实居省克诺萨山生态旅游项目一期完工 惠及118户家庭

សម្តេចធិបតី ហ៊ុន ម៉ាណែត ប្រកាសជោគជ័យគម្រោងលម្ហែបៃតងភ្នំខ្នងផ្សារ ដំណាក់កាលទី១ សម្តេចធិបតី ហ៊ុន ម៉ាណែត នាយករដ្ឋមន្ត្រី បានបង្ហោះសារលើទំព័រហ្វេសប៊ុក ប្រកាសថា គម្រោងលម្ហែបៃតង ភ្នំខ្នងផ្សារ ដំណាក់កាលទី១ ត្រូវបានស្ថាបនារួចរាល់ជាស្ថាពរ ដោយ ក្រសួងបរិស្ថាន។ គម្រោងនេះមានគោលបំណងសំខាន់ក្នុងការពង្រឹងសេវាកម្មរបស់សហគមន៍ឱ្យកាន់តែប្រសើរឡើង ជាពិសេសបង្កើនសមត្ថភាពឱ្យសហគមន៍អាចធ្វើជាម្ចាស់គ្រប់គ្រងសមិទ្ធផលដោយផ្ទាល់ ព្រមទាំងរៀបចំរចនាសម្ព័ន្ធការងារ និងការចែកចាយផលប្រយោជន៍សេដ្ឋកិច្ចបានមានប្រសិទ្ធភាពខ្ពស់ជាងមុន។ ជាមួយគ្នានេះ សហគមន៍ក៏មានឱកាសផ្សព្វផ្សាយផលិតផលក្នុងស្រុកទៅកាន់ភ្ញៀវទេសចរ តាមរយៈផ្សារសហគមន៍ដែលបានកសាងរួចរាល់ ដោយមានគោលដៅជំរុញផលិតកម្មក្នុងស្រុក និងលើកស្ទួយជីវភាពប្រជាពលរដ្ឋ។ សម្តេចធិបតីបានបញ្ជាក់ថា ប្រជាសហគមន៍ចំនួន ១១៨គ្រួសារ នឹងទទួលបានផលប្រយោជន៍ដោយផ្ទាល់ពីគម្រោងនេះ ហើយវាក៏ជាផ្នែកសំខាន់ក្នុងការលើកកម្ពស់មុខមាត់វិស័យទេសចរណ៍មូលដ្ឋាន ក្នុងខេត្តកំពង់ស្ពឺផងដែរ។