柬埔寨反毒品部门警告造谣者 严惩社交媒体虚假指控

មន្ទីរប្រឆាំងបទល្មើសគ្រឿងញៀន ព្រមានចាត់វិធានការច្បាប់លើម្ចាស់គណនី Facebook ឈ្មោះ «Ren Chanrith» រឿងផ្សាយព័ត៌មានមិនពិត ក្រុមការងារប្រតិកម្មរហ័សនៃមន្ទីរប្រឆាំងបទល្មើសគ្រឿងញៀន បានចេញសេចក្តីបំភ្លឺទាត់ចោលទាំងស្រុងនូវការផ្សព្វផ្សាយរបស់គណនីហ្វេសប៊ុកឈ្មោះ **"Ren Chanrith"** កាលពីថ្ងៃទី១៤ ខែកកក្ដា ឆ្នាំ២០២៦ ដែលបានទម្លាក់កំហុសខុសការពិតលើមន្ត្រីអនុវត្តច្បាប់ថា បានចាប់ប្រជាពលរដ្ឋស្លូតត្រង់ទៅជំរិតយកប្រាក់ («កៀបស៊ី») ជាថ្នូរនឹងការដោះលែង។ ក្រោយការចុះពិនិត្យ និងសាកសួរដេញដោលផ្ទាល់ជាមួយម្ចាស់គណនីនៅថ្ងៃទី១៦ ខែកក្កដា សមត្ថកិច្ចបានរកឃើញថា ការបង្ហោះនោះគឺពុំមានមូលដ្ឋានច្បាប់ ឬភស្តុតាងច្បាស់លាស់ទាល់តែសោះ។ មន្ទីរប្រឆាំងបទល្មើសគ្រឿងញៀនបានគូសបញ្ជាក់ថា ការផ្សព្វផ្សាយព័ត៌មានបំភ្លៃនេះ បានធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងទឹកចិត្តរបស់មន្ត្រីនគរបាលប្រឆាំងគ្រឿងញៀន ដែលបាននិងកំពុងខិតខំប្តូរផ្តាច់ លះបង់កម្លាំងកាយចិត្តទាំងយប់ទាំងថ្ងៃដើម្បីបង្ក្រាបបទល្មើស និងរក្សាសុខសុវត្ថិភាពជូនប្រជាពលរដ្ឋ។ ជាក់ស្តែង គ្រាន់តែក្នុងឆមាសទី១ ឆ្នាំ២០២៦ នេះ មន្ត្រីជំនាញសម្រេចបានស្នាដៃធំធេងដោយបង្ក្រាបបទល្មើសគ្រឿងញៀនបានចំនួន ៥,៧១៤ ករណី ឃាត់ខ្លួនជនសង្ស័យ ១៤,០៥៤ នាក់ និងរឹបអូសសារធាតុញៀនបានជាង ២ តោន ៤៨៥ គីឡូក្រាម។ ជាវិធានការបន្ត សមត្ថកិច្ចជំនាញបានដាក់ឱសានវាទតម្រូវឱ្យម្ចាស់គណនីហ្វេសប៊ុកខាងលើ ធ្វើការកែតម្រូវ ឬដកចេញនូវព័ត៌មានមិនពិតដែលខ្លួនបានផ្សព្វផ្សាយនោះជាបន្ទាន់។ ក្នុងករណីម្ចាស់គណនីនៅតែរឹងរូស មិនព្រមអនុវត្តតាមការណែនាំសេចក្តីបំភ្លឺនេះទេ មន្ទីរប្រឆាំងបទល្មើសគ្រឿងញៀននឹងចាត់វិធានការអនុវត្តទៅតាមផ្លូវច្បាប់ជាធរមានដោយគ្មានការលើកលែងឡើយ។ 🌐[Website](https://troryorng.com/) 📘[អានអត្ថបទពេញ](https://www.facebook.com/share/1MPoAJ3P8c/?mibextid=wwXIfr) 👉[JOIN US](http://t.me/troryorngmedia) —— Page [Troryorng News](https://www.facebook.com/TroryorngOfficial) Page [Troryorng TV](https://www.facebook.com/Yuvavey) Page [Troryorng សង្គម](https://www.facebook.com/troryorng.entertainment) Page [Troryorng Spots](https://www.facebook.com/troryorngsports) [www.troryorng.com](https://troryorng.com/)