国土部举办区域论坛 强调女性在农业中的重要作用

ក្រសួងរៀបចំដែនដី នគរូបនីយកម្ម និងសំណង់ បើកទ្វារស្វាគមន៍អង្គការសង្គមស៊ីវិល។ ឯកឧត្តម តឹករ៉េត សំរេច រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអញ្ជើញជាអធិបតីបើកវេទិកាថ្នាក់តំបន់ស្តីពី “ភាពសំខាន់របស់ស្ត្រីនៅក្នុងវិស័យកសិកម្ម៖ គុណតម្លៃដី កសិ-អេកូឡូស៊ី និងភាពធន់នឹងអាកាសធាតុនៅតំបន់អាស៊ី ”ដោយមានការចូលរួមពីថ្នាក់ដឹកនាំក្រសួង ស្ថាប័នពាក់ព័ន្ធ និងតំណាងអង្គការក្រៅរដ្ឋាភិបាល។ ក្នុងឱកាសបើកវេទិកានោះ ឯកឧត្តមរដ្ឋលេខាធិការប្រចាំការ បានគូសបញ្ជាក់ពីតម្លៃ និងតួនាទីដ៏សំខាន់របស់ស្ត្រីក្នុងសង្គមខ្មែរតាំងពីបុរាណកាលមកដល់បច្ចុប្បន្ននេះ ដោយឆ្លុះបញ្ចាំងតាមរយៈទស្សនទានមាតាធិបតេយ្យ និងវប្បធម៌ ប្រពៃណី ទំនៀមទម្លាប់ខ្មែរ។ ឯកឧត្តមបានសង្កត់ធ្ងន់ថា ការបន្តលើកកម្ពស់តម្លៃស្ត្រី មិនត្រឹមតែជាការថែរក្សាមរតកវប្បធម៌ប៉ុណ្ណោះទេ ប៉ុន្តែជាកត្តាសំខាន់ក្នុងការលើកកម្ពស់សមភាពយេនឌ័រ ការពង្រឹងសិទ្ធិអំណាច និងការបង្កើនឱកាសឱ្យស្ត្រីចូលរួមកាន់តែពេញលេញក្នុងការអភិវឌ្ឍសង្គមជាតិ។ ទន្ទឹមនឹងនេះ ឯកឧត្តមរដ្ឋលេខាធិការប្រចាំការ ក៏បានផ្តល់អនុសាសន៍មួយចំនួនសម្រាប់អង្គវេទិកាយកទៅពិភាក្សា និងបន្តធ្វើការរួមគ្នាដើម្បីជួយដល់ស្រ្តី ដោយគូសបញ្ជាក់ ៣ចំនុចសំខាន់រូមមាន៖ - គួរជំរុញ និងលើកទឹកចិត្តស្រ្តីតាមរយៈការរៀបចំគម្រោងខ្លីៗដើម្បីគាំទ្រដល់វិស័យកសិកម្ម - ស្ត្រីពិតជាមានសារៈសំខាន់ក្នុងវិស័យកសិកម្មប៉ុណ្ណោះទេ តែលើសេដ្ឋកិច្ចនិងសង្គមទាំងមូល។ ដូច្នេះ យើងគប្បីរៀបចំឱ្យមានការបណ្តុះបណ្តាលបច្ចេកទេស និងជំនាញបន្ថែមដល់ស្ត្រី ដើម្បីឱ្យស្រ្តីមានជម្រើសនិងឱកាសការងារដទៃផ្សេងទៀត ដែលនាំឱ្យស្ត្រីរួចផុតពីភាពលំបាកក្នុងការប្រកបរបរកសិកម្មតែមួយមុខដែលជារបរប្រើកម្លាំងច្រើន។ - ត្រូវរៀបចំគោលការណ៍ណែនាំ ឬគោលនយោបាយដើម្បីបន្តលើកតម្កើងឧត្តមភាព និងសក្តានុពលរបស់ស្ត្រីឱ្យកាន់តែប្រសើរឡើង។ ១៤ តុលា ២០២៦ #ក្រសួងរៀបចំដែនដីនគរូបនីយកម្មនិងសំណង់ #MLMUPC [**Join MLMUPC News**](https://t.me/MLMUPCofCambodia) 🌐 [**Website**](https://mlmupc.gov.kh/)[ ](https://mlmupc.gov.kh/) 🌐 [**Facebook**](https://www.facebook.com/mlmupc.pressteam) 🌐 [**Youtube**](https://www.youtube.com/@MLMUPC_KH) 🌐 [**Tiktok**](https://www.tiktok.com/@mlmupc_kh)