពាក់ព័ន្ធ ដើម្បីពង្រឹងសុវត្ថិភាពដឹកជញ្ជូនកម្មករនិយោជិត។ ជាមួយគ្នានេះ ក្រសួងបានចាត់តាំងថ្នាក់ដឹកនាំចុះរៀបចំពិធីបុណ្យសព ដោយរាល់ចំណាយទាំងអស់ត្រូវបានទទួលខុសត្រូវដោយក្រសួង និងបេឡាជាតិសន្តិសុខសង្គម ព្រមទាំងផ្តល់អត្ថប្រយោជន៍តាមច្បាប់។ ក្រសួងសូមចូលរួមរំលែកទុក្ខដ៏ក្រៀមក្រំជាមួយក្រុមគ្រួសារជនរងគ្រោះ និងសូមជូនពរឲ្យអ្នករងរបួសទាំងអស់ឆាប់ជាសះស្បើយ។ ក្រសួងនឹងបន្តជួយដោះស្រាយបញ្ហារបស់កម្មករនិយោជិត និងក្រុមគ្រួសារតាមគោលរបបសន្តិសុខសង្គម៕