暹粒河水位已恢复正常 景区恢复开放

ទឹកស្ទឹងសៀមរាប បានស្រកចុះដល់កម្រិតធម្មតាវិញហើយ សៀមរាប៖ គិតត្រឹមរសៀលថ្ងៃទី២៨ ខែកញ្ញា ឆ្នាំ២០២៦ ទឹកស្ទឹងសៀមរាបបានស្រកចុះដល់កម្រិតធម្មតាវិញហើយ។ ទន្ទឹមនោះ អាជ្ញាធរក្រុងសៀមរាបក៏បានចាត់កម្លាំងចុះសម្អាតតាមដងស្ទឹង ដើម្បីរៀបចំ និងលើកកម្ពស់សោភ័ណភាពឡើងវិញ។ ដូច្នេះ ប្រជាពលរដ្ឋក្នុងក្រុងសៀមរាប រួមទាំងភ្ញៀវទេសចរជាតិ និងអន្តរជាតិ អាចមកអង្គុយលំហែកម្សាន្តនៅមាត់ស្ទឹងប្រវត្តិសាស្ត្រមួយនេះបានជាធម្មតាវិញហើយ។ គួររំលឹកថា កាលពីថ្ងៃទី២៦ ខែកញ្ញា ឆ្នាំ២០២៦ មន្ទីរធនធានទឹក និងឧតុនិយមខេត្តសៀមរាប បានចេញសេចក្តីជូនដំណឹងស្តីពីស្ថានភាពទឹកស្ទឹងសៀមរាប ដែលបានហក់ឡើងដល់កម្រិតប្រកាសអាសន្ន។ ស្ថានភាពនេះបណ្តាលមកពីភ្លៀងធ្លាក់ជោកជាំ បង្កឱ្យមានជំនន់ទឹកភ្លៀង និងធ្វើឱ្យកម្ពស់ទឹកស្ទឹងកើនឡើងយ៉ាងខ្លាំង៕ រូបភាព៖ ថោង ប្រណី