柬埔寨司法部与巴基斯坦大使会谈 强化两国公民法律保护

ឯកឧត្តមបណ្ឌិត ជិន ម៉ាលីន រដ្ឋមន្រ្តីស្តីទីនៃក្រសួងយុត្តិធម៌ បានអញ្ជើញជួបសំណេះសំណាលនិងពិភាក្សាការងារជាមួយឯកឧត្តម Zaheeruddin Babar Thaheem ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋឥស្លាមប៉ាគីស្ថានប្រចាំព្រះរាជាណាចក្រកម្ពុជា នៅទីស្តីការក្រសួងយុត្តិធម៌ ==================== នារសៀលថ្ងៃសុក្រ ៤រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣ ខែកក្កដា ឆ្នាំ២០២៦ ឯកឧត្តមបណ្ឌិត ជិន ម៉ាលីន រដ្ឋមន្រ្តីស្តីទីនៃក្រសួងយុត្តិធម៌ បានអញ្ជើញជួបសំណេះសំណាលនិងពិភាក្សាការងារជាមួយឯកឧត្តម Zaheeruddin Babar Thaheem ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋឥស្លាមប៉ាគីស្ថានប្រចាំព្រះរាជាណាចក្រកម្ពុជា នៅទីស្តីការក្រសួងយុត្តិធម៌។ ក្នុងកិច្ចជំនួបនេះ ក៏មានការអញ្ជើញចូលរួមដោយ ឯកឧត្តម ឃ្លោក ដារ៉ា ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការអន្តរជាតិ និងអភិវឌ្ឍន៍វិស័យយុត្តិធម៌ នៃក្រសួងយុត្តិធម៌ផងដែរ។ ជំនួបនេះ មានគោលបំណងពិភាក្សា និងផ្លាស់ប្តូរមតិយោបល់លើការជំរុញកិច្ចសហប្រតិបត្តិការផ្នែកច្បាប់ និងយុត្តិធម៌ ព្រមទាំងការយកចិត្តទុកដាក់ និងការគាំពារផ្នែកច្បាប់ទៅវិញទៅមក ដល់ប្រជាពលរដ្ឋនៃប្រទេសទាំងពីរ ដែលកំពុងស្នាក់នៅ និងប្រកបអាជីវកម្មស្របច្បាប់នៅក្នុងប្រទេសកម្ពុជា និងប៉ាគីស្ថាន។