柬埔寨卫生部与柬埔寨牙科种植协会共同举办2026年度会议，探

សន្និសីទប្រចាំឆ្នាំ២០២៦ ក្រោមប្រធានបទ «ការផ្សារភ្ជាប់វិទ្យាសាស្ត្រ បច្ចេកវិទ្យា និងភាពប្រសើរនៃការអនុវត្តគ្លីនិកក្នុងវិស័យដាំបង្គោលធ្មេញក្នុងឆ្អឹង» —— រាជធានីភ្នំពេញ៖ ថ្ងៃទី១៣ ខែសីហា ឆ្នាំ២០២៦ ឯកឧត្តមសាស្ត្រាចារ្យ ឡឹម តារា រដ្ឋលេខាធិការ ក្រសួងសុខាភិបាល បានអញ្ជើញជាអធិបតី ក្នុងសន្និសីទប្រចាំឆ្នាំ២០២៦ ក្រោមប្រធានបទ «ការផ្សារភ្ជាប់វិទ្យាសាស្ត្រ បច្ចេកវិទ្យា និងភាពប្រសើរនៃការអនុវត្តគ្លីនិកក្នុងវិស័យដាំបង្គោលធ្មេញក្នុងឆ្អឹង» ដែលរៀបចំដោយសមាគមដាំបង្គោលធ្មេញក្នុងឆ្អឹងកម្ពុជា (Dental Implant Society of Cambodia) និងមានការចូលរួមពីថ្នាក់ដឹកនាំសមាគម គណៈទន្តពេទ្យកម្ពុជា វាគ្មិនជាតិ-អន្តរជាតិ ទន្តបណ្ឌិត ទន្តពេទ្យ និងទន្តនិស្សិត។ ក្នុងពិធីនេះមានការរបាយការណ៍ ដោយលោកសាស្ត្រាចារ្យជំនួយ ផាន់ សាន់ដេត ប្រធានសមាគម លោក Loh ប្រធានក្រុមហ៊ុន Straumann Group និងសុន្ទរកថារបស់ លោកសាស្ត្រាចារ្យជំនួយ ប៉ូច សុភារត្ន័ ប្រធានគណៈទន្តពេទ្យកម្ពុជា។ ក្នុងសុន្ទរកថា ឯកឧត្តមសាស្ត្រាចារ្យ បានវាយតម្លៃខ្ពស់ ចំពោះការរៀបចំសន្និសីទ ដែលជាវេទិកាសម្រាប់លើកកម្ពស់ ការអភិវឌ្ឍវិជ្ជាជីវៈបន្ត (CPD) ការចែករំលែកចំណេះដឹង បទពិសោធន៍ បច្ចេកវិទ្យាថ្មីៗ និងការអនុវត្តផ្អែកលើភស្តុតាងវិទ្យាសាស្ត្រ ដើម្បីពង្រឹងគុណភាព និងសុវត្ថិភាពអ្នកជំងឺ។ ឯកឧត្តមសាស្ត្រាចារ្យ បានគូសបញ្ជាក់ថា សុខភាពមាត់ធ្មេញ ជាផ្នែកសំខាន់នៃសុខភាពទូទៅ និងជាផ្នែកមួយនៃការកសាងប្រព័ន្ធសុខាភិបាលប្រកបដោយគុណភាព សមធម៌ និងប្រសិទ្ធភាព ស្របតាមទិសដៅរបស់រាជរដ្ឋាភិបាលក្នុងការឈានទៅសម្រេចការគ្របដណ្តប់សុខភាពជាសកល (UHC)។ ជាមួយគ្នានេះ ក្រសួងសុខាភិបាលបានលើកទឹកចិត្តដល់សមាគម និងទន្តពេទ្យទាំងអស់ ឱ្យបន្តពង្រឹងការអភិវឌ្ឍវិជ្ជាជីវៈ និងការស្រាវជ្រាវ គោរពក្រមសីលធម៌ និងស្តង់ដារវិជ្ជាជីវៈ ប្រើប្រាស់បច្ចេកវិទ្យាថ្មីៗប្រកបដោយទំនួលខុសត្រូវ និងពង្រីកការអប់រំ-បង្ការសុខភាពមាត់ធ្មេញ ព្រមទាំងសកម្មភាពសង្គមសម្រាប់ប្រជាពលរដ្ឋក្រីក្រ និងងាយរងគ្រោះ។ ឯកឧត្តមសាស្ត្រាចារ្យ បានបង្ហាញក្តីសង្ឃឹមថា សមាគមដាំបង្គោលធ្មេញក្នុងឆ្អឹងកម្ពុជា នឹងបន្តក្លាយជាដៃគូសំខាន់របស់ក្រសួងសុខាភិបាល ក្នុងការលើកកម្ពស់គុណភាពសេវាទន្តសាស្ត្រ និងកាត់បន្ថយវិសមភាពក្នុងការទទួលបានសេវាសុខភាពមាត់ធ្មេញនៅកម្ពុជា។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)