旅游部长强调，面对区域竞争与游客行为变化，柬埔寨需开发新旅游

ទន្ទឹមនេះ ឯកឧត្តមរដ្ឋមន្រ្តី ក៏បានមានប្រសាសន៍បន្តថា នៅក្នុងបរិបទដែលការប្រកួតប្រជែងទេសចរណ៍នៅក្នុងតំបន់​កាន់តែខ្លាំង និងអាកប្បកិរិយាភ្ញៀវទេសចរកាន់តែផ្លាស់ប្តូរ បន្ថែមលើសក្តានុពលដែលមានស្រាប់ យើងត្រូវបន្តបង្កើតផលិតផលទេសចរណ៍ថ្មីៗ កែលម្អនិងពង្រឹងគុណភាពសេវាកម្មទេសចរណ៍ បង្កើនភាពទាក់ទាញ លើកកម្ពស់ភាពស្អាត ក៏ដូចជាពង្រឹងសន្តិសុខ សុវត្ថិភាព ដល់ភ្ញៀវទេសចរ ដើម្បីធានាថាខេត្តព្រះសីហនុ អាច​​ឆ្លើយតបនឹងតម្រូវការភ្ញៀវទេសចរជំនាន់ថ្មី ដើរទាន់យុគសម័យបច្ចេកវិទ្យាឌីជីថល និងបញ្ញាសប្បនិម្មិត សំដៅបន្តរក្សាបាននូវភាពប្រកួតប្រជែងរបស់ខ្លួនជាមួយគោលដៅទេសចរណ៍សំខាន់ៗក្នុងតំបន់ និង​សកលលោកបាន​។ ជាមួយគ្នានេះ ឯកឧត្តមរដ្ឋមន្រ្តី ក៏មានប្រសាសន៍ថា វិស័យទេសចរណ៍ មានចរិកលក្ខណៈអន្តរវិស័យ និងមានភាពប្រទាក់ក្រឡា ដែលទាមទារឱ្យមានការចូលរួមឱ្យបានស្រុះគ្នាពីគ្រប់ភាគីពាក់ព័ន្ធ ស្របតាមអភិក្រមរបស់រាជរដ្ឋាភិបាល «ជវភាពនៃប្រព័ន្ធតួអង្គតែមួយ» អាស្រ័យហេតុនេះ​ ក្រសួងទេសចរណ៍ បានដាក់ចេញសសរស្តម្ភយុទ្ធសាស្ត្រនៃកិច្ចសហប្រតិបត្តិការទាំង៦ ពោល​គឺជាការចូលរួម ដោយភាពសកម្ម, បុរេសកម្ម, អន្តរសកម្ម (និងពេលខ្លះ ប្រតិកម្ម) ពីក្រសួង-ស្ថាប័ន នៅថ្នាក់ជាតិ រដ្ឋបាលថ្នាក់ក្រោមជាតិ កិច្ចសហប្រតិបត្តិការអន្តរជាតិ អង្គការដៃគូអភិវឌ្ឍ សង្គមស៊ីវិល ការប្រមូលផ្តុំជាសហថាមពលពីវិស័យឯកជន ក្នុងស្រុក និង បរទេស បណ្តាញសារព័ត៌មាន អ្នកផលិតមាតិកាព័ត៌មាន Influencers KoLs និងបងប្អូនប្រជាពលរដ្ឋគ្រប់ៗរូប ទាំងខ្មែរ និងបរទេសដែលស្រឡាញ់កម្ពុជា។ ថ្លែងមុននឹងបញ្ចប់ ឯកឧត្តមរដ្ឋមន្រ្តី ក៏បានយកឱកាសដ៏ថ្លៃថ្លានេះ ថ្លែងអំណរគុណយ៉ាងជ្រាលជ្រៅ ដល់ប្អូនៗអ្នកផលិតមាតិកា និង influencer ក៏ដូចជាប្អូនៗយុវជនទាំងអស់ដែលបានរួមគ្នា ផ្ដិតយករូបភាពល្អៗ ស្រស់ស្អាត ផ្សព្វផ្សាយពីគោលដៅទេសចរណ៍នានាក្នុងខេត្តព្រះសីហនុ និងផ្សព្វ​ផ្សាយព័ត៌មានវិជ្ជមាន​អំពីកម្ពុជាក្នុងស្មារតីស្នេហាជាតិ មោទនភាពជាតិ និងលើកកម្ពស់កិត្តិនាមកម្ពុជាទៅកាន់ពិភពលោក ស្របតាមទិសស្លោករបស់មហាគ្រួសារវិស័យ​ទេស​ចរណ៍​ «បុគ្គលម្នាក់ៗ គឺជាអ្នកផ្សព្វផ្សាយទេសចរណ៍កម្ពុជាម្នាក់»។ សណ្ឋាគារឯករាជ្យ ខេត្តព្រះសីហនុ រសៀលថ្ងៃទី១៤ ខែកញ្ញា ឆ្នាំ២០២៦