公务部为300名官员提供免费体检 涵盖9项医疗服务

ថ្នាក់ដឹកនាំ និងមន្រ្តីរាជការនៃក្រសួងមុខងារសាធារណៈ បានបង្ហាញអារម្មណ៍សប្បាយរីករាយ និងថ្លែងអំណរគុណចំពោះទឹកចិត្តដ៏ថ្លៃថ្លារបស់ ឯកឧត្តមឧបនាយករដ្ឋមន្រ្តី ហ៊ុន ម៉ានី សម្រាប់ការគិតគូរពីសុខុមាលភាពរបស់មន្រ្តីរាជការគ្រប់ៗរូប តាមរយៈបង្កើតឱ្យមានការពិនិត្យសុខភាពប្រចាំឆ្នាំបែបនេះ។ មន្ត្រីរាជការនៃក្រសួងមុខងារសាធារណៈ បានលើកឡើងស្រដៀងៗគ្នាថា តាមរយៈការពិនិត្យសុខភាពជាប្រចាំបែបនេះ បានជួយពញ្ញាក់ស្មារតីដល់ពួកគាត់ឱ្យយកចិត្តទុកដាក់លើសុខភាពខ្លួនឯងបន្ថែមទៀត។ កាលពីព្រឹកថ្ងៃទី២៦ ខែមេសា ឆ្នាំ២០២៦ ក្រោមគំនិតផ្តួចផ្តើម របស់ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្ត្រីក្រសួងមុខងារសាធារណៈ បានរៀបចំ កម្មវិធីពិនិត្យសុខភាពប្រចាំឆ្នាំដោយឥតគិតថ្លៃ ជូនដល់ថ្នាក់ដឹកនាំ និងមន្រ្តីរាជការនៃក្រសួងមុខងារសាធារណៈបានប្រមាណ៣០០នាក់ ដោយផ្តោតលើសេវាសំខាន់ៗចំនួន៩ រួមមាន៖(១)ពិនិត្យសុខភាពទូទៅ មានចំនួន ១៥៩ករណី (២)ពិនិត្យភ្នែក មានចំនួន ១៨៥ករណី (៣)ពិនិត្យអេកូសាស្រ្ត មានចំនួន ១៦២ករណី (៤)ពិនិត្យឈាម មានចំនួន ២៧៦ករណី (៥)ពិនិត្យអេកូបេះដូង មានចំនួន ២៥៤ករណី (៦)ពិគ្រោះជំងឺផ្លូវចិត្ត និងតានតឹងអារម្មណ៍ មានចំនួន ២៧ករណី (៧)ពិនិត្យជំងឺមាត់ ធ្មេញ មានចំនួន ២១៥ករណី (៨)ពិនិត្យជំងឺសើរស្បែក មានចំនួន ៨៥ករណី និង (៩)ពិនិត្យត្រចៀក ច្រមុះ និងបំពង់ក មានចំនួន ១៥៧ករណី។ សូមជម្រាបថា ក្រុមការងារទទួលបន្ទុកអនុវត្តគម្រោងគិតគូរលើសុខុមាលភាពមន្រ្តីនៃក្រសួងមុខងារសាធារណៈ ដែលហៅកាត់ថា (MCS H+) ដែលតែងតែបានគិតគូរពីសុខុមាលភាពរបស់មន្រ្តីរាជការគ្រប់ៗរូបនៃក្រសួងមុខងារសាធារណៈ កន្លងមកក្រុមការងារបានការចុះសួរសុខទុក្ខមន្ត្រីដែលសម្រាកលំហែមាតុភាព/បិតុភាព កំពុងសម្រាកព្យាបាលជំងឺ ឬជួបគ្រោះថ្នាក់ មរណភាព ព្រមទាំងការផ្តល់ការគាំទ្រផ្សេងៗក្នុងស្ថានភាពលំបាកផ្សេងៗ ជូនទៅដល់ថ្នាក់ដឹកនាំ និងមន្រ្តីរាជការបានចំនួន ១១២ ករណី។