金边桑园区飞车抢夺案告破 2名嫌犯落网摩托车被扣

ឆក់យកទូរស័ព្ទបានសម្រេច និងរត់គេចខ្លួនបាន១ថ្ងៃ ត្រូវកម្លាំងនគរបាលព្រហ្មទណ្ឌរាជធានីភ្នំពេញ តាមស្រាវជ្រាវឃាត់ខ្លួនបាន២នាក់ (ភ្នំពេញ)៖ ជនសង្ស័យ២នាក់ ដែលបានធ្វើសកម្មភាពឆក់ទូរស័ព្ទបានសម្រេច ហើយរត់គេចខ្លួនបាន១ថ្ងៃប៉ុណ្ណោះ និងពេលនេះត្រូវបានកម្លាំងព្រហ្មទណ្ឌកំរិតស្រាល នៃស្នងការនគរបាលរាជធានីភ្នំពេញ តាមស្រាវជ្រាវបង្ក្រាប និងឃាត់ខ្លួនបានហើយ ដោយដកហូតវត្ថុតាងជាម៉ូតូ១គ្រឿង ដែលជិះធ្វើសកម្មភាព ព្រមទាំងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់។ បើតាមរបាយការណ៍របស់សមត្ថកិច្ច ដែលបណ្ដាញសារព័ត៌មានទទួលបាននៅថ្ងៃទី០៥ ខែឧសភា ឆ្នាំ២០២៦។ ជាក់ស្ដែង សម្រាប់ការតាមស្រាវជ្រាវ និងឈានដល់ការឃាត់ខ្លួនជនសង្ស័យជាចោរឆក់ទូរស័ព្ទទាំង២នាក់ខាងលើនេះ បានធ្វើឡើងនៅវេលាម៉ោង០១៖៣០នាទីយប់រំលងអាធ្រាតឈានចូលថ្ងៃទី០៣ ខែឧសភា ឆ្នាំ២០២៦ ដោយអនុវត្តបទបញ្ជារបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដឹកនាំដោយលោកឧត្តមសេនីយ៍ត្រី ប៊ុត សត្យា ស្នងការរង ទទួលផែនការងារព្រហ្មទណ្ឌ លោកឧត្តមសេនីយ៍ទោ លី ប៊ុនអេង ស្នងការរងទទួលការិយាល័យព្រហ្មទណ្ឌកម្រិតស្រាល និងលោកវរសេនីយ៍ឯក ម៉ម សាវន នាយការិយាល័យព្រហ្មទណ្ឌកម្រិតស្រាល។ របាយការណ៍របស់សមត្ថកិច្ចបានបញ្ជាក់ថា មានជនសង្ស័យ០២នាក់ ជិះម៉ូតូ១គ្រឿងធ្វើសកម្មភាពឆក់ទូរស័ព្ទពីជនរងគ្រោះបានសម្រេច ហើយជិះរត់គេចខ្លួនបាត់ស្រម៉ោល ដែលបានកើតឡើងនៅតាមបណ្ដោយកំណាត់ផ្លូវបាសាក់លែន២១ កែងផ្លូវ៣១២ សង្កាត់ទន្លេបាសាក់ ខណ្ឌចំការមន កាលពីថ្ងៃទី០២ ខែឧសភា ឆ្នាំ២០២៦។ របាយការណ៍ដដែលបានបញ្ជាក់ទៀតថា បន្ទាប់ពីកើតហេតុ កម្លាំងសមត្ថកិច្ចព្រហ្មទណ្ឌកំរិតស្រាល បានបើកការស្រាវជ្រាវភ្លាមៗ និងឈានដល់ការបង្ក្រាប និងឃាត់ខ្លួនជនសង្ស័យទាំង០២នាក់ រួមមាន៖ ១-ឈ្មោះ មុំ សំណាង ហៅ ណាង ភេទប្រុស អាយុ១៨ឆ្នាំ និង២-ឈ្មោះ ទឹម បញ្ញា ហៅញ៉ា ភេទប្រុស អាយុ១៨ឆ្នាំ ដោយដកហូតវត្ថុតាងចាប់យក មានម៉ូតូធ្វេីសកម្មភាព១គ្រឿង។ បច្ចុប្បន្នជនសង្ស័យទាំង២នាក់ និងវត្ថុតាង ត្រូវបានកម្លាំងការិយាល័យជំនាញ បាននិងកំពុងបញ្ចូនសុំណុំរឿងទៅតុលាការ ដើម្បីចាត់ការតាមនីតិវិធី៕