亚太议会代表团访问贡布省考察医疗服务

អមគណៈប្រតិភូសភាអាស៊ី-ប៉ាស៊ីហ្វិកមកពី ១៦ប្រទេស ចុះទស្សនកិច្ចសិក្សាស្វែងយល់ពីការបម្រើសេវាសុខាភិបាលនៅខេត្តកំពត។ — ខេត្តកំពត៖ ថ្ងៃពុធ ទី១២ ខែសីហា ឆ្នាំ ២០២៦ ឯកឧត្តមវេជ្ជបណ្ឌិត ឡូ វាសនាគីរី រដ្ឋលេខាធិការ​ ឯកឧត្តមវេជ្ជបណ្ឌិត ស៊ុង វិនតៈ រដ្ឋលេខាធិការក្រសួងសុខាភិបាល និងឯកឧត្តមវេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល បានអញ្ជេីញចូលរួមជាមួយគណៈប្រតិភូសមាជិកសភា ចំនួន១៦ប្រទេស ដែលបានអញ្ជើញមកចូលរួមកិច្ចប្រជុំ​ APPF-GH លើកទី៩ នៅកម្ពុជា ចុះទស្សនកិច្ចសិក្សាផ្ទាល់នៅមណ្ឌលសុខភាពអង្គភ្នំតូច (ស្រុកអង្គរជ័យ) និងមន្ទីពេទ្យអនុស្សាវរីយ៍ស៊ុនយ៉ាឃៀល (ក្រុងបូកគោ) ខេត្តកំពត ដើម្បីដកស្រង់បទពិសោធន៍ជាក់ស្តែងពីការបម្រេីសេវាថែទាំសុខភាពនៅសហគមន៍ក្នុងប្រទេសកម្ពុជា។ ដំណើរទស្សនកិច្ចនេះដឹកនាំដោយ​ លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា និងមានការចូលរួមរបស់ ថ្នាក់ដឹកនាំរដ្ឋសភា និងព្រឹទ្ធសភាជាច្រើនរូប​ ដោយមានការទទួលស្វាគមន៍យ៉ាងកក់ក្តៅពី ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត។ ដំណើរទស្សនកិច្ចសិក្សាស្វែងយល់ពីការបម្រើសេវាសុខាភិបាល នៅមូលដ្ឋានសុខាភិបាល ក្នុងខេត្តកំពតពេលនេះ គឺជាផ្នែកមួយដ៏សំខាន់នៃ «វេទិកាសមាជិកសភាអាស៊ី-ប៉ាស៊ីហ្វ៊ិក ស្តីពីសុខភាពសកល លើកទី៩» ដែលរដ្ឋសភាកម្ពុជាធ្វើជាម្ចាស់ផ្ទះ ចាប់ពីថ្ងៃទី១១ ដល់ថ្ងៃទី១៣ ខែសីហា ឆ្នាំ២០២៦។ តាមរយៈនេះ គណៈប្រតិភូសភាទាំងអស់ បានសិក្សាស្វែងយល់ស៊ីជម្រៅ ពីការបម្រេីសេវាថែទាំសុខភាពបឋមនៅសហគមន៍​ ប្រកបដោយគុណភាព និងនៅជិតប្រជាពលរដ្ឋ។ លេីសពីនេះទៀត​ គណ:ប្រតិភូបានស្វែង​យល់ពីសារ:សំខាន់ នៃការចូលរួមរបស់វិស័យសុខាភិបាលឯកជន ក្នុងការពង្រឹងប្រព័ន្ធសុខាភិបាល ប្រកបដោយសមធម៌​ និងបរិយាបន្ន​ ដេីម្បីលើកកម្ពស់សុខុមាលភាពប្រជាជន​ ឈានទៅសម្រេចការគ្របដណ្តប់សុខភាពជាសកល។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)