柬埔寨就泰国军队在边境侵犯领土主权提出严正抗议

**កម្ពុជាតវ៉ាយ៉ាងដាច់អហង្ការ ចំពោះការរំលោភបំពានអធិបតេយ្យភាពទឹកដីពីសំណាក់កងទ័ពថៃ នៅតាមបណ្តោយព្រំដែន** ក្រសួងការបរទេសកម្ពុជា បានចេញសេចក្តីប្រកាសព័ត៌មានមួយ នៅថ្ងៃទី១៨ ខែមេសា ឆ្នាំ២០២៦ ដោយសម្តែងនូវការតវ៉ាជាផ្លូវការប្រឆាំងនឹងសកម្មភាពរបស់កងកម្លាំងប្រដាប់អាវុធថៃ ដែលបន្តពង្រឹងការកាន់កាប់ដោយខុសច្បាប់ និងរំលោភលើអធិបតេយ្យភាព បូរណភាពទឹកដីកម្ពុជានៅតាមបណ្តោយព្រំដែនជាច្រើនកន្លែង។ បើតាមសេចក្តីប្រកាសព័ត៌មានដែលទទួលបាននៅថ្ងៃដដែល រាជរដ្ឋាភិបាលកម្ពុជាបានបញ្ជាក់ទីតាំងសកម្មភាពរំលោភបំពានរបស់ភាគីថៃនៅតាមខេត្តចំនួនបី រួមមាន៖ **ខេត្តព្រះវិហារ៖ **នៅឃុំស្រអែម ស្រុកជាំក្សាន្ត កងកម្លាំងថៃបានសាងសង់ប៉ុស្តិ៍យាមសង្កេតការណ៍នៅក្នុងតំបន់ប្រាសាទព្រះវិហារ។ **ខេត្តឧត្តរមានជ័យ៖** នៅស្រុកអន្លង់វែង កងទ័ពថៃបានបន្តសាងសង់ផ្លូវនៅជិតបង្គោលព្រំដែនលេខ២ បច្ចុប្បន្ន និងនៅតំបន់ដើមតាត្រាវ ស្រុកត្រពាំងប្រាសាទ។ នៅស្រុកបន្ទាយអំពិល កងកម្លាំងថៃបានជីកលេណដ្ឋាននៅតំបន់ច្រកទ្វារអន្តរជាតិជប់គគីរ។ នៅសង្កាត់កូនក្រៀល ក្រុងសំរោង គេបានសាងសង់ប៉ុស្តិ៍យាមសង្កេតការណ៍នៅភាគខាងកើតនៃតំបន់ជប់ដើមខ្នុរ និងបន្តឈូសឆាយដីនៅភាគខាងជើង។ នៅតំបន់ថ្មដូន កងទ័ពថៃបានសាងសង់ផ្លូវថ្មើរជើង លេណដ្ឋាន និងផ្លូវនៅភាគខាងកើតច្រកទ្វារថ្មដូន។ **ខេត្តពោធិ៍សាត់៖** នៅឃុំថ្មដា ស្រុកវាលវែង កងកម្លាំងថៃបានប្រើប្រាស់គ្រឿងចក្រធុនធ្ងន់ឈូសឆាយដីបន្ថែមទៀតនៅតំបន់អូរភ្លុកដំរី។ សេចក្តីប្រកាសព័ត៌មានបានបញ្ជាក់ថា សកម្មភាពទាំងនេះរំលោភលើការប្តេជ្ញាចិត្តរបស់ប្រទេសថៃក្រោមធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងសន្ធិសញ្ញាមិត្តភាព និងសហប្រតិបត្តិការនៅអាស៊ីអាគ្នេយ៍ (TAC) ជាពិសេសគោលការណ៍នៃការដោះស្រាយវិវាទដោយសន្តិវិធី ការគោរពអធិបតេយ្យភាពទឹកដី និងការមិនប្រើប្រាស់កម្លាំង។ កម្ពុជាបានបដិសេធចំពោះការប៉ុនប៉ងណាមួយក្នុងការប្រើប្រាស់សកម្មភាពទាំងនេះថាជាការការពារខ្លួន ឬស្របតាមសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) កាលពីថ្ងៃទី២៧ ខែធ្នូ ឆ្នាំ២០២៥។ រាជរដ្ឋាភិបាលកម្ពុជាបានគូសបញ្ជាក់ជាថ្មីថា កម្ពុជាមិនទទួលយកខ្សែបន្ទាត់ព្រំដែន ឬការទាមទារទឹកដីណាមួយដែលអះអាងឯកតោភាគីដោយប្រទេសថៃឡើយ។ សកម្មភាពទាំងនេះនឹងមិនប៉ះពាល់ដល់សិទ្ធិស្របច្បាប់ ឬជំហររបស់កម្ពុជាទាក់ទងនឹងការកំណត់បន្ទាត់ព្រំដែនអន្តរជាតិឡើយ។ ជាចុងក្រោយ កម្ពុជាបានអំពាវនាវឱ្យប្រទេសថៃបញ្ឈប់រាល់សកម្មភាពឯកតោភាគីនៅតាមតំបន់ដែលបានរៀបរាប់ខាងលើ និងតំបន់ផ្សេងទៀតដែលស្ថិតក្នុងកាលៈទេសៈស្រដៀងគ្នា ដើម្បីកាត់បន្ថយភាពតានតឹង ពង្រឹងជំនឿចិត្តទុកចិត្តគ្នាទៅវិញទៅមក រក្សាសន្តិភាព ស្ថិរភាព និងភាពជាអ្នកជិតខាងល្អតាមបណ្តោយព្រំដែន។ រាជរដ្ឋាភិបាលកម្ពុជាបានបញ្ជាក់ពីការប្តេជ្ញាចិត្តយ៉ាងមុតមាំក្នុងការស្វែងរកដំណោះស្រាយជម្លោះព្រំដែនជាមួយប្រទេសថៃ និងប្រទេសជិតខាងទាំងអស់ដោយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងទ្វេភាគី ដោយរក្សាយ៉ាងខ្ជាប់ខ្ជួននូវជំហរថា ខ្សែព្រំដែនមិនត្រូវបានផ្លាស់ប្តូរដោយការប្រើកម្លាំងឡើយ៕