公务员管理总局在桔井大学举办公务员招录宣讲

ឈ្វេងយល់ពីវិធីសាស្ត្រ និងឱកាសក្នុងការក្លាយជាមន្ត្រី ខេត្តក្រចេះ៖ នៅក្នុងដំណើរការនៃវេទិកាផ្សព្វផ្សាយនៅសាកលវិទ្យាល័យក្រចេះ លោក ម៉េង ម៉ង់ទិត អគ្គនាយករងនៃអគ្គនាយកដ្ឋានគ្រប់គ្រងមុខងារសាធារណៈ បានអញ្ជើញធ្វើបទបង្ហាញគន្លឹះស្តីពី «ឱកាសក្លាយជាមន្ត្រី និងនីតិវិធីនៃការប្រឡងប្រជែងជ្រើសរើសមន្ត្រី» ដើម្បីតម្រង់ទិសដៅ និងពន្យល់លម្អិតអំពីមធ្យោបាយចម្បងទាំង ២របៀប ក្នុងការចូលបម្រើការងារក្នុងក្របខ័ណ្ឌមុខងារសាធារណៈ ជូនដល់យុវជន សិស្ស និងនិស្សិត។ ក្នុងនោះ របៀបទី១ គឺការចូលតាមរយៈការប្រឡងប្រជែង ដែលនៅក្នុងបរិបទនៃការកែទម្រង់ថ្មីនេះ យន្តការជ្រើសរើសត្រូវធ្វើឡើងជាចម្បង បែងចែកជាពីរបែប រួមមានការប្រឡងប្រជែងចូលជាមន្ត្រីរាជការស៊ីវិល ឬមន្ត្រីក្របខ័ណ្ឌ និងការប្រឡងប្រជែងចូលជាមន្ត្រីផ្អែកលើកិច្ចព្រមព្រៀងការងារ។ ដោយឡែកសម្រាប់របៀបទី២ គឺការចូលតាមគោលការណ៍ការសម្រេច និងការអនុញ្ញាតដ៏ខ្ពង់ខ្ពស់ ឬជាបុព្វសិទ្ធិផ្ទាល់របស់សម្តេចធិបតី នាយករដ្ឋមន្ត្រី នៃព្រះរាជាណាចក្រកម្ពុជា ទៅតាមតម្រូវការចាំបាច់ជាក់ស្តែងរបស់រដ្ឋបាលសាធារណៈ។ វាគ្មិនជាន់ខ្ពស់រូបនេះបានបញ្ជាក់ថា ទោះជាចូលតាមមធ្យោបាយណាក៏ដោយ រាល់ការវាយតម្លៃ និងការជ្រើសរើសក្នុងយុគសម័យកែទម្រង់រដ្ឋបាលសាធារណៈនេះ ត្រូវតែឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ ប្រព័ន្ធជ្រើសរើសមន្ត្រីទម្រង់ថ្មីនេះ ធានាដាច់ខាតនូវភាពស្អាតស្អំ គ្មានការបក្ខពួក គ្មានខ្សែបណ្តាញ ដើម្បីឱ្យបេក្ខជនគ្រប់រូបមានសិទ្ធិប្រកួតប្រជែងដោយស្មើភាព ផ្អែកលើសមត្ថភាពពិតប្រាកដ ស្របតាមអភិក្រម «ជាប់ដោយមោទនៈ ធ្លាក់ដោយអស់ចិត្ត» និង «មិនចាំបាច់ស្គាល់អ្នកធំ មិនចាំបាច់មានខ្សែ តែត្រូវមានសមត្ថភាពពិតប្រាកដ»។ តំណាងក្រសួងបានណែនាំ និងបំផុសស្មារតីដល់យុវជន សិស្ស និងនិស្សិតទាំងអស់ ឱ្យខិតខំកសាងសមត្ថភាព ចំណេះដឹង និងជំនាញពិតប្រាកដ ដើម្បីត្រៀមខ្លួនចាប់យកឱកាសការងារដ៏មានតម្លៃទាំងនេះ ក្នុងការចូលរួមបម្រើជាតិ និងប្រជាពលរដ្ឋទៅថ្ងៃអនាគត៕