柬埔寨绿色季节旅游活动正式启动 5月至10月全境推广

ឯកឧត្តម ឡុង គឹមឃន រដ្ឋលេខាធិការ ក្រសួងយុត្តិធម៌ បានអញ្ជើញចូលរួមជាកិត្តិយសក្នុងពិធីប្រកាសបើកជាផ្លូវការ “យុទ្ធនាការទស្សនាកម្ពុជានៅរដូវកាលបៃតងឆ្នាំ២០២៦” ===================== រាជធានីភ្នំពេញ៖ កាលពីល្ងាចថ្ងៃសៅរ៍ ១ រោច ខែពិសាខ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី០២ ខែឧសភា ឆ្នាំ២០២៦ ឯកឧត្តម ឡុង គឹមឃន រដ្ឋលេខាធិការ ក្រសួងយុត្តិធម៌  បានអញ្ជើញចូលរួមជាកិត្តិយសក្នុងពិធីប្រកាសបើកជាផ្លូវការ “យុទ្ធនាការទស្សនាកម្ពុជានៅរដូវកាលបៃតងឆ្នាំ២០២៦” ដែលបានប្រព្រឹត្តទៅនៅទីតាំងផ្លូវថ្មើរជើងចតុមុខ (Chaktomuk Walk Street) រាជធានីភ្នំពេញ​ ក្រោមអធិបតីភាព ឯកឧត្ដម ហួត ហាក់ រដ្ឋមន្រ្តីក្រសួងទេសចរណ៍ និងលោកជំទាវ។ ស្ថិតក្រោមបរិយាកាសដ៏អធិកអធម ស្និទ្ធស្នាល និងសប្បាយរីករាយ ដែលបានទន្ទឹងរង់ចាំមកជាយូរ ពិធីនេះមានការអញ្ជើញចូលរួមពីសំណាក់ ឯកឧត្ដម លោកជំទាវ ឯកអគ្គរាជទូត ឯកអគ្គរដ្ឋទូត តំណាងអង្គទូតបរទេសប្រចាំនៅកម្ពុជា តំណាងដៃគូអភិវឌ្ឍ អង្គការជាតិ និងអន្តរជាតិ ឯកឧត្តម ហួត ហៃ អភិបាលរងនៃគណៈអភិបាលរាជធានីភ្នំពេញ តំណាង ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ឯកឧត្តម លោកជំទាវ ថ្នាក់ដឹកនាំក្រសួងទេសចរណ៍ និងអន្តរក្រសួង ស្ថាប័ន ឯកឧត្តម លោកជំទាវ តំណាងគណៈអភិបាលខេត្តទាំង ២៤ ឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី ដែលអញ្ជើញមកពីវិស័យឯកជន ព្រមទាំងបងប្អូនប្រជាពលរដ្ឋយ៉ាងច្រើនកុះករ។ សូមជម្រាបជូនថា យុទ្ធនាការទស្សនាកម្ពុជានៅរដូវកាលបៃតងឆ្នាំ២០២៦ ត្រូវបានរៀបចំឡើង ដោយទទួលបានគោលការណ៍អនុញ្ញាតដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ យុទ្ធនាការទស្សនាកម្ពុជានៅរដូវកាលបៃតងឆ្នាំ២០២៦ នេះ គឺចាប់ផ្ដើមពីខែឧសភា ដល់ខែតុលា។ ៦គួរ ទស្សនាកម្ពុជានៅរដូវកាលបៃតង គឺ (១) គួរចង់ឃើញ  (២) គួរស្នាក់នៅ (៣)  គួរភ្លក្ស (៤) គួរទស្សនា (៥) គួរសាកល្បង និង (៦) គួរទិញ។ ឆ្លៀតក្នុងឱកាសនេះ ឯកឧត្តមរដ្ឋមន្ត្រី បានគូសបញ្ជាក់ថា យុទ្ធនាការ “ទស្សនាកម្ពុជានៅរដូវកាលបៃតង” មានចក្ខុវិស័យសំខាន់ៗ ចំនួន៣៖ គឺ (១) ការបង្កើនភាពទាក់ទាញភ្ញៀវទេសចរអន្តរជាតិ (២) ជំរុញចលនាទេសចរណ៍ក្នុងស្រុក និង (៣) ពង្រាយរបាយភ្ញៀវទេសចរឱ្យបានច្រើន ជាពិសេសបំពេញបន្ថែមចរន្តទេសចរក្នុងរដូវកាលបៃតង ពីខែឧសភា ដល់ខែតុលា សំដៅជំរុញកម្ពុជា ឱ្យក្លាយជាគោលដៅទទួលបានកំណើនទេសចរពេញមួយឆ្នាំ (Year Round Destination)។