商务部完成知识产权管理诊所项目 20名企业家获品牌保护培训

(ភ្នំពេញ)៖ នារសៀលថ្ងៃពុធ ទី២៩ ខែមេសា ឆ្នាំ២០២៦ ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានអញ្ជើញចូលរួមជាគណៈអធិបតីក្នុងពិធីបិទសិក្ខាសាលាស្តីពី “ការប្រើប្រាស់កម្មសិទ្ធិបញ្ញា ដើម្បីជំរុញកំណើនអាជីវកម្មនិងសាកលភាវូបនីយកម្មនៃគម្រោងគ្លីនិកគ្រប់គ្រងកម្មសិទ្ធិបញ្ញា” ដោយមានការអញ្ជើញចូលរួមពី លោកជំទាវអនុរដ្ឋលេខាធិការ  លោកស្រីអគ្គនាយករងសេវាពាណិជ្ជកម្ម លោកប្រធាននាយកដ្ឋានកម្មសិទ្ធិបញ្ញា លោក Pessach GUY ប្រធាននាយកដ្ឋានកម្មសិទ្ធិបញ្ញាសម្រាប់ធុរកិច្ច ផ្នែកប្រព័ន្ធអេកូឡូស៊ីនវានុវត្តន៍កម្មសិទ្ធិបញ្ញានៃអង្គការកម្មសិទ្ធិបញ្ញាពិភពលោក និងសហគ្រិន ជាច្រើនរូប។  ក្នុងឱកាសនោះ លោក Pessach GUY បានថ្លែងអំណរគុណចំពោះក្រសួងពាណិជ្ជកម្ម ដែលបានផ្តល់កិច្ចសហការយ៉ាងជិតស្និតក្នុងការអនុវត្តគម្រោងគ្លីនិកគ្រប់គ្រងកម្មសិទ្ធិបញ្ញា ដែលជាគម្រោងដំបូងសម្រាប់ប្រទេសកម្ពុជា និងបានគូសបញ្ជាក់ពីភាពរីកចម្រើននៃនវានុវត្តន៍និងប្រព័ន្ធអេកូឡូស៊ីកម្មសិទ្ធិបញ្ញា ព្រមទាំងបានអបអរសាទរចំពោះការប្រារព្ធទិវាកម្មសិទ្ធិបញ្ញាឆ្នាំ២០២៦ និងការសម្ពោធគម្រោងខាងលើ និងម៉ាកសម្គាល់ភូមិសាស្ត្រទំនិញកម្ពុជាចំនួន៤ ម៉ាកសមូហភាពចំនួន១​ ផងដែរ។ លោក Pessach GUY បន្តថា សហគ្រិនចំនួន ២០រូប ត្រូវបានបណ្តុះបណ្តាលពីមូលដ្ឋានគ្រឹះកម្មសិទ្ធិបញ្ញា ការរៀបចំគំរូអាជីវកម្ម និងយល់ពីតម្លៃកម្មសិទ្ធិបញ្ញា ដែលជាផែនទីបង្ហាញផ្លូវសម្រាប់គាត់យកទៅអនុវត្ត និងពង្រឹងគុណភាព ផលិតផល ព្រមទាំងអាចមានលទ្ធភាពនាំចេញទៅកាន់ទីផ្សារតំបន់ និងពិភពលោក។ ថ្លែងទៅកាន់អង្គពិធី ឯកឧត្តមរដ្ឋលេខាធិការ បានលើកឡើងពីសារៈសំខាន់នៃវិស័យកម្មសិទ្ធិបញ្ញាជារួម ដូចជា ម៉ាក ប្រកាសនីយបត្រតក្កកម្ម គំនូរឧស្សាហកម្ម ព្រមទាំងនីតិវិធីនៃកិច្ចការពារតាមរយៈការចុះបញ្ជីកម្មសិទ្ធិបញ្ញាជូនដល់សហគ្រិនទាំង ២០រូប និងបានគូបញ្ជាក់ពីយុទ្ធសាស្ត្របញ្ចកោណដំណាក់ទី១ របស់រាជរដ្ឋាភិបាល និងគោលនយោបាយជាតិកម្មសិទ្ធិបញ្ញាឆ្នាំ២០២៣-២០២៨ ដែលមានវិស័យអាទិភាពចំនួន៧ ដែលបានកំណត់នៅក្នុងគោលនយោបាយជាតិកម្មសិទ្ធិបញ្ញា រួមមាន៖ កសិកម្ម ពាណិជ្ជកម្មនិងឧស្សាហកម្ម វិទ្យាសាស្ត្រនិងបច្ចេកវិទ្យា សុខាភិបាល វប្បធម៌ ទេសចរណ៍ និងអប់រំនិងការលើកកម្ពស់ចំណេះដឹងសាធារណៈ ដែលវិស័យទាំងពីរនេះ ជាវិស័យសំខាន់សម្រាប់ជំរុញកំណើនសេដ្ឋកិច្ចនិងពាណិជ្ជកម្មជាតិផងដែរ។ ជាមួយគ្នានេះ ឯកឧត្តមរដ្ឋលេខាធិការ បានជំរុញឱ្យសហគ្រិនទាំង២០រូប ត្រូវយកចំណេះដឹង និងបទពិសោធន៍ដែលទទួលបានការបណ្តុះបណ្តាលពីសិក្ខាសាលានេះ ដើម្បីអភិវឌ្ឍន៍ផលិតផល និងកសាងទ្រព្យកម្មសិទ្ធិបញ្ញារបស់សហគ្រាសឬក្រុមហ៊ុន របស់ខ្លួននាពេលខាងមុខ៕ … ភ្ជាប់មកកាន់ក្រសួងពាណិជ្ជកម្ម តាមតំណភ្ជាប់ខាងក្រោម៖ Connect with Ministry Of Commerce: 🌐 [Facebook ](https://web.facebook.com/moc.gov.kh)🌐 [Telegram ](https://t.me/mocnewsfeed)🌐 [Website ](https://www.moc.gov.kh/)🌐 [YouTube ](https://www.youtube.com/@mocgovkhcambodia)🌐 [X (Twitter](https://twitter.com/MoCCambodia))