公务员部为赴欧留学奖学金生举行行前指导会

ការខិតខំប្រឹងប្រែងកសាងសមត្ថភាពចំណេះដឹងរបស់និស្សិតជ័យលាភីអាហារូបករណ៍ឱ្យកាន់តែខ្លាំងពូកែ នឹងនាំមកនូវមោទនភាពសម្រាប់ខ្លួនឯង គ្រួសារ និងប្រទេសជាតិ នារសៀលថ្ងៃទី ២៥ ខែសីហា ឆ្នាំ២០២៦ នៅគណៈកម្មាធិការកែទម្រង់រដ្ឋបាលសាធារណៈ ឯកឧត្តម សុខ សង្វារ រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានជួបសំណេះសំណាល ផ្តល់ជាអនុសាសន៍ណែនាំ និងតម្រង់ទិសដល់និស្សិតជ័យលាភីអាហារូបករណ៍ សម្រាប់ឆ្នាំ២០២៦ មុនពេលពួកគាត់ចេញដំណើរទៅបន្តការសិក្សានៅសហភាពអុឺរ៉ុប។ ក្នុងជំនួបនេះ ក្រុមនិស្សិតបានរាយការណ៍ និងធ្វើចំណាប់អារម្មណ៍ជូនប្រតិភូក្រសួងមុខងារសាធារណៈ។ ទន្ទឹមនោះ ឯកឧត្តមរដ្ឋលេខាធិការ ព្រមទាំងប្រតិភូនៃក្រសួងមុខងារសាធារណៈ ក៏បានចែករំលែកនូវបទពិសោធល្អៗ នៃការសិក្សានៅក្រៅប្រទេស ជាពិសេសជំរុញឱ្យនិស្សិតគ្រប់រូបផ្សព្វផ្សាយពីកម្ពុជា ប្រកបដោយមោទនភាព និងធ្វើឱ្យអន្តរជាតិស្គាល់ពីសក្តានុពលកម្ពុជា ក្នុងភាពជាអ្នកតំណាងប្រទេសជាតិ និងប្រជាជនខ្មែរ។ ទន្ទឹមនេះ ឯកឧត្តម សុខ សង្វារ បាននាំនូវប្រសាសន៍ផ្តាំផ្ញើសាកសួរសុខទុក្ខ និងពាក្យពេចន៍អបអរសាទរ របស់ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ជូនដល់និស្សិតទាំងអស់ ដែលទទួលបានឱកាសទៅសិក្សានៅក្រៅប្រទេស ដោយបានបញ្ជាក់ពីការយកចិត្តទុកដាក់ពីសុខទុក្ខនិស្សិតគ្រប់រូប ដោយតែងចាត់ទុកនិស្សិតគ្រប់រូប ជាធនធានដ៏មានសារៈសំខាន់របស់ប្រទេសជាតិ។ ក្នុងនាមជាតំណាងឯកឧត្តមឧបនាយករដ្ឋមន្រ្តី ឯកឧត្តមបានបង្ហាញពីតម្លៃនៃសុខសន្តិភាព និងបានបង្ហាញពីការវិវឌ្ឍនៃវិស័យមុខងារសាធារណៈ ក្រោមការដឹកនាំរបស់ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ក្នុងការអនុវត្តការងារស្នូលរបស់ក្រសួង គឺការប្រែក្លាយចក្ខុវិស័យសម្តេចធិបតីឱ្យក្លាយជាការពិតនិងការដឹកនាំកំណែទម្រង់ស្ថាប័នឱ្យបានជោគជ័យ ក៏ដូចជាការកសាងប្រព័ន្ធការងារច្បាស់លាស់ ជាពិសេសការអនុវត្តវិធានការគន្លឹះទាំង៣ ក្នុងការកែទម្រង់រដ្ឋបាលសាធារណៈ ដែលក្រសួងមុខងារសាធារណៈ ជាសេនាធិការរបស់រាជរដ្ឋាភិបាល ស្របតាមចក្ខុវិស័យវែងឆ្ងាយដឹកនាំដោយ សម្តេចធិបតី នាយករដ្ឋមន្ត្រី។ ជាទីបញ្ចប់ ឯកឧត្តមរដ្ឋលេខាធិការ បានជូនពរនិស្សិតគ្រប់រូប ទទួលបានជោគជ័យ ជួបតែសុខសុវត្ថិភាព ហើយត្រលប់មកវិញជាមួយកិត្តិយសសម្រាប់ខ្លួនឯង ក្រុមគ្រួសារ និងសង្គមជាតិ។ សូមជម្រាបថា ជំនួបនាពេលនេះមានក្រុមនិស្សិតសរុបចំនួន ៤រូប ដែលគ្រោងចេញដំណើរទៅសិក្សានៅបណ្តាប្រទេសនៃសហភាពអុឺរ៉ុប (ទៅសាធារណរដ្ឋបារាំង និងប្រទេសអេស្ប៉ាញ ១រូប ប្រទេសអាល្លឺម៉ង់ និងប្រទេសអុីតាលី ១រូប ប្រទេសបែលហ្សុិក ប្រទេសព័រទុយកាល់ និងចក្រភពអង់គ្លេស ១រូប និងទៅប្រទេសក្រូអាត និងប្រទេសលីទុយអានី ១រូប)៕