副首相凯里特赴波萝勉省 为村芽项目六年级优等生颁奖

ឯកឧត្តមឧបនាយករដ្ឋមន្ត្រី កើត រិទ្ធ និងលោកជំទាវ យ៉េត ម៉ូលីន កើតរិទ្ធ អញ្ជើញជាអធិបតីក្នុងពិធីផ្តល់រង្វាន់ដល់សិស្សឆ្នើមថ្នាក់ទី៦ ជំនាន់ទី១ នៃគម្រោង «ពន្លកភូមិខ្ញុំ» ឃុំព្រៃស្រឡិត ==================== ឃុំព្រៃស្រឡិត៖ នាព្រឹកថ្ងៃអាទិត្យ ទី១ ខែវិច្ឆិកា ឆ្នាំ២០២៦ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងលោកជំទាវ យ៉េត ម៉ូលីន កើតរិទ្ធ បានអញ្ជើញជាអធិបតីក្នុងពិធីផ្តល់រង្វាន់ដល់សិស្សឆ្នើមថ្នាក់ទី៦ ជំនាន់ទី១ នៃគម្រោង «ពន្លកភូមិខ្ញុំ» ឃុំព្រៃស្រឡិត ដែលប្រារព្ធឡើងនៅឃុំព្រៃស្រឡិត ស្រុកពារាំង ខេត្តព្រៃវែង។ ពិធីនេះមានការអញ្ជើញចូលរួមពីថ្នាក់ដឹកនាំ ក្រុមការងារចុះមូលដ្ឋានឃុំព្រៃស្រឡិត អាជ្ញាធរមូលដ្ឋាន កងកម្លាំងប្រដាប់អាវុធ គណៈគ្រប់គ្រងសាលារៀន លោកគ្រូ អ្នកគ្រូ មាតាបិតា អាណាព្យាបាល សប្បុរសជន ព្រមទាំងសិស្សានុសិស្សជាច្រើនរូប។ គម្រោង «ពន្លកភូមិខ្ញុំ» ជាគំនិតផ្តួចផ្តើមរបស់ឯកឧត្តមឧបនាយករដ្ឋមន្ត្រី កើត រិទ្ធ។ គម្រោងនេះត្រូវបានប្រកាសដាក់ឱ្យអនុវត្តកាលពីថ្ងៃទី២០ ខែមិថុនា ឆ្នាំ២០២៦ ក្នុងគោលបំណងស្វែងរក លើកទឹកចិត្ត និងគាំទ្រដល់សិស្សដែលមានសមត្ថភាព និងឆន្ទៈខិតខំរៀនសូត្រ ជាពិសេសសិស្សដែលមានជីវភាពខ្វះខាត ដើម្បីកុំឱ្យបញ្ហាជីវភាពក្លាយជាឧបសគ្គរារាំងការបន្តការសិក្សា និងការកសាងអនាគតរបស់ពួកគេ។ ការផ្តួចផ្តើមគម្រោងនេះ ក៏ឆ្លុះបញ្ចាំងពីមនោសញ្ចេតនា និងការយកចិត្តទុកដាក់របស់ឯកឧត្តមឧបនាយករដ្ឋមន្ត្រី ចំពោះប្រជាពលរដ្ឋ និងកូនចៅក្នុងឃុំព្រៃស្រឡិត ដែលឯកឧត្តមធ្លាប់ទទួលខុសត្រូវជាប្រធានក្រុមការងារគណបក្សចុះមូលដ្ឋាននាពេលកន្លងមក។ សម្រាប់ការប្រឡងជ្រើសរើសសិស្សឆ្នើមជំនាន់ទី១ មានសិស្សថ្នាក់ទី៦ ចូលរួមប្រឡងសរុបចំនួន ៨២ នាក់ មកពីសាលាបឋមសិក្សាចំនួន ៨ ក្នុងឃុំព្រៃស្រឡិត។ ក្នុងចំណោមនោះ មានសិស្សចំនួន ៣០ នាក់ បានប្រឡងជាប់វិញ្ញាសាសរសេរ និងមានសិស្សចំនួន ២០ នាក់ ក្នុងនោះសិស្សស្រីចំនួន ១៧ នាក់ ទទួលបានជ័យលាភីចុងក្រោយ រួមមាន សិស្សសាលាបឋមសិក្សាក្រាំងចំនួន ៦ នាក់, សាលាបឋមសិក្សាជ្រៃចំនួន ៦ នាក់, សាលាបឋមសិក្សាស្វាយចំនួន ៥ នាក់ និងសាលាបឋមសិក្សាគោកធំចំនួន ៣ នាក់។ សិស្សជ័យលាភីទាំង ២០ រូប នឹងទទួលបានការគាំទ្ររយៈពេលវែង រួមមាន ប្រាក់ឧបត្ថម្ភប្រចាំខែចំនួន ២០០ ០០០ រៀល ចាប់ពីពេលចូលរៀនថ្នាក់ទី៧ រហូតដល់បញ្ចប់ថ្នាក់ទី១២, កង់ម្នាក់ ១ គ្រឿង, កាបូបសិក្សាម្នាក់ ១ និងការឧបត្ថម្ភឯកសណ្ឋានសិស្សចំនួន ២ ឈុត ព្រមទាំងសម្ភារសិក្សាចំនួន ១ ឈុតក្នុងមួយឆ្នាំ រហូតដល់បញ្ចប់ថ្នាក់ទី១២ ស្របតាមលក្ខខណ្ឌរបស់គម្រោង។ ដោយឡែក សិស្សចំនួន ១០ នាក់ទៀត ដែលបានប្រឡងជាប់វិញ្ញាសាសរសេរ ប៉ុន្តែមិនទទួលបានជ័យលាភីចុងក្រោយ ទទួលបានប្រាក់ឧបត្ថម្ភលើកទឹកចិត្តក្នុងម្នាក់ចំនួន ១០០ ០០០ រៀល។ មានមតិសំណេះសំណាលក្នុងឱកាសនោះ ឯកឧត្តមឧបនាយករដ្ឋមន្ត្រី បានអបអរសាទរចំពោះសិស្សជ័យលាភីទាំងអស់ និងបានបញ្ជាក់ថា ពិធីនេះមិនមែនគ្រាន់តែជាការផ្តល់រង្វាន់ដល់សិស្សឆ្នើមប៉ុណ្ណោះទេ ប៉ុន្តែជាការលើកតម្កើងតម្លៃនៃការអប់រំ ការលើកទឹកចិត្តដល់ការខិតខំប្រឹងប្រែងរបស់កុមារ និងការបង្ហាញពីការយកចិត្តទុកដាក់រួមរបស់សហគមន៍ចំពោះការកសាងធនធានមនុស្សចាប់ពីមូលដ្ឋាន។ ឯកឧត្តមឧបនាយករដ្ឋមន្ត្រី បានផ្តាំផ្ញើដល់ក្មួយៗសិស្សានុសិស្សឱ្យយកចិត្តទុកដាក់លើចំណុចសំខាន់ៗចំនួន ៣ គឺ៖ ទី១-ចាត់ទុកការសិក្សាជាគន្លឹះសម្រាប់ផ្លាស់ប្តូរអនាគត, ទី២-ត្រូវមានក្តីស្រមៃ មានគោលដៅ មានវិន័យ និងខិតខំព្យាយាមជាប្រចាំ និងទី៣-ត្រូវបណ្តុះសីលធម៌ គុណធម៌ ភាពស្មោះត្រង់ ការទទួលខុសត្រូវ ព្រមទាំងយកចិត្តទុកដាក់ថែរក្សាសុខភាព។ ឯកឧត្តមឧបនាយករដ្ឋមន្ត្រី បានគូសបញ្ជាក់ថា៖ «ចំណេះដឹងជួយឱ្យយើងមានសមត្ថភាព ប៉ុន្តែសីលធម៌ និងគុណធម៌ជួយឱ្យយើងក្លាយជាមនុស្សមានតម្លៃ»។ ទន្ទឹមនេះ ឯកឧត្តមឧបនាយករដ្ឋមន្ត្រី ក៏បានផ្តាំផ្ញើដល់មាតាបិតា និងអាណាព្យាបាល ឱ្យចាត់ទុកការអប់រំរបស់កូនចៅជាការវិនិយោគដ៏មានតម្លៃបំផុតសម្រាប់អនាគតគ្រួសារ ព្រមទាំងបន្តផ្តល់ឱកាស តាមដាន និងលើកទឹកចិត្តកូនឱ្យបានបន្តការសិក្សា។ ចំពោះលោកគ្រូ អ្នកគ្រូ ឯកឧត្តមឧបនាយករដ្ឋមន្ត្រី បានថ្លែងអំណរគុណចំពោះការលះបង់ និងការខិតខំបំពេញបេសកកម្មអប់រំ ព្រមទាំងស្នើឱ្យបន្តយកចិត្តទុកដាក់ចំពោះសិស្សគ្រប់រូប ដោយលើកទឹកចិត្តសិស្សពូកែ ជួយសិស្សរៀនខ្សោយ និងបង្កឱកាសដល់សិស្សដែលមានជីវភាពខ្វះខាត។ ជាមួយគ្នានេះ ឯកឧត្តមឧបនាយករដ្ឋមន្ត្រី បានសម្តែងការថ្លែងអំណរគុណចំពោះក្រុមការងារចុះមូលដ្ឋានឃុំព្រៃស្រឡិត សប្បុរសជន គណៈគ្រប់គ្រងសាលារៀន លោកគ្រូ អ្នកគ្រូ អាជ្ញាធរមូលដ្ឋាន កងកម្លាំងប្រដាប់អាវុធ មាតាបិតា និងអាណាព្យាបាល ដែលបានចូលរួមគាំទ្រ និងធ្វើឱ្យការអនុវត្តគម្រោងនេះទទួលបានលទ្ធផលជាក់ស្តែង។ ឯកឧត្តមឧបនាយករដ្ឋមន្ត្រី បានគូសបញ្ជាក់ថា គម្រោង «ពន្លកភូមិខ្ញុំ» មិនមែនជាគម្រោងផ្តល់រង្វាន់តែមួយលើកនោះទេ ប៉ុន្តែជាការវិនិយោគរយៈពេលវែងលើ ……. សម្រាប់ខ្លឹមសារលម្អិត សូមចុចលីងខាងក្រោម https://m.facebook.com/story.php?story_fbid=pfbid02Ew2ycuQs1jmK47wLGfHN9djsD6aSaZ7n8CR8FdmjjvuhdLXeXhxmcT4MfC3uJML5l&id=100064354554933