副总理洪玛尼于2026年8月19日至20日视察文化艺术部，开

**ឯកឧត្តមឧបនាយករដ្ឋមន្ត្រី ហ៊ុន ម៉ានី អញ្ជើញចុះពិនិត្យដំណើរការជំរឿនមន្ត្រីជាក់ស្តែង និងធ្វើជីវមាត្រ នៅក្រសួងវប្បធម៌ និងវិចិត្រសិល្បៈ** យុទ្ធនាការជំរឿនមន្ត្រីជាក់ស្តែង និងការធ្វើជីវមាត្រ ដើម្បីធ្វើបច្ចុប្បន្នភាពទិន្នន័យ និងរចនាសម្ព័ន្ធអង្គភាព បានបន្តឈានដល់ក្រសួងវប្បធម៌ និងវិចិត្រសិល្បៈ ដែលជាក្រសួងគោលដៅទី២២។ ដំណើរការប្រមូលទិន្នន័យនេះ បានប្រព្រឹត្តទៅយ៉ាងសស្រាក់សស្រាំ និងមានសណ្តាប់ធ្នាប់ខ្ពស់ ក្នុងរយៈពេល ២ថ្ងៃ គឺចាប់ពីថ្ងៃទី១៩ ដល់ទី២០ ខែសីហា ឆ្នាំ២០២៦។ នៅព្រឹកថ្ងៃទី២០ ខែសីហា ឆ្នាំ២០២៦ ដែលជាថ្ងៃទី២ នៃយុទ្ធនាការជំរឿននេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការជំរឿនមន្ត្រីជាក់ស្តែង បានអញ្ជើញចុះពិនិត្យដំណើរការការងារ និងការធ្វើជីវមាត្រនេះដោយផ្ទាល់។ ការអញ្ជើញចុះពិនិត្យនេះ ស្តែងឱ្យឃើញយ៉ាងច្បាស់ពីការយកចិត្តទុកដាក់ខ្ពស់របស់ថ្នាក់ដឹកនាំ លើគ្រប់ទិដ្ឋភាពនៃដំណើរការការងារ ទោះជាកិច្ចការនោះតូច ឬធំក្តី។ ឯកឧត្តមឧបនាយករដ្ឋមន្ត្រី មិនត្រឹមតែតាមដានវឌ្ឍនភាពការងារជារួមប៉ុណ្ណោះទេ ថែមទាំងបានចុះពិនិត្យផ្ទាល់ដល់ទីតាំងអនុវត្តការងារជាក់ស្តែង ដោយផ្តោតលើភាពម៉ត់ចត់នៃនីតិវិធីបច្ចេកទេសនីមួយៗយ៉ាងយកចិត្តទុកដាក់បំផុត។ ក្នុងឱកាសនោះ ឯកឧត្តមឧបនាយករដ្ឋមន្ត្រី បានវាយតម្លៃខ្ពស់ចំពោះការរៀបចំប្រកបដោយភាពម៉ឺងម៉ាត់ សណ្តាប់ធ្នាប់ល្អប្រសើរ និងកិច្ចសហការសម្របសម្រួលយ៉ាងរលូនរវាងស្ថាប័នទាំងពីរ។ ទន្ទឹមនឹងនេះ ឯកឧត្តមក៏បានឆ្លៀតឱកាសចុះសំណេះសំណាល សួរសុខទុក្ខ និងលើកទឹកចិត្តយ៉ាងកក់ក្តៅដល់ក្រុមការងារបច្ចេកទេសគ្រប់ជួរថ្នាក់ ដែលកំពុងបំពេញភារកិច្ចយ៉ាងសកម្ម ដើម្បីធានាឱ្យបាននូវទិន្នន័យមួយប្រកបដោយតម្លាភាព ភាពត្រឹមត្រូវ គណនេយ្យភាព និងសក្ដិសិទ្ធិភាព។ សូមបញ្ជាក់ថា ទោះបីជាដំណើរការយុទ្ធនាការជំរឿនមន្ត្រីជាក់ស្តែងកំពុងប្រព្រឹត្តទៅយ៉ាងមមាញឹកក្តី ប៉ុន្តែកិច្ចដំណើរការការងារប្រចាំថ្ងៃ និងការផ្តល់សេវាសាធារណៈផ្សេងៗរបស់ក្រសួងវប្បធម៌ និងវិចិត្រសិល្បៈ នៅតែបន្តប្រព្រឹត្តទៅជាប្រក្រតី ដោយពុំមានការរអាក់រអួល ឬរំខានឡើយ៕