柬埔寨公务员普查工作推进 10个部委已完成数据核实

[ការងារជំរឿនមន្រ្តី]​ ការធ្វើជំរឿនមន្រ្តី កំពុងឆ្ពោះទៅទីស្តីការគណៈរដ្ឋមន្ត្រី នារសៀលថ្ងៃទី១៩ ខែមិថុនា ឆ្នាំ២០២៦ គណៈកម្មការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែង បានរៀបចំកិច្ចប្រជុំមួយនៅ ទីស្តីការគណៈរដ្ឋមន្ត្រី ដើម្បីពិភាក្សាត្រៀមលក្ខណៈចុះធ្វើជំរឿន ដោយមានការអញ្ជើញចូលរួមពីថ្នាក់ដឹកនាំ និងមន្ត្រីជំនាញនៃស្ថាប័នទាំងពីរ។ កិច្ចប្រជុំមានការអញ្ជើញចូលរួមដោយ ឯកឧត្តម សុខ សង្វារ រដ្ឋលេខាធិការក្រសួងមុខងារសាធារណៈ និង ឯកឧត្តម សំ ប៊ុនណា រដ្ឋលេខាធិការទីស្តីការគណៈរដ្ឋមន្ត្រី។ ភាគីទាំងពីរបានផ្លាស់ប្តូរយោបល់ និងពិភាក្សាលម្អិត ដើម្បីធានាឱ្យការចុះធ្វើជំរឿនប្រព្រឹត្តទៅដោយរលូន ទាន់ពេលវេលា ប្រសិទ្ធភាព និងត្រឹមត្រូវខ្ពស់ ដោយផ្តោតលើ ការរៀបចំនីតិវិធី និងផែនការការងារ ការបែងចែកតួនាទី និងភារកិច្ចដល់ក្រុមការងារពាក់ព័ន្ធ ក៏ដូចជាការត្រៀមឯកសារ និងទិន្នន័យចាំបាច់នានា។ គួររម្លឹកដែរថា ការធ្វើជំរឿនមន្ត្រីមានគោលដៅធំៗចំនួន ៣ គឺ៖ ១) ក្រសួង-ស្ថាប័នចំណុះអង្គការនីតិប្រតិបត្តិ ២) អង្គភាពសុខាភិបាលមូលដ្ឋាន និង ៣) គ្រឹះស្ថានសិក្សាសាធារណៈ។ ដោយឡែក គិតមកដល់ពេលនេះ មាន ១០ ក្រសួង-ស្ថាប័ន ចំណុះអង្គការនីតិប្រតិបត្តិ ដែលបានបញ្ចប់ការធ្វើជំរឿនស្ថាពររួចរាល់ រួមមាន៖ ក្រសួងមុខងារសាធារណៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រសួងអភិវឌ្ឍន៍ជនបទ ក្រសួងកិច្ចការនារី ក្រសួងប្រៃសណីយ៍ និងទូរគមនាគន៍ ក្រសួងពាណិជ្ជកម្ម ក្រសួងការបរទេស និងសហប្រតិបត្តិការអន្តរជាតិ ក្រសួងអធិការកិច្ច រដ្ឋលេខាធិការដ្ឋានអាកាសចរណ៍ស៊ីវិល និងក្រុមប្រឹក្សាអភិវឌ្ឍន៍កម្ពុជា៕