实居省乌栋第五届研学野餐 七年级学生获餐食文具

នៅថ្ងៃអាទិត្យ ១៣រោច ខែអស្សុជ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី៨ ខែវិច្ឆិកា ឆ្នាំ២០២៦ ឯកឧត្តម លី ច័ន្ទតុលា ជាប្រធានក្រុមការងារចុះជួយសង្កាត់វាលពង់ និងលោកជំទាវ ឈីវ ភិរម្យ អនុប្រធានក្រុមការងារចុះជួយសង្កាត់វាលពង់ និងជាប្រធានគណៈកម្មការជំរុញការសិក្សាសិស្សនៃវិទ្យាល័យ អ៉ីជិយីគិ វាលពង់ បានដឹកនាំក្រុមការងារចុះជួយសង្កាត់វាលពង់ និងក្រុមបងគ្រូ រៀបចំកម្មវិធី “ពិចនិចសិក្សា” ជាលើកទី៥ ជាមួយសិស្សានុសិស្សថ្នាក់ទី៧ ក្នុងឆ្នាំសិក្សា២០២៦-២០២៧ នៃវិទ្យាល័យ អ៉ីជិយីគិ វាលពង់ ក្នុងសង្កាត់វាលពង់ ក្រុងឧដុង្គម៉ែជ័យ ខេត្តកំពង់ស្ពឺ។ គណៈកម្មការជំរុញការសិក្សាសិស្សមានគោលដៅជាក់លាក់មួយចូលរួមជាមួយវិទ្យាល័យ ក្នុងការជំរុញការសិក្សាសិស្ស ការគោរពវិន័យ និងលើកកំពស់ការសិក្សារបស់សិស្ស។ ជាពិសេសនោះការបង្កើតឱ្យមានកម្មវិធី “ពិចនិចសិក្សា” ដើម្បីផ្តល់ឱកាសដល់សិស្សគ្រប់កម្រិតថ្នាក់ទទួលបានការបណ្តុះបណ្តាលអំពីវីធីសាស្ត្ររៀនឱ្យបានពូកែ រៀនអំពីការធ្វើលំហាត់សមាធិផ្លូវចិត្ត និងរៀនអំពីការធ្វើលំហាត់ប្រាណយូហ្គាជួយដល់សុខភាពរបស់សិស្ស។ ឆ្លៀតក្នុងឱកាសនោះ លោកជំទាវ បានចែករំលែកគន្លឹះបង្វឹកខ្លួនឯងឱ្យរៀនពូកែ ចំនួន៦រួមមាន (១).គ្រប់នាទីត្រូវតែមានវិន័យ (២). គេងឱ្យបានគ្រប់គ្រាន់ (៣).រៀបចំផែនការប្រចាំថ្ងៃសម្រាប់ម៉ោងនីមួយៗឱ្យបានពិតប្រាកដ និងប្រកបដោយប្រសិទ្ធភាព (៤).ស្គាល់មុខវិជ្ជាដែលត្រូវរៀន ស្គាល់ពីពិន្ទុ ស្គាល់ពីគ្រូ (៥).មានរបៀបរៀនប្រចាំខ្លួន និង(៦).ព្យាយាមរៀនមេរៀនឱ្យបានមុនគ្រូបង្រៀន។ នៅចុងបញ្ចប់នៃកម្មវិធី ឯកឧត្តម លី ច័ន្ទតុលា និងលោកជំទាវ ឈីវ ភិរម្យ បានជូនវត្ថុអនុស្សាវរីយ៍ដល់លោកគ្រូ អ្នកគ្រូ សិស្សានុសិស្ស រួមមាន តុក្កតា ច្រាស់ដុសធ្មេញ ថ្នាំដុសធ្មេញ ព្រមទាំងបានរៀបចំអាហារពេលព្រឹក អាហារពេលថ្ងៃត្រង់ និងភេសជ្ជៈជូនសិស្សានុសិស្ស និងអ្នកចូលរួមទាំងអស់ផងដែរ។