洪玛尼慰问实居省困难群众 每户获赠慰问金及物资

នៅរសៀលថ្ងៃច័ន្ទ ៣រោច ខែពិសាខ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី៤ ខែឧសភា ឆ្នាំ២០២៦ ក្រុមការងារគណបក្សចុះមូលដ្ឋាន ឃុំដំណាក់រាំង បានចុះសួរសុខទុក្ខប្រជាពលរដ្ឋ រស់នៅភូមិទំនប់បាក់ ឃុំដំណាក់រាំង ស្រុកសាមគ្គីមុនីជ័យ ដែលកំពុងសម្រាកព្យាបាលនៅ មន្ទីរពេទ្យមិត្តភាពកម្ពុជា-ចិន ព្រះកុសុមៈចំនួន ៣គ្រួសារ រួមមាន៖ ១. ឈ្មោះ ឡុក ច័ន្ទថុន ភេទប្រុស មុខរបរ៖ អតីតកម្មកររោងចក្រកែឆ្នៃអាគុយ ដែលកំពុងមានជំងឺទឹកនោមផ្អែម និងសម្រាកព្យាបាលក្នុង ICU ២. ឈ្មោះ ផន ភា ភេទប្រុស មុខរបរ៖ កសិករ ដែលបានវះកាត់ដកដែកជើង (បន្ទាប់ពីគ្រោះថ្នាក់ចរាចរណ៍) ៣. ឈ្មោះ នីម វិន ភេទប្រុស មុខរបរ៖ បុគ្គលិករោងចក្រច្នៃអង្ករ ដែលបានជួបគ្រោះថ្នាក់ចរាចរណ៍ ជាមួយគ្នានេះ ក្រុមការងារបាននាំយកនូវសេចក្តីនឹករលឹក ការសួរសុខទុក្ខ និងការជូនពរពីសំណាក់ ឯកឧត្តមឧបនាយករដ្ឋមន្ត្រី ហ៊ុន ម៉ានី ប្រធានក្រុមការងារចុះមូលដ្ឋានខេត្តកំពង់ស្ពឺ ជូនដល់បងប្អូនប្រជាពលរដ្ឋទាំងអស់ ដោយបានជូនពរឱ្យឆាប់ជាសះស្បើយ មានសុខភាពល្អ និងវិលត្រឡប់ទៅរស់នៅជាមួយគ្រួសារវិញដោយសុវត្ថិភាព។ នេះមិនមែនជាលើកទីមួយទេ ដែលក្រុមការងារបានចុះសួរសុខទុក្ខ និងជួយឧបត្ថម្ភដល់ប្រជាពលរដ្ឋនៅមូលដ្ឋាន។ កន្លងមក ក្រុមការងារតែងតែអនុវត្តសកម្មភាពមនុស្សធម៌ និងសង្គមជាបន្តបន្ទាប់ ដោយមិនប្រកាន់ពេលវេលា ឬកាលៈទេសៈឡើយ គឺមានវត្តមានជានិច្ចនៅពេលប្រជាពលរដ្ឋជួបការលំបាក ដើម្បីចែករំលែកទុក្ខព្រួយ និងផ្តល់ការគាំទ្រយ៉ាងជិតស្និទ្ធ។ សកម្មភាពនេះគឺជាគោលការណ៍ និងប្រពៃណីដ៏ល្អរបស់គណបក្សប្រជាជនកម្ពុជា ដែលតែងតែនៅជាប់ជាមួយប្រជាជន មិនថាក្នុងស្ថានភាពណាក៏ដោយ ទាំងពេលមានសុខ និងពេលមានទុក្ខលំបាក និងជាគន្លងនយោបាយដ៏មានតម្លៃ ដែលផ្អែកលើមូលដ្ឋានមនុស្សធម៌ ការយកចិត្តទុកដាក់ និងទំនួលខុសត្រូវចំពោះប្រជាពលរដ្ឋ ដែលជាគ្រឹះសម្រាប់ការអភិវឌ្ឍសង្គមឲ្យមានស្ថិរភាព និងចីរភាព។ ក្នុងឱកាសនោះ ក្រុមការងារបាននាំយកនូវក្រមា និងថវិកាសួរសុខទុក្ខ ដោយក្នុងមួយគ្រួសារ ទទួលបានក្រមា ១ និងថវិកា ១០០,០០០ រៀល ដើម្បីជាការលើកទឹកចិត្ត និងជួយសម្រាលបន្ទុកក្នុងការព្យាបាល។