磅通省19岁青年因家庭与情感纠纷试图轻生 获警方及时救助

បុរសវ័យ ១៩ឆ្នាំ ប៉ុនប៉ងលោតទឹកបញ្ចប់ជីវិត ដោយសារតូចចិត្តរឿងគ្រួសារ និងស្នេហា តែត្រូវសមត្ថកិច្ចអន្តរាគមន៍ទាន់ពេល... បុរសវ័យក្មេងម្នាក់ ត្រូវបានកម្លាំងសមត្ថកិច្ចអន្តរាគមន៍ជួយសង្គ្រោះទាន់ពេល បន្ទាប់ពីរូបគេមានបំណងលោតទឹកបញ្ចប់ជីវិត ដោយសារតូចចិត្តនឹងបញ្ហាគ្រួសារ និងស្នេហា។ ហេតុការណ៍នេះបានកើតឡើងនៅវេលាម៉ោង ១២ និង២៥នាទី ថ្ងៃទី២៥ ខែសីហា ឆ្នាំ២០២៦ យុវជនខាងលើមានឈ្មោះ យឿន លក្ខិណា ភេទប្រុស អាយុ ១៩ឆ្នាំ មានទីលំនៅភូមិកប់ភ្លុក ឃុំដំរីស្លាប់ ស្រុកកំពង់ស្វាយ ខេត្តកំពង់ធំ។ តាមការបញ្ជាក់ពីយុវជនរូបនេះ បានឱ្យដឹងថា រូបគេមានអារម្មណ៍តូចចិត្ត និងគិតថា គ្មានសមាជិកគ្រួសារណាស្រឡាញ់ខ្លួនឡើយ ហើយសូម្បីតែមនុស្សដែលខ្លួនស្រឡាញ់ក៏បានបោះបង់ចោលដែរ ទើបធ្វើឱ្យរូបគេសម្រេចចិត្តចង់បញ្ចប់ជីវិត។ មុនពេលធ្វើសកម្មភាព យុវជនរូបនេះក៏បានសរសេរលិខិតមួយទុកជាចុងក្រោយជូនម្តាយ ដោយមានខ្លឹមសារបង្ហាញពីការសុំទោស និងការលា។ ជាសំណាងល្អ មុនពេលកើតមានហេតុការណ៍ធ្ងន់ធ្ងរ កម្លាំងសមត្ថកិច្ចបានចុះអន្តរាគមន៍ទាន់ពេល និងជួយសង្គ្រោះយុវជនខាងលើបានដោយសុវត្ថិភាព។ ករណីនេះក៏ជាការរំលឹកដល់យុវជន និងប្រជាពលរដ្ឋគ្រប់រូបថា នៅពេលជួបបញ្ហាឬមានវិបត្តិផ្លូវចិត្ត គួររកមនុស្សដែលទុកចិត្តបានដើម្បីពិភាក្សា និងស្វែងរកជំនួយ ជាជាងសម្រេចចិត្តធ្វើអ្វីដែលអាចប៉ះពាល់ដល់ជីវិតខ្លួនឯង៕ (ពីខ្ញុំប៊ុនធឿនហៅខ្លាពីរ)