卫生部官员督导实居省基层医疗机构 强化公共卫生服务质量

ការចុះពិនិត្យវឌ្ឍនភាព និងពង្រឹងគុណភាព ការបម្រើសេវាសុខាភិបាល នៅតាមមណ្ឌលសុខភាព ក្នុងខេត្តកំពង់ស្ពឺ។ —— ខេត្តកំពង់ស្ពឺ៖ ថ្ងៃទី២៥ និងទី២៦ ខែកញ្ញា ឆ្នាំ២០២៦ ឯកឧត្តមវេជ្ជបណ្ឌិត ម៉ៅ តាន់អ៊ាង អនុរដ្ឋលេខាធិការក្រសួងសុខាភិបាល បានចុះពិនិត្យមើលវឌ្ឍនភាព និងពង្រឹងគុណភាព នៃការបម្រើសេវាសុខាភិបាល នៅមណ្ឌលសុខភាពចំនួន ០៤ ក្នុងខេត្តកំពង់ស្ពឺ។ បេសកកម្មនេះផ្តោតសំខាន់លើការជួយជំរុញការលើកកម្ពស់គុណភាព និងការបម្រើសេវាសុខាភិបាល នៅតាមមណ្ឌលសុខភាព និងក្នុងសហគមន៍ រាប់បញ្ចូលទាំងមណ្ឌលសុខភាព ដែលមានពិន្ទុស្តីពីគុណភាព នៅមានកម្រិតនៅឡើយ  ស្របតាមសេចក្តីណែនាំស្តីពី សំណុំសកម្មភាពអប្បបរមា សម្រាប់អភិវឌ្ឍន៍មណ្ឌលសុខភាព (MPA Guidelines) និងគោលការណ៍នៃការជំរុញបង្កើនការងារថែទាំសុខភាពបឋម របស់ក្រសួងសុខាភិបាល។ នាឱកាសនៃការចុះពិនិត្យមើលការងារ និងឯកឧត្តមអនុរដ្ឋលេខាធិការ ក៏បានផ្តល់ព័ត៌មាន និងអនុសាសន៍ត្រឡប់ជូនវិញផងដែរ ដែលក្នុងនោះរួមមានការបង្កើនការយកចិត្តទុកដាក់លើសេវាថែទាំសុខភាពជាអទិភាព ពិសេសសេវាជំងឺទូទៅ សេវាជំងឺមិនឆ្លង សេវាសុខភាពមាតា និងទារ ការចាក់ថ្នាំបង្ការ សេវាជំងឺឆ្លង និងការរក្សាអនាម័យល្អ ព្រមទាំងការយកចិត្តទុកដាក់លើគុណភាពសេវា ធ្វើឱ្យប្រជាជនមានទំនុកចិត្ត និងធានាឱ្យបាននូវការប្រចាំការសេវា ២៤ម៉ោង លើ២៤ម៉ោងឱ្យមាននិរន្តភាព ។ ឆ្លៀតឱកាសនោះដែរ ឯកឧត្តមអនុរដ្ឋលេខាធិការ ក៏បានថ្លែងការកោតសរសើរ ជូនដល់មន្ត្រី បុគ្គលិកមណ្ឌលសុខភាពទាំងអស់ ដែលយកចិត្តទុកដាក់ និងខិតខំបម្រើសេវាថែទាំសុខភាព ជូនប្រជាជននៅក្នុងតំបន់របស់ខ្លួនបានយ៉ាងល្អប្រសើរ។ សូមបញ្ជាក់ថា មណ្ឌលសុខភាពទាំង៤ នោះរួមមាន៖ មណ្ឌលសុខភាពត្រពាំងគង  មណ្ឌលសុខភាពត្រពាំងជោ មណ្ឌលសុខភាពអូរគគី និង មណ្ឌលសុខភាពជាស៊ីមឱរ៉ាល់។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)