洪玛尼慰问实居省特邦县已故退休教师家属

ឯកឧត្តម ឈួរ សុបញ្ញានាំយកសាររំលែកមរណទុក្ខ និងបច្ច័យរបស់ឯកឧត្តមឧបនាយករដ្ឋមន្ត្រី ហ៊ុន ម៉ានី ជូនក្រុមគ្រួសារសពនិវត្តជន(អតីតគ្រូបង្រៀននៅសាលាបឋមសិក្សាពាម) ក្នុងស្រុកថ្ពង ========= ខេត្តកំពង់ស្ពឺ៖ នៅរសៀលថ្ងៃអង្គារ ៩កើត ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៣ ខែមិថុនា ឆ្នាំ២០២៦ ឯកឧត្តម ឈួរ សុបញ្ញា បានដឹកនាំក្រុមការងារផ្នែកនិវត្តជន និងអតីតយុទ្ធជននៃក្រុមការងារសិក្សាស្រាវជ្រាវ និងចិញ្ចឹមចលនាខេត្តកំពង់ស្ពឺ នាំយកសាររំលែកមរណទុក្ខ និងបច្ច័យរបស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ និងជាអនុប្រធានសមាគមអតីតយុទ្ធជន និងនិវត្តជន ជូនដល់ក្រុមគ្រួសារសព ឧបាសក ឯក វុន និវត្តជន និងជាអតីតគ្រូបង្រៀននៅសាលាបឋមសិក្សាពាម ស្រុកថ្ពង ដែលបានទទួលមរណភាពក្នុងជន្មាយុ ៧៧ ឆ្នាំ ដោយរោគាពាធ នៅគេហដ្ឋានសពស្ថិតក្នុងឃុំអមលាំង ស្រុកថ្ពង ខេត្តកំពង់ស្ពឺដោយមានការចូលរួមពីអាជ្ញាធរមូលដ្ឋាន តំណាងសមាគមអតីតយុទ្ធជន និងនិវត្តជន ព្រមទាំងសាច់ញាតិ និងប្រជាពលរដ្ឋជាច្រើនរូប ក្នុងបរិយាកាសប្រកបដោយសេចក្តីសោកស្តាយ និងអាឡោះអាល័យយ៉ាងជ្រាលជ្រៅ។ ក្នុងឱកាសដ៏សែនក្រៀមក្រំនោះ ឯកឧត្តមបានពាំនាំនូវសាររំលែកទុក្ខ និងការសោកស្តាយយ៉ាងជ្រាលជ្រៅពីសំណាក់ ឯកឧត្តម ហ៊ុន ម៉ានី ជូនចំពោះក្រុមគ្រួសារសពផងដែរ។ ឯកឧត្តមឧបនាយករដ្ឋមន្ត្រី តែងតែយកចិត្តទុកដាក់ជាប្រចាំចំពោះនិវត្តជន អតីតយុទ្ធជន និងក្រុមគ្រួសាររបស់ពួកគាត់ ដោយមិនត្រឹមតែជាការអនុវត្តគោលនយោបាយគាំពារសង្គមរបស់រាជរដ្ឋាភិបាលប៉ុណ្ណោះទេ ប៉ុន្តែថែមទាំងចងចាំជានិច្ចដោយសេចក្តីដឹងគុណ និងការគោរពចំពោះអ្នកដែលបានលះបង់កម្លាំងកាយចិត្ត និងបំពេញភារកិច្ចបម្រើជាតិមាតុភូមិក្នុងរយៈពេលកន្លងមកផងដែរ។ ឯកឧត្តមបានមានប្រសាសន៍ថា ការទទួលមរណភាពរបស់ឧបាសក ឯក វុន គឺជាការបាត់បង់សមាជិកគ្រួសារដ៏ជាទីគោរពស្រឡាញ់ និងជាការបាត់បង់អតីតមន្ត្រីអប់រំដ៏មានតម្លៃមួយរូប ដែលបានលះបង់ពេលវេលា កម្លាំងកាយចិត្ត និងបញ្ញា ក្នុងការបណ្តុះបណ្តាលធនធានមនុស្សជាច្រើនជំនាន់សម្រាប់សង្គម និងប្រទេសជាតិ។ ក្នុងនាមជាអតីតគ្រូបង្រៀន ឧបាសក ឯក វុន បានរួមចំណែកយ៉ាងសំខាន់ក្នុងបេសកកម្មអប់រំ ការផ្ទេរចំណេះដឹង និងការកសាងធនធានមនុស្សនៅមូលដ្ឋាន។ តាមរយៈការបង្រៀន និងការអប់រំសិស្សានុសិស្សជាច្រើនជំនាន់លោកបានជួយបណ្តុះបណ្តាលពលរដ្ឋដែលមានចំណេះដឹង សីលធម៌ និងសមត្ថភាព ដើម្បីចូលរួមអភិវឌ្ឍសង្គម និងប្រទេសជាតិ។ គុណបំណាច់របស់លោកក្នុងវិស័យអប់រំ នឹងបន្តស្ថិតនៅក្នុងការចងចាំរបស់សិស្សានុសិស្ស អ្នករួមការងារ និងប្រជាពលរដ្ឋក្នុងសហគមន៍ជានិច្ច។ ក្នុងឱកាសនោះផងដែរឯកឧត្តមក៍បានជម្រាបជូនក្រុមគ្រួសារសពអំពីគោលនយោបាយ និងរបបសន្តិសុខសង្គមរបស់រាជរដ្ឋាភិបាល សម្រាប់មន្ត្រីនិវត្តជនដែលទទួលមរណភាព ដោយគ្រួសារសពនឹងទទួលបានប្រាក់សោធនចុងក្រោយចំនួន ១២ ខែ នៃប្រាក់សោធនប្រចាំខែរបស់សព ជាជំនួយចុងក្រោយសម្រាប់ក្រុមគ្រួសារ តាមរយៈមូលនិធិជាតិជំនួយសង្គម ស្របតាមគោលនយោបាយគាំពារសង្គមរបស់រាជរដ្ឋាភិបាល។គោលនយោបាយទាំងនេះ គឺជាសក្ខីភាពបង្ហាញពីការយកចិត្តទុកដាក់របស់រាជរដ្ឋាភិបាល ចំពោះមន្ត្រីនិវត្តជន និងក្រុមគ្រួសារ ដែលបានរួមចំណែកបំពេញភារកិច្ចបម្រើប្រទេសជាតិកន្លងមក ហើយក៏ជាការធានាថា អ្នកដែលបានលះបង់ដើម្បីជាតិ តែងតែទទួលបានការយកចិត្តទុកដាក់ និងការដឹងគុណពីរាជរដ្ឋាភិបាលជានិច្ច។ ជាទីបញ្ចប់ឯកឧត្តមនិងក្រុមការងារបានបួងសួងឧទ្ទិសកុសលជូនដល់វិញ្ញាណក្ខន្ធឧបាសក ឯក វុន សូមបានទៅកាន់សុគតិភព កុំបីឃ្លៀងឃ្លាតឡើយ និងសូមជូនពរក្រុមគ្រួសារសពឱ្យមានកម្លាំងចិត្តមាំមួន អាចជម្នះនូវទុក្ខសោកនេះ និងបន្តដឹកនាំជីវិតប្រកបដោយសេចក្តីសុខ និងសុភមង្គលតទៅ។ 🙏🙏🙏