柬埔寨司法部会见江苏政法代表团 深化司法合作

ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្រ្តីក្រសួងយុត្តិធម៌ បានទទួលជួបលោក លី យ៉ាវគ័ង (Li Yaoguang) សមាជិកគណៈកម្មាធិការអចិន្ត្រៃយ៍ និងជាលេខាធិការនៃគណៈកម្មការកិច្ចការនយោបាយ និងច្បាប់នៃគណៈកម្មាធិការបក្សកុម្មុយនីស្តខេត្តជាំងស៊ូ និងសហការី ដើម្បីសម្ដែងការគួរសម និងពិភាក្សាការងារ ===================== ទីស្តីការក្រសួងយុត្តិធម៌៖ នៅព្រឹកថ្ងៃព្រហស្បតិ៍ ៦កើត ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៧ ខែកញ្ញា ឆ្នាំ២០២៦ នេះ, ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានទទួលជួបលោក លី យ៉ាវគ័ង (Li Yaoguang) សមាជិកគណៈកម្មាធិការអចិន្ត្រៃយ៍ និងជាលេខាធិការនៃគណៈកម្មការកិច្ចការនយោបាយ និងច្បាប់នៃគណៈកម្មាធិការបក្សកុម្មុយនីស្តខេត្តជាំងស៊ូ និងសហការី ដើម្បីសម្ដែងការគួរសម និងពិភាក្សាការងារ។ ជាកិច្ចចាប់ផ្តើម ឯកឧត្តមឧបនាយករដ្ឋមន្ត្រី បានសម្ដែងនូវការស្វាគមន៍យ៉ាងកក់ក្តៅចំពោះលោក លី យ៉ាវគ័ង និងសហការី ដែលបានអញ្ជើញមកកាន់ក្រសួងយុត្តិធម៌ និងបានគូសបញ្ជាក់អំពីទំនាក់ទំនងមិត្តភាពជាប្រពៃណីដ៏យូរលង់រវាងកម្ពុជា និងមិត្តចិន ដែលបានវិវត្តឥតឈបឈរពីភាពជិតស្និទ្ធទៅជាមិត្តភាពដែកថែប និងកាន់តែស៊ីជម្រៅក្នុងក្របខ័ណ្ឌនៃមិត្តភាពត្បូងពេជ្យ និងការកសាងសហគមន៍វាសនារួមរវាងកម្ពុជា-ចិនក្នុងយុគសម័យថ្មី។ ជាមួយគ្នានេះ, ឯកឧត្តមឧបនាយករដ្ឋមន្ត្រី ក៏បានវាយតម្លៃខ្ពស់ចំពោះលទ្ធផលផ្លែផ្កានៃកិច្ចសហប្រតិបត្តិការរវាងក្រសួងយុត្តិធម៌ និងមិត្តចិន ជាពិសេស កិច្ចសហប្រតិបត្តិការជាមួយដៃគូនៅទីក្រុងឆុងឈីង និងទីក្រុងណាននីង។ នៅក្នុងជំនួបនេះ ឯកឧត្តមឧបនាយករដ្ឋមន្ត្រី និងលោក លី យ៉ាវគ័ង បានពិភាក្សាលើការងារមួយចំនួន រួមមាន៖ (១)-ភាពសម្បូរបែបនៃការដោះស្រាយវិវាទពាណិជ្ជកម្មឆ្លងដែននៅកម្ពុជា, (២)-ក្របខ័ណ្ឌគតិយុត្តិក្នុងការការពារសហគ្រាស និងពលរដ្ឋចិនដែលកំពុងធ្វើប្រតិបត្តិការនិងរស់នៅកម្ពុជា, (៣)-ការផ្លាស់ប្តូរបទពិសោធន៍ក្នុងការអនុវត្តការងារតុលាការ និងការលើកកម្ពស់នីតិរដ្ឋ និង (៤)-ការផ្លាស់ប្តូរ និងការបណ្តុះបណ្តាលមន្ត្រីតុលាការ។ ជាចុងក្រោយ, ឯកឧត្តមឧបនាយករដ្ឋមន្ត្រី និងលោក លី យ៉ាវគ័ង បានបញ្ជាក់អំពីបំណងទៅវិញទៅមក និងទស្សនៈរួមក្នុងការពង្រឹងកិច្ចសហប្រតិបត្តិការរវាងកម្ពុជា និងមិត្តចិន ឱ្យកាន់តែជិតស្និទ្ធ និងស៊ីជម្រៅបន្ថែមទៀត។