洪玛奈会见普京 双方重申柬俄为长期战略合作伙伴

🇰🇭🇷🇺សម្ដេច ហ៊ុន ម៉ាណែត ជួបពិភាក្សាការងារជាមួយប្រធានាធិបតីរុស្ស៊ី, ពូទីន ចាត់ទុក"កម្ពុជាជាមិត្ត និងជាដៃគូយូរអង្វែង" នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត  នាថ្ងៃទី១៨ ខែមិថុនា ឆ្នាំ២០២៦ បានជួបពិភាក្សាការងារជាមួយប្រធានធិបតីរុស្ស៊ី វ្លាឌីមៀ ពូទីន នៅក្រៅកិច្ចប្រជុំរំឮកខួបអនុស្សាវរីយ៍លើកទី៣៥ អាស៊ាន-រុស្ស៊ី នៃទំនាក់ទំនងជាដៃគូសន្ទនា។ ក្នុងជំនួបនោះ ប្រធានាធិបតី ពូទីន ថ្លែងប្រាប់នាយករដ្ឋមន្ត្រី សម្ដេច ហ៊ុន ម៉ាណែត ថា រុស្ស៊ីចាត់ទុកកម្ពុជាជាមិត្ត និងជាដៃគូយូរអង្វែង" និងរម្លឹកឡើងវិញពីកិច្ចខិតខំប្រឹងប្រែងរបស់សហភាពសូវៀត ក្នុងការជួយស្ដារសេដ្ឋកិច្ច សង្គម វិស័យអប់រំ វិស័យសុខាភិបាល ទូរគមនាគមន៍ កសិកម្ម ក្នុងពេលកម្ពុជាជួបវិបត្តិក្រោយរបបប៉ុលពត និងសង្គ្រាមស៊ីវិលរ៉ាំរ៉ៃ។ នេះបើតាមក្រសួងការបរទេសរុស្ស៊ី បញ្ជាក់ក្នុងសេចក្ដីប្រកាសព័ត៌មាន។ លោក ពូទីន ក៏បានគូសបញ្ជាក់ថា បច្ចុប្បន្ននេះ ទំនាក់ទំនងរុស្ស៊ី-កម្ពុជានៅតែបន្តអភិវឌ្ឍឥតឈប់ឈរ។ កាលពីឆ្នាំមុន ពាណិជ្ជកម្មទ្វេភាគីបានកើនឡើង ២% ប៉ុន្តែជាការពិតណាស់ កំណើននេះគឺជាតួលេខតិចតួច ហើយវាមិនឆ្លុះបញ្ចាំងពីសក្តានុពលដែលភាគីទាំងពីរមាននោះទេ ដូចនេះ រដ្ឋាភិបាលរុស្ស៊ីកំពុងធ្វើការដើម្បីពង្រឹងទំនាក់ទំនងពាណិជ្ជកម្ម និងវិនិយោគ។ ប្រធានាធិបតីរុស្ស៊ី គូសបញ្ជាក់ថា ៖"រុស្ស៊ីនឹងបន្តជួយកម្ពុជាក្នុងការបណ្តុះបណ្តាលធនធានមនុស្ស។ ពលរដ្ឋជាង ៨០០០នាក់នៃប្រទេសរបស់អ្នកបានទទួលការអប់រំកម្រិតឧត្តមសិក្សានៅប្រទេសរុស្ស៊ីរួចហើយ។ បច្ចុប្បន្ននេះ និស្សិតកម្ពុជាប្រហែល ១៦០នាក់កំពុងសិក្សានៅរុស្ស៊ី ហើយអាហារូបករណ៍ចំនួន ៦៣កន្លែងផ្សេងទៀត ត្រូវបានផ្ដល់ជូននិស្សិតកម្ពុជាសម្រាប់ឆ្នាំសិក្សាបច្ចុប្បន្ន។"។ ជាការឆ្លើយតប សម្ដេច ហ៊ុន ម៉ាណែត នាយករដ្ឋមន្ត្រីកម្ពុជា គូសបញ្ជាក់ទៅកាន់ប្រធានាធិបតីរុស្ស៊ីថា “រុស្ស៊ីនៅតែជាដៃគូដ៏សំខាន់ និងគួរឱ្យទុកចិត្តសម្រាប់ប្រទេសរបស់កម្ពុជា”។ ស្របពេលកម្ពុជា-រុស្ស៊ី កំពុងប្រារព្ធខួបលើកទី ៧០ នៃទំនាក់ទំនងការទូត សម្ដេច ហ៊ុន ម៉ាណែត គូសបញ្ជាក់ថា រយៈពេល៧ទសវត្សរ៍មកនេះ កម្ពុជាបានយកចិត្តទុកដាក់យ៉ាងខ្លាំងចំពោះមិត្តភាព និងកិច្ចសហប្រតិបត្តិការរយៈពេលវែងជាមួយរុស្ស៊ី។ កម្ពុជាចងចាំជានិច្ចចំពោះការគាំទ្រ និងជំនួយដែលសហភាពសូវៀតបានផ្តល់ជូនកម្ពុជាក្នុងអំឡុងពេលដ៏លំបាកបំផុតក្នុងប្រវត្តិសាស្ត្រ ក្រោយការដួលរលំនៃរបបប្រល័យពូជសាសន៍ ប៉ុលពត និងសង្គ្រាមស៊ីវិល។ កម្ពុជា សម្ដែងការដឹងគុណយ៉ាងជ្រាលជ្រៅចំពោះការចូលរួមចំណែករបស់រុស្ស៊ីក្នុងការអភិវឌ្ឍវិស័យសង្គម និងសេដ្ឋកិច្ចរបស់កម្ពុជា។ សម្ដេច ហ៊ុន ម៉ាណែត បញ្ជាក់ប្រាប់ប្រធានាធិបតីរុស្ស៊ី  ថា កម្ពុជាទន្ទឹងរង់ចាំការពិភាក្សាជាមួយរុស្ស៊ី ដើម្បីលើកកម្ពស់ភាពជាដៃគូរ ក្នុងទំនាក់ទំនងទ្វេរភាគីឱ្យដល់កម្រិតខ្ពស់ថ្មីមួយទៀត៕ ដោយ ង៉ិល ណារ៉ាត់