柏威夏省长会见移民总局代表团 强化边境管理合作

**អភិបាលខេត្តព្រះវិហារ ជួបប្រតិភូអគ្គនាយកដ្ឋានអន្តោប្រវេសន៍ ពង្រឹងកិច្ចសហប្រតិបត្តិការការងារ** ព្រះវិហារ៖ ឯកឧត្តម គីម រិទ្ធី អភិបាលខេត្តព្រះវិហារ បានទទួលជួបសម្តែងការគួរសម និងពិភាក្សាការងារជាមួយប្រតិភូអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ដឹកនាំដោយ ឯកឧត្តម ឧត្តមសេនីយ៍ទោ ផាន់ រតនៈ អគ្គនាយករងអគ្គនាយកដ្ឋានអន្តោប្រវេសន៍ ក្នុងឱកាសចុះបំពេញបេសកកម្មការងារនៅក្នុងភូមិសាស្ត្រខេត្តព្រះវិហារ។ ជំនួបនេះ បានធ្វើឡើងនៅសាលប្រជុំសាលាខេត្តព្រះវិហារ ដោយមានការពិភាក្សាអំពីការងារពាក់ព័ន្ធនឹងការគ្រប់គ្រងសន្តិសុខតាមព្រំដែន និងការងារអន្តោប្រវេសន៍ ព្រមទាំងការពង្រឹងកិច្ចសហប្រតិបត្តិការរវាងរដ្ឋបាលខេត្ត និងអគ្គនាយកដ្ឋានអន្តោប្រវេសន៍។ ក្នុងឱកាសនោះ ឯកឧត្តម គីម រិទ្ធី បានសម្តែងនូវការស្វាគមន៍យ៉ាងកក់ក្តៅចំពោះប្រតិភូ និងបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់អគ្គនាយកដ្ឋានអន្តោប្រវេសន៍ ក្នុងការបំពេញភារកិច្ចពាក់ព័ន្ធនឹងការគ្រប់គ្រងសន្តិសុខតាមព្រំដែន និងការងារអន្តោប្រវេសន៍កន្លងមក។ ទន្ទឹមនឹងនេះ ភាគីទាំងពីរ ក៏បានផ្លាស់ប្តូរយោបល់ និងពិភាក្សាលើការពង្រឹងកិច្ចសហប្រតិបត្តិការរវាងរដ្ឋបាលខេត្តព្រះវិហារ និងអគ្គនាយកដ្ឋានអន្តោប្រវេសន៍ ឱ្យកាន់តែមានប្រសិទ្ធភាព ដើម្បីរួមចំណែកដល់ការបំពេញភារកិច្ចការងារឱ្យបានល្អប្រសើរបន្ថែមទៀត។ ពិធីជួបសម្តែងការគួរសម និងពិភាក្សាការងារនេះ បានប្រព្រឹត្តទៅនៅថ្ងៃទី០៩ ខែកញ្ញា ឆ្នាំ២០២៦ នៅសាលាខេត្តព្រះវិហារ។