德崇国际机场查获34公斤大麻 逮捕一名外籍旅客

ទូតអាមេរិក៖ អាមេរិកកំពុងធ្វើការយ៉ាងជិតស្និទ្ធជាមួយកម្ពុជា ក្នុងការបង្ក្រាបបទល្មើស Scam Online ស្ថានទូតសហរដ្ឋអាមេរិកប្រចាំកម្ពុជានៅថ្ងៃសុក្រនេះ បានអះអាងថា អាមេរិកប្តេជ្ញាប្រយុទ្ធប្រឆាំងនឹងបទល្មើសឆ្លងដែន និងកំពុងធ្វើការយ៉ាងជិតស្និទ្ធជាមួយកម្ពុជា ដើម្បីសម្រេចបានលទ្ធផលជាក់ស្តែងក្នុងការបង្ក្រាបបណ្តាញឧក្រិដ្ឋកម្មតាមប្រព័ន្ធអនឡាញ។ ការអះអាងនេះធ្វើឡើងបន្ទាប់ពីលោកស្រី Aleks Zittle ភារធារីស្ថានទូតអាមេរិកប្រចាំកម្ពុជា បានជួបពិភាក្សាការងារជាមួយលោក ស សុខា រដ្ឋមន្ត្រីក្រសួងមហាផ្ទៃកាលពីថ្ងៃទី០២ ខែកញ្ញា កន្លងទៅ។ ជំនួបនេះ គឺដើម្បីគូសបញ្ជាក់ពីសារៈសំខាន់ នៃកិច្ចសហប្រតិបត្តិការអនុវត្តច្បាប់រវាងអាមេរិក និងកម្ពុជា ព្រមទាំងលើកទឹកចិត្តឱ្យកម្ពុជាធ្វើការស៊ើបអង្កេត និងចាត់វិធានការច្បាប់យ៉ាងម៉ឺងម៉ាត់ប្រឆាំងនឹងបណ្តាញឧក្រិដ្ឋជនដែលប្រព្រឹត្តបទល្មើសឆបោកតាមប្រព័ន្ធអនឡាញ។ បើតាមស្ថានទូតអាមេរិក ភាគីទាំងពីរ ក៏បានពិភាក្សាអំពីឱកាសសម្រាប់ពង្រឹងកិច្ចសហប្រតិបត្តិការអនុវត្តច្បាប់ និងការចែករំលែកព័ត៌មានអំពីការគំរាមកំហែងឆ្លងដែន ព្រមទាំងរបៀបដែលសហរដ្ឋអាមេរិកអាចផ្តល់ជំនួយបច្ចេកទេសដើម្បីកសាងសមត្ថភាពប្រព័ន្ធយុត្តិធម៌ព្រហ្មទណ្ឌកម្ពុជា។