暹粒举行毗湿奴骑大鹏金翅鸟像开光仪式

សម្តេច ម៉ែន សំអន អញ្ជើញពុទ្ធាភិសេក «ព្រះវិស្ណុគង់លើស្ដេចគ្រុឌ» និងបួងសួងសុំសេចក្តីសុខ សន្តិភាព ជូនដល់កម្ពុជា សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នាព្រឹកថ្ងៃទី១៩ ខែឧសភា បានអញ្ជើញរៀបចំពិធីពុទ្ធាភិសេកព្រះបដិមា «ព្រះវិស្ណុគង់លើស្ដេចគ្រុឌ» នៅអតីតរង្វង់មូលព្រលានយន្តហោះអន្តរជាតិសៀមរាប។ ពិធីនេះ រៀបចំដើម្បីបួងសួងសុំសេចក្តីសុខ សន្តិភាព ជូនដល់ទឹកដី ព្រះមហាក្សត្រកម្ពុជា ព្រះវររាជមាតាជាតិខ្មែរ ថ្នាក់ដឹកនាំ និងប្រជាពលរដ្ឋខ្មែរទូទាំងប្រទេស។ កាលពីថ្ងៃទី៤ ខែឧសភា មន្ត្រីរាជការបានបួងសួងសុំយាង«ព្រះវិស្ណុគង់លើស្ដេចគ្រុឌ» ពីខេត្តឧត្ដរមានជ័យ មកទីតាំងដើមវិញ ក្រោយរូបសំណាកនេះត្រូវបានដកចេញ និងជំនួសដោយរូបសំណាកព្រះបាទជ័យវរ្ម័នទី៧ អំឡុងឆ្នាំ២០១០។ «ព្រះវិស្ណុគង់លើស្ដេចគ្រុឌ» មិនត្រឹមតែជារូបសំណាកសក្ការៈទេ តែជាដួងព្រលឹងវប្បធម៌ដ៏មានឥទ្ធិពល នាំមកនូវក្តីសុខសន្តិភាព និងភាពត្រជាក់ត្រជុំដល់ទឹកដី និងប្រជារាស្ត្រខ្មែរ តាំងពីសម័យមុនអង្គរ អង្គរ រហូតមកដល់បច្ចុប្បន្ន ដែលគេតែងសង្កេតឃើញមានរូបចម្លាក់នេះនៅលើហោជាង ផ្តែរ ឬតាមជ្រុងនៃប្រាសាទបុរាណនានា ដូចជានៅប្រាសាទអង្គរវត្ត ប្រាសាទបន្ទាយស្រី និងប្រាសាទព្រះខ័នជាដើម។