法语科技论坛钻石岛开幕 洪玛奈与四国代表同台

**មហាអំណាចសេដ្ឋកិច្ច និងបច្ចេកវិទ្យាទាំងបួន ផ្គុំកម្លាំងគ្នានៅកោះពេជ្រ បើកសករាជនវានុវត្តន៍ «FrancoTech 2026» ក្រោមឆត្រហ្វ្រង់កូហ្វូនី** រាជធានីភ្នំពេញ បានប្រែក្លាយជាចំណុចប្រសព្វនៃចរន្តសេដ្ឋកិច្ច និងបច្ចេកវិទ្យាពិភពលោក នារសៀលថ្ងៃទី១៥ ខែវិច្ឆិកា ឆ្នាំ២០២៦ នេះ ខណៈដែលថ្នាក់ដឹកនាំកំពូលមកពីបណ្តាប្រទេសសំខាន់ៗចំនួនបួន បានបង្ហាញវត្តមានរួមគ្នាជាធ្លុងមួយ ដើម្បីប្រកាសបើកជាផ្លូវការនូវព្រឹត្តិការណ៍ **«ហ្រ្វង់កូតិច - FrancoTech ឆ្នាំ២០២៦»** នៅមជ្ឈមណ្ឌលសន្និបាត និងពិព័រណ៍កោះពេជ្រ។ វត្តមានជាអធិបតីភាពរួមគ្នារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តម អេម៉ានុយអែល ម៉ាក្រុង (Emmanuel Macron) ប្រធានាធិបតីសាធារណរដ្ឋបារាំង ឯកឧត្តម តូ ឡឹម (To Lam) ប្រធានរដ្ឋនៃសាធារណរដ្ឋសង្គមនិយមវៀតណាម និងឯកឧត្តម Mark Carney នាយករដ្ឋមន្ត្រីនៃប្រទេសកាណាដា មិនត្រឹមតែជាពិធីបើកព្រឹត្តិការណ៍ពិព័រណ៍ធម្មតាប៉ុណ្ណោះទេ ប៉ុន្តែវាគឺជាសារនយោបាយ និងសេដ្ឋកិច្ចដ៏មានឥទ្ធិពលមួយ ដែលបង្ហាញពីការប្តេជ្ញាចិត្តខ្ពស់ក្នុងការតភ្ជាប់បណ្តាញធុរកិច្ច និងបច្ចេកវិទ្យារវាងទ្វីបអាស៊ី អឺរ៉ុប និងអាមេរិកខាងជើង។ ក្នុងនាមជាព្រឹត្តិការណ៍អមដ៏មានសារៈសំខាន់នៃកិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជាទទួលធ្វើជាប្រធាន និងជាម្ចាស់ផ្ទះ «ហ្រ្វង់កូតិច - FrancoTech» បានឆ្លុះបញ្ចាំងឱ្យឃើញនូវរបត់ថ្មីនៃសហគមន៍និយាយភាសាបារាំង។ ពោលគឺ ហ្វ្រង់កូហ្វូនី លែងផ្តោតតែលើការផ្សារភ្ជាប់វប្បធម៌ និងភាសាដូចមុនទៀតហើយ ប៉ុន្តែកំពុងពង្រីកវិសាលភាពរបស់ខ្លួនយ៉ាងសកម្ម ទៅលើការជំរុញនវានុវត្តន៍ ឌីជីថល និងកិច្ចសហប្រតិបត្តិការសេដ្ឋកិច្ចប្រកបដោយចីរភាព ដោយមានរាជធានីភ្នំពេញជាស្ពានចម្លងដ៏សំខាន់៕ រូបថត ៖ AKP