金边皇家大学参加东盟海洋塑料污染国际会议

សន្និសីទអន្តរជាតិស្តីពីការបំពុលប្លាស្ទិកសមុទ្រនៅអាស៊ាន សាកលវិទ្យាល័យភូមិន្ទភ្នំពេញ (Royal University of Phnom Penh): តាមរយៈការិយាល័យស្រាវជ្រាវ បានចូលរួមយ៉ាងសកម្មក្នុងសន្និសីទអន្តរជាតិស្តីពីការបំពុលប្លាស្ទិកសមុទ្រនៅតំបន់អាស៊ាន ដែលបានប្រារព្ធឡើងពីថ្ងៃទី២១-២៣ ខែមេសា ឆ្នាំ២០២៦ នៅទីក្រុងហៃហ្វុង នៃប្រទេសវៀតណាម។ សន្និសីទនេះត្រូវបានរៀបចំដោយ Vietnam Maritime University និងទទួលបានការឧបត្ថម្ភថវិកាពី Norwegian Institute for Water Research ដែលជាស្ថាប័នស្រាវជ្រាវឈានមុខគេក្នុងវិស័យទឹក និងបរិស្ថាន។ ក្រុមការងារស្រាវជ្រាវរបស់ RUPP ដឹកនាំដោយ លោកសាស្ត្រាចារ្យបណ្ឌិត សុខ សិរី ប្រធានការិយាល័យស្រាវជ្រាវ បានធ្វើបទបង្ហាញលើ “ចន្លោះប្រហោងនៃការស្រាវជ្រាវ និងតម្រូវការចាំបាច់” ដើម្បីដោះស្រាយបញ្ហាការបំពុលប្លាស្ទិកសមុទ្រនៅក្នុងតំបន់អាស៊ាន ដោយបានបង្ហាញពីបញ្ហាប្រឈមសំខាន់ៗ ដូចជា ការខ្វះទិន្នន័យប្រកបដោយគុណភាព ការសម្របសម្រួលអន្តរប្រទេសនៅមានកម្រិត និងការអនុវត្តគោលនយោបាយមិនទាន់មានប្រសិទ្ធភាព។ បន្ថែមពីនេះ លោក ធូ ពន្លឺ ក៏បានធ្វើបទបង្ហាញអំពី “ការអភិបាលកិច្ចប្លាស្ទិក និងខ្សែសង្វាក់តម្លៃប្លាស្ទិកនៅកម្ពុជា” ដោយបានលើកឡើងអំពីស្ថានភាពបច្ចុប្បន្ន និន្នាការកំណើននៃការប្រើប្រាស់ប្លាស្ទិក បញ្ហាការគ្រប់គ្រងសំណល់ និងគម្លាតនៅក្នុងគោលនយោបាយ ដែលត្រូវការកែលម្អ ដើម្បីបង្កើនប្រសិទ្ធភាពនៃការគ្រប់គ្រងប្លាស្ទិកនៅជាតិ។ សន្និសីទនេះក៏បានផ្តល់ឱកាសសំខាន់សម្រាប់អ្នកស្រាវជ្រាវ និងអ្នកជំនាញពីបណ្តាប្រទេសអាស៊ាន និងអន្តរជាតិ ក្នុងការផ្លាស់ប្តូរបទពិសោធន៍ ចែករំលែកចំណេះដឹង និងពង្រឹងកិច្ចសហប្រតិបត្តិការក្នុងការដោះស្រាយបញ្ហាបរិស្ថានជាសកល។ ការចូលរួមរបស់ Royal University of Phnom Penh ក្នុងសន្និសីទនេះ បង្ហាញពីការប្តេជ្ញាចិត្តក្នុងការជំរុញការស្រាវជ្រាវវិទ្យាសាស្ត្រ ការចូលរួមក្នុងវេទិកាអន្តរជាតិ និងការរួមចំណែកដល់ការអភិវឌ្ឍន៍ប្រកបដោយចីរភាព ដោយផ្តោតលើការកាត់បន្ថយការបំពុលប្លាស្ទិកសមុទ្រនៅតំបន់អាស៊ាន។ #RUPP គេហទំព័រ និងបណ្ដាញសង្គមផ្លូវការរបស់​ RUPP 🌐 | [Facebook Page](https://www.facebook.com/ruppedu.kh/) 🌐 | [Telegram Channel](https://t.me/ruppnews) 🌐 | [Telegram Chat](https://t.me/+2N5cth6hKMg0M2Jl) 🌐 | [Tiktok](https://www.tiktok.com/@www.rupp.edu.kh?_r=1&_t=ZS-95lg8eK61rg)