实居省苏万基里寺举行慈善活动 450名老人获捐赠

ពិធីប្រគេនប័ណ្ណសរសើរដល់សមណសិស្ស សិស្សានុសិស្ស និងចែកទានជូនលោកតា លោកយាយ ៤៥០រូបនៅវត្តសុវណ្ណគិរី ខេត្តកំពង់ស្ពឺ ======= កំពង់ស្ពឺ៖ នៅថ្ងៃព្រហស្បតិ៍ ៤កើត ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៥ ខែតុលា ឆ្នាំ២០២៦ ឯកឧត្តម ឈួរ សុបញ្ញា សមាជិកក្រុមការងារចុះមូលដ្ឋានខេត្តកំពង់ស្ពឺ បានអញ្ជើញចូលរួមក្នុងកម្មវិធីប្រគេនប័ណ្ណសរសើរដល់សមណសិស្ស សិស្សានុសិស្ស និងចែកទានជូនលោកតា លោកយាយចំនួន ៤៥០រូប នៅវត្តសុវណ្ណគិរី ហៅភ្នំណកំប៉ូត ស្ថិតក្នុងក្រុងច្បារមន ខេត្តកំពង់ស្ពឺ ដោយមានការចូលរួមពីមហាឧបាសិកា សេង វឌ្ឍនា ព្រមទាំងព្រះសង្ឃ និងពុទ្ធបរិស័ទ។កម្មវិធីនេះក៏បានបង្ហាញពីស្មារតីចែករំលែក និងការយកចិត្តទុកដាក់ចំពោះសង្គម តាមរយៈការលើកទឹកចិត្តដល់សមណសិស្ស និងសិស្សានុសិស្សដែលខិតខំសិក្សារៀនសូត្រ ព្រមទាំងការផ្តល់ទានជូនលោកតា លោកយាយ ដែលជាការបង្ហាញពីការគោរពចាស់ទុំ និងការបន្តប្រពៃណីដ៏ល្អផូរផង់របស់ខ្មែរ។ ក្នុងឱកាសនោះ មហាឧបាសិកា សេង វឌ្ឍនា បានលើកឡើងពីសារៈសំខាន់នៃការចែករំលែកទាន និងការធ្វើបុណ្យតាមគន្លងព្រះពុទ្ធសាសនា ដោយសង្កត់ធ្ងន់ថា ការធ្វើបុណ្យមិនត្រឹមតែជាការបំពេញកុសលផ្ទាល់ខ្លួនប៉ុណ្ណោះទេ ប៉ុន្តែថែមទាំងជាការចែករំលែកក្តីស្រឡាញ់ សេចក្តីមេត្តា និងការយកចិត្តទុកដាក់ចំពោះអ្នកដទៃ ជាពិសេសចំពោះចាស់ព្រឹទ្ធាចារ្យដែលត្រូវការការគោរព និងការថែទាំពីកូនចៅក្នុងសង្គម។ ជាមួយគ្នានេះ ការផ្តល់ការលើកទឹកចិត្តដល់សមណសិស្ស និងសិស្សានុសិស្ស គឺជាការរួមចំណែកបណ្តុះធនធានមនុស្ស និងជំរុញឱ្យយុវជនបន្តខិតខំរៀនសូត្រ ដើម្បីក្លាយជាពលរដ្ឋល្អក្នុងសង្គម។ ក្នុងឱកាសនោះ ឯកឧត្តមបាននាំយកនូវការផ្តាំផ្ញើសួរសុខទុក្ខ និងក្តីនឹករលឹកពីសំណាក់ឯកឧត្តមឧបនាយករដ្ឋមន្ត្រី ហ៊ុន ម៉ានី ប្រធានក្រុមការងារចុះមូលដ្ឋានខេត្តកំពង់ស្ពឺ ជូនចំពោះព្រះសង្ឃ សមណសិស្ស សិស្សានុសិស្ស និងពុទ្ធបរិស័ទដែលបានចូលរួមក្នុងកម្មវិធីនេះ ព្រមទាំងបានបង្ហាញពីសារៈសំខាន់នៃការរួមចំណែកលើកកម្ពស់វិស័យព្រះពុទ្ធសាសនា និងការអប់រំសីលធម៌ក្នុងសង្គម។ ជាមួយគ្នានេះ បានលើកឡើងផងដែរពីការរួមគ្នាលើកកម្ពស់ពុទ្ធិកសិក្សាត្រូវបានចាត់ទុកថាជាកិច្ចការដ៏សំខាន់ក្នុងការថែរក្សា និងអភិវឌ្ឍព្រះពុទ្ធសាសនា ព្រោះពុទ្ធិកសិក្សាគឺជាឆ្អឹងខ្នងនៃព្រះពុទ្ធសាសនា ដែលមានតួនាទីក្នុងការបណ្តុះបណ្តាលសមណសិស្សឱ្យមានចំណេះដឹងផ្នែកព្រះធម៌ ព្រះវិន័យ និងភាសាបាលី ព្រមទាំងបន្តផ្សព្វផ្សាយព្រះពុទ្ធឱវាទទៅកាន់សង្គម។ ដូច្នេះ ការរួមគ្នាគាំទ្រពុទ្ធិកសិក្សា តាមរយៈការលើកកម្ពស់គុណភាពនៃការបង្រៀន និងរៀន ការគាំទ្រដល់សមណសិស្ស និងការចូលរួមពីព្រះសង្ឃ ពុទ្ធបរិស័ទ សប្បុរសជន និងស្ថាប័នពាក់ព័ន្ធ គឺជាមូលដ្ឋានដ៏សំខាន់សម្រាប់ការបន្តមរតកធម៌ដល់កូនចៅជំនាន់ក្រោយ។ តាមរយៈសកម្មភាពនេះ ការអប់រំតាមបែបព្រះពុទ្ធសាសនា និងការងារមនុស្សធម៌ត្រូវបានភ្ជាប់ជាមួយគ្នា ដើម្បីរួមចំណែកបណ្តុះសីលធម៌ គុណធម៌ ស្មារតីដឹងគុណ និងការជួយគ្នាទៅវិញទៅមកក្នុងសហគមន៍ ព្រមទាំងលើកកម្ពស់តួនាទីរបស់វត្តអារាមក្នុងការថែរក្សាព្រះពុទ្ធសាសនា វប្បធម៌ និងសុខដុមរមនាក្នុងសង្គមខ្មែរ។