柬埔寨司法部与韩国代表会晤 强化跨国犯罪打击合作

ឯកឧត្តម កេង សុម៉ារិទ្ធ រដ្ឋលេខាធិការក្រសួងយុត្តិធម៌ បានជួបពិភាក្សាការងារជាមួយ ឯកឧត្តម LIM Sang-Woo តំណាងរដ្ឋាភិបាលសាធារណរដ្ឋកូរ៉េទទួលបន្ទុកកិច្ចគាំពារពលរដ្ឋក្រៅប្រទេស និងកិច្ចការកុងស៊ុល និងសហការី ================= ទីស្តីការក្រសួងយុត្តិធម៌៖ នារសៀលថ្ងៃព្រហស្បតិ៍ ៦រោច ខែពិសាខ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី៧ ខែឧសភា ឆ្នាំ២០២៦ តាមការចាត់តាំងរបស់ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌, ឯកឧត្តម កេង សុម៉ារិទ្ធ រដ្ឋលេខាធិការ ក្រសួងយុត្តិធម៌ និងសហការរីចំនួន ៥រូប បានជួបពិភាក្សាការងារជាមួយ ឯកឧត្តម LIM Sang-Woo តំណាងរដ្ឋាភិបាលសាធារណរដ្ឋកូរ៉េទទួលបន្ទុកកិច្ចគាំពារពលរដ្ឋក្រៅប្រទេស និងកិច្ចការកុងស៊ុល និងសហការីមកពីប្រទេសកូរ៉េសរុបចំនួន ៨រូប។ ជំនួបនេះបានពិភាក្សាអំពីវឌ្ឍនភាព និងលទ្ធផលនៃកិច្ចសហប្រតិបត្តិការទ្វេភាគីផ្នែកច្បាប់រវាងព្រះរាជាណាចក្រកម្ពុជា និងសាធារណរដ្ឋកូរ៉េ នាពេលកន្លងមក ជាពិសេស ការប្រយុទ្ធប្រឆាំងឧក្រិដ្ឋកម្មឆ្លងដែន និងពង្រឹងកិច្ចសហប្រតិបត្តិការផ្នែកច្បាប់ឱ្យកាន់តែមានប្រសិទ្ធភាព និងស៊ីជម្រៅបន្ថែមទៀត នាពេលអនាគត។ កិច្ចសហប្រតិបត្តិការនេះ គឺជាផ្នែកសំខាន់ក្នុងការសម្របសម្រួលផ្នែកច្បាប់ និងការអនុវត្តច្បាប់យ៉ាងជិតស្និទ្ធរវាងស្ថាប័នមានសមត្ថកិច្ចនៃប្រទេសទាំងពីរ សំដៅរួមចំណែកប្រយុទ្ធប្រឆាំងឧក្រិដ្ឋកម្មឆ្លងដែនដែលជាក្តីកង្វល់រួមទាំងក្នុងតំបន់ ទាំងនៅលើសាកលលោក។