洪玛尼推动贡布省开发 提升区域吸引力与竞争力

ឯកឧត្តមឧបនាយករដ្ឋមន្ត្រី ហ៊ុន ម៉ានី ជំរុញឱ្យខេត្តកំពតបន្តអភិវឌ្ឍសមិទ្ធផលថ្មីៗ ដើម្បីបង្កើនភាពទាក់ទាញ និងការប្រកួតប្រជែង នៅក្នុងឱកាសអញ្ជើញជាអធិបតីដ៏ខ្ពង់ខ្ពស់ បើកយុទ្ធនាការចុះធ្វើជំរឿនមន្ត្រីជាក់ស្តែងនៅតាមរចនាសម្ព័ន្ធនៃអង្គភាពសុខាភិបាលមូលដ្ឋានភូមិភាគនិរតី នាព្រឹកថ្ងៃទី២១ ខែតុលា ឆ្នាំ២០២៦ នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការជំរឿន បានថ្លែងអន្តរាគមន៍បើកយុទ្ធនាការ ដោយបានផ្តល់នូវការណែនាំ និងដាក់ចេញនូវអនុសាសន៍គន្លឹះសំខាន់ៗ ទៅកាន់អង្គពិធីទាំងមូល។ ក្រៅពីមានប្រសាសន៍ផ្តោតទៅលើវិស័យរដ្ឋបាលសាធារណៈ ឯកឧត្តមឧបនាយករដ្ឋមន្ត្រី បានរំលេចដោយក្តីមោទនភាព និងការកោតសរសើរចំពោះកិច្ចខិតខំប្រឹងប្រែងរបស់រដ្ឋបាលខេត្តកំពត ក្រោមការដឹកនាំរបស់ឯកឧត្តមអភិបាលខេត្ត ម៉ៅ ធនិន ដែលសម្រេចបាននូវសមិទ្ធផលថ្មីៗជាច្រើន គួរឱ្យកត់សម្គាល់នាពេលកន្លងមក។ សមិទ្ធផលទាំងនេះ បាននិងកំពុងបង្ហាញរូបរាងឡើងយ៉ាងប្រណីត ព្រមទាំងដើរតួនាទីយ៉ាងសំខាន់ក្នុងការទាក់ទាញភ្ញៀវទេសចរជាតិ និងអន្តរជាតិឱ្យមកកាន់ខេត្តមួយនេះកាន់តែច្រើនឡើងពីមួយថ្ងៃទៅមួយថ្ងៃ។ ជាមួយគ្នានេះ ឯកឧត្តមឧបនាយករដ្ឋមន្ត្រី បានផ្តល់ការលើកទឹកចិត្តដល់ថ្នាក់ដឹកនាំ និងរដ្ឋបាលខេត្ត ឱ្យបន្តខិតខំថែរក្សា ព្រមទាំងបន្តគំនិតច្នៃប្រឌិត ក្នុងការអភិវឌ្ឍសមិទ្ធផលថ្មីៗបន្ថែមទៀត។ ឯកឧត្តមបានគូសបញ្ជាក់ថា ការបន្តអភិវឌ្ឍដោយមិនឈប់ឈរនេះ គឺដើម្បីបង្កើនភាពទាក់ទាញផង និងដើម្បីបង្កើនឧត្តមភាពនៃការប្រកួតប្រជែងលើគ្រប់វិស័យរបស់ខេត្តកំពត ជាមួយបណ្តាខេត្តដទៃទៀត និងប្រទេសជិតខាងឱ្យកាន់តែខ្លាំងក្លាថែមទៀតផងដែរ។