教育部推行教师调动改革 消除关系户实现透明化

**“**…**ពីមុនដើម្បីផ្លាស់ប្តូរកន្លែងធ្វើការបាន ទាល់តែមានខ្សែ ទើបមានឱកាស ឥឡូវយើងធ្វើដោយគុណាធិបតេយ្យ និងតម្លាភាព**…” នៅក្នុងដំណើរការរៀបចំការប្រឡងប្រជែងផ្ទេរនិងផ្លាស់ប្តូរកន្លែងធ្វើការរបស់លោកគ្រូ-អ្នកគ្រូ មកកាន់រាជធានីភ្នំពេញ ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា បានគូសបញ្ជាក់យ៉ាងច្បាស់ៗពីរបត់នៃការកែទម្រង់ដ៏ស៊ីជម្រៅ ដោយលុបបំបាត់វប្បធម៌ពឹងផ្អែកលើខ្សែខ្នង ហើយជំនួសមកវិញនូវប្រព័ន្ធប្រឡងប្រជែងដ៏ស្អាតស្អំមួយ។ នៅក្នុងឱកាសនោះ ឯកឧត្តមបណ្ឌិតសភាចារ្យ បានមានប្រសាសន៍ថា "ពីមុនចង់ផ្លាស់កន្លែងការងារបាន ទាល់តែមានខ្សែ ឥឡូវយើងចាប់ផ្តើមរៀបចំប្រព័ន្ធមួយដែលមានតម្លាភាព ដូចយើងប្រឡងប្រជែងជ្រើសរើសចឹង ដែលយើងប្រើពាក្យស្លោក គុណាធិបតេយ្យ តម្លាភាព ប្រសិទ្ធភាព បរិយាបន្ន ដូចគ្នាដែរ។ ឃើញទេប្រឡងថ្ងៃនេះ គ្មានអ្នកណាមកអន្តរាគមអីទេ។" ទន្ទឹមនឹងការកែទម្រង់ការផ្ទេរប្តូរកន្លែងធ្វើការ ឯកឧត្តមបណ្ឌិតសភាចារ្យ ក៏បានអំពាវនាវដល់លោកគ្រូ អ្នកគ្រូទាំងអស់ ត្រូវតែស្វែងយល់ និងក្តាប់ឱ្យបានច្បាស់លាស់អំពី «ស្តង់ដារសាលារៀនគំរូ» ចាប់តាំងពីកម្រិតមត្តេយ្យសិក្សា រហូតដល់មធ្យមសិក្សា។ ការយល់ដឹងពីស្ដង់ដានេះ គឺដើម្បីឱ្យលោកគ្រូ អ្នកគ្រូគ្រប់រូប អាចចូលរួមចំណែកយ៉ាងសកម្មក្នុងការអភិវឌ្ឍគ្រឹះស្ថានសិក្សារបស់ខ្លួន ឱ្យក្លាយទៅជាសាលារៀនគំរូ ស្របតាមគោលនយោបាយកែទម្រង់របស់រាជរដ្ឋាភិបាលកម្ពុជា។ សូមអញ្ជើញទស្សនា និងស្តាប់ប្រសាសន៍ទាំងស្រុងរបស់ ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា ដើម្បីស្វែងយល់បន្ថែមអំពីការផ្ទេរប្តូរកន្លែងធ្វើការ ការកំណត់ស្តង់ដារថ្នាក់រៀន និងយុទ្ធសាស្ត្រលើកកម្ពស់គុណភាពអប់រំនៅកម្ពុជា។