干拉省勒铁县发生未成年人性侵未遂案 嫌犯已被捕

🚨ក្មេងស្រីអាយុ១៣ឆ្នាំម្នាក់ រងការប៉ុនប៉ងរំលោភពីបុរសម្នាក់នៅស្រុកលើកដែក សមត្ថកិច្ចឃាត់ខ្លួនជនសង្ស័យបញ្ជូនទៅតុលាការ‼️ (ខេត្តកណ្ដាល)៖ កម្លាំងនគរបាលស្រុកលើកដែក បានធ្វើការស្រាវជ្រាវ និងឃាត់ខ្លួនបុរសម្នាក់ ពាក់ព័ន្ធករណីប៉ុនប៉ងរំលោភលើក្មេងស្រីអាយុ១៣ឆ្នាំម្នាក់ ក្រោយមានការផ្សព្វផ្សាយព័ត៌មានតាមបណ្ដាញសង្គមហ្វេសប៊ុក បង្កឲ្យមានការព្រួយបារម្ភពីសុវត្ថិភាពកុមារ។ យោងតាមសេចក្ដីប្រកាសព័ត៌មានរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្ដាល បានឲ្យដឹងថា ហេតុការណ៍នេះបានកើតឡើងនៅថ្ងៃទី១០ ខែកក្កដា ឆ្នាំ២០២៦ វេលាម៉ោង១២:១០នាទី ត្រង់ចំណុចម៉ុងបញ្ចុះសព តាមផ្លូវវត្តអ្នកតាតេជោ ស្ថិតនៅភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្ដាល។ ជនរងគ្រោះ គឺជាក្មេងស្រីអាយុ១៣ឆ្នាំ មុខរបរសិស្ស និងមានទីលំនៅក្នុងឃុំព្រែកទន្លាប់ ស្រុកលើកដែក។ ចំណែកជនសង្ស័យមានឈ្មោះ ពេជ្រ ចំរើន ភេទប្រុស អាយុ៣០ឆ្នាំ មុខរបរមិនពិតប្រាកដ មានស្រុកកំណើតនៅខេត្តស្វាយរៀង។ ក្រោយទទួលបានព័ត៌មានភ្លាមៗ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល បានបញ្ជាឲ្យកម្លាំងជំនាញពាក់ព័ន្ធ និងកម្លាំងអធិការដ្ឋាននគរបាលស្រុកលើកដែក ចុះស្រាវជ្រាវជាបន្ទាន់ រហូតឈានដល់ការឃាត់ខ្លួនជនសង្ស័យ។ ក្នុងការសាកសួរ ជនសង្ស័យបានសារភាពថា ខ្លួនស្ថិតក្នុងស្ថានភាពស្រវឹងស្រា និងបានធ្វើសកម្មភាពស្ទាក់កង់សិស្សពីរនាក់ មុនចាប់ក្មេងស្រីរងគ្រោះចុះពីកង់ និងប៉ុនប៉ងសម្រាតសំពត់។ ទោះជាយ៉ាងណា ក្មេងស្រីបានតស៊ូរារាំង និងស្រែករកជំនួយ ខណៈមានប្រជាពលរដ្ឋមកដល់កន្លែងកើតហេតុ ទើបជនសង្ស័យរត់គេចខ្លួនទៅពួននៅក្បែរម៉ុងបញ្ចុះសព មុនត្រូវសមត្ថកិច្ចតាមឃាត់ខ្លួនបាន។ សមត្ថកិច្ចបានដកហូតវត្ថុតាងរួមមាន អាវសិស្សពណ៌សដៃវែងចំនួន១ និងសំពត់សិស្សពណ៌ខ្មៅដែលរងការហែកចំនួន១។ លទ្ធផលពិនិត្យទឹកនោមបង្ហាញថា ជនសង្ស័យ មិនមានសារធាតុញៀន នោះទេ។ បច្ចុប្បន្ន ជនសង្ស័យត្រូវបានសមត្ថកិច្ចកសាងសំណុំរឿង បញ្ជូនទៅអយ្យការអមសាលាដំបូងខេត្តកណ្ដាល ដើម្បីចាត់ការតាមនីតិវិធីច្បាប់។ សូមអំពាវនាវដល់មាតាបិតា និងអាណាព្យាបាល បង្កើនការប្រុងប្រយ័ត្ន និងតាមដានសុវត្ថិភាពកូនចៅ ជាពិសេសនៅពេលធ្វើដំណើរតែម្នាក់ឯង ឬឆ្លងកាត់ទីតាំងស្ងាត់ ដើម្បីបង្ការហានិភ័យដែលអាចកើតមានជាយថាហេតុ៕