柬埔寨卫生部筹备2026年国际助产士日活动

កិច្ចប្រជុំរៀបចំ ទិវាឆ្មបជាតិ-អន្តរជាតិ ៥ ឧសភា ឆ្នាំ២០២៦ ក្រោមប្រធានបទ៖ «តម្រូវការឆ្មបបន្ថែម ១ លាននាក់ ក្នុងពិភពលោក» —— រាជធានីភ្នំពេញ៖ ព្រឹកថ្ងៃច័ន្ទ ទី២០ ខែមេសា ឆ្នាំ ២០២៦ នៅមជ្ឍមណ្ឌលជាតិគាំពារមាតា និងទារក លោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល បានដឹកនាំកិច្ចប្រជុំ ដើម្បីរៀបចំ ទិវាឆ្មបជាតិ-អន្តរជាតិ ៥ ឧសភា ឆ្នាំ២០២៦ ដែលនឹងប្រព្រឹត្តទៅ នៅថ្ងៃទី៤ ខែឧសភា ឆ្នាំ២០២៦ ក្រោមប្រធាន​បទ​ដ៏​មាន​អត្ថន័យ៖ «តម្រូវការឆ្មបបន្ថែម ១ លាននាក់ ក្នុងពិភពលោក (One Million More Midwives)»។ ទិវានេះរៀបចំឡើងក្នុងគោលបំណងសំខាន់ៗចំនួន ៤ គឺ៖ ១)អបអរសាទរ និងលើកកម្ពស់វិជ្ជាជីវៈឆ្មប ២)បង្កើនការវិនិយោគលើការបណ្តុះបណ្តាលឆ្មបទាំងមុនពេល និងក្នុងពេលបម្រើការងារ ៣)លើក​កម្ពស់​ភាព​ជាអ្នកដឹកនាំ តួនាទី សមត្ថភាព និងក្រមសីលធម៌វិជ្ជាជីវៈឆ្មប ដើម្បីចូលរួមកាត់​បន្ថយ​អត្រា​ស្លាប់​របស់​មាតា និងទារក និង៤)ពង្រឹងបណ្តាញឆ្មបទាំងក្នុងវិស័យសាធារណៈ និងឯកជន ព្រមទាំងបង្កើន​កិច្ចសហការ​ជាមួយដៃគូអភិវឌ្ឍន៍។ កម្មវិធីនេះ នឹងមានការអញ្ជើញចូលរួមពីថ្នាក់ដឹកនាំក្រសួងសុខាភិបាល តំណាងអង្គការ UNFPA និង​ស្ថាប័ន​ពាក់​​ព័ន្ធនានា ដោយមានរបៀបវារៈសំខាន់ៗ និងមានការអានសារ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងប្រសាសន៍សំណេះសំណាល ដោយ​ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល។ លោកជំទាវសាស្ត្រាចារ្យរដ្ឋលេខាធិការ បានមានប្រសាសន៍ដើម្បីឱ្យទិវាកាន់តែមានអត្តប្រយោជន៍ដល់​អ្នកចូលរួម បន្ថែមប្រធានបទបច្ចេកទេសចំនួន ២ គឺ៖ ការគ្រប់គ្រង​ផ្ទៃពោះ​មានហានិភ័យ និងបទពិសោធន៍​ពីការ​គ្រប់គ្រង និងដឹកនាំ​នៅ​តាមមណ្ឌលសុខភាព។ តាមរយៈទិវានេះ ក្រសួងសុខាភិបាលសង្ឃឹមយ៉ាងមុតមាំថា នឹងចូលរួមចំណែកយ៉ាងសកម្ម​ក្នុងការពង្រឹង​គុណភាព​​សេវា​ថែទាំសុខភាពមាតា និងទារក ស្របតាមទស្សនៈដែលថា ឆ្មបគឺជាអ្នកដឹកនាំ ដែលមាន​ឥរិយាបទ​ល្អ មានសមត្ថភាពខ្ពស់ និងជាកម្លាំងចលករដ៏សំខាន់ក្នុងការនាំមកនូវសុវត្ថិភាពជូនមាតា និង​ទារកគ្រប់ស្ថានភាព។ **🌐** [Website](https://moh.gov.kh/kh/home) 📱 [Facebook](https://www.facebook.com/MinistryofHealthofCambodia?mibextid=ZbWKwL) 📱 [Telegram](https://t.me/MOHCambodia) 📱 [X (twitter)](https://x.com/MohCambodia) 📱 [Tiktok](https://www.tiktok.com/@mohcambodia) 📱 [YouTube](https://www.youtube.com/@MOHCambodia)