国家社会保障基金局视察蒙多基里省分局 强化社保合规检查

ឯកឧត្តម គឹម កែវរស្មី អញ្ជើញជួបសំណេះសំណាលជាមួយថ្នាក់ដឹកនាំ មន្ត្រី និងបុគ្គលិក នៅសាខា ប.ស.ស. ខេត្តមណ្ឌលគិរី ----------- ​(មណ្ឌលគិរី)៖ កាលពីថ្ងៃទី២៣ ខែឧសភា ឆ្នាំ២០២៦ ឯកឧត្តម គឹម កែវរស្មី អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជួបសំណេះសំណាលជាមួយថ្នាក់ដឹកនាំ មន្ត្រី និងបុគ្គលិក សាខា ប.ស.ស. ខេត្តមណ្ឌលគិរី ព្រមទាំងនាំយកពាក្យផ្ដាំផ្ញើសួរសុខទុក្ខរបស់ ឯកឧត្តមប្រតិភូរាជរដ្ឋាភិបាល និងជួយដោះស្រាយបញ្ហាប្រឈមមួយចំនួន ដែលសាខាជួបប្រទះក្នុងការអនុវត្តការងារប្រចាំថ្ងៃ។ ​ក្នុងឱកាសជួបសំណេះសំណាលនេះ ឯកឧត្តមអគ្គនាយករង បានជំរុញបន្ថែមដល់ថ្នាក់ដឹកនាំសាខាខេត្ត ក្នុងការពង្រឹងការងារចុះអធិការកិច្ចសន្តិសុខសង្គម និងដោះស្រាយរាល់ករណីល្មើសទាំងអស់ពាក់ព័ន្ធនឹងការចុះបញ្ជី ព្រមទាំងការបង់ភាគទានរបស់និយោជកតាមសហគ្រាស គ្រឹះស្ថាន នៅក្នុងមូលដ្ឋានរបស់ខ្លួន ដើម្បីធានាឱ្យបាននូវភាពរឹងមាំនៃប្រព័ន្ធសន្តិសុខសង្គម។ ជាពិសេស ត្រូវសហការជាមួយតំណាងសហគ្រាស គ្រឹះស្ថាន និងអង្គភាពពាក់ព័ន្ធ ដើម្បីផ្សព្វផ្សាយឱ្យបានយល់ដឹងកាន់តែច្បាស់អំពីបែបបទ និងនីតិវិធីថ្មីៗ ដែលជាវិធីសាស្ត្រដ៏ល្អមួយអាចជំរុញការងារឱ្យកាន់តែមានប្រសិទ្ធភាព។ ​ជាមួយគ្នានេះ ឯកឧត្តមអគ្គនាយករង ក៏បានផ្ដល់អនុសាសន៍ណែនាំដល់ថ្នាក់ដឹកនាំ មន្រ្ដី និងបុគ្គលិក ប.ស.ស. ទាំងអស់នៃសាខាខេត្ត ត្រូវរួមសហការគ្នាប្រកបដោយសាមគ្គីភាព និងបន្តខិតខំប្រឹងប្រែងផ្តល់សេវាជូនដល់សមាជិកឱ្យបានកាន់តែឆាប់រហ័ស ប្រកបដោយភាពទន់ភ្លន់ ស្មោះត្រង់ យុត្តិធម៌ និងវិជ្ជាជីវៈខ្ពស់។ ​ឆ្លៀតក្នុងឱកាសនោះដែរ ឯកឧត្តមអគ្គនាយករង ក៏បានអញ្ជើញចុះពិនិត្យការងារផ្ទាល់ ព្រមទាំងពិនិត្យមើលសម្ភារបរិក្ខារ និងឧបករណ៍អេឡិចត្រូនិកប្រើប្រាស់ប្រចាំថ្ងៃតាមជាន់នីមួយៗ នៅក្នុងអគារ ដើម្បីធានាថា សម្ភារបរិក្ខារទាំងអស់ស្ថិតក្នុងស្ថានភាពល្អ មានគុណភាព និងអាចប្រើប្រាស់បាន ក្នុងការគាំទ្រដល់ការអនុវត្តការងាររបស់មន្ត្រី និងបុគ្គលិកឱ្យដំណើរការទៅដោយរលូន ឆ្លើយតបទៅនឹងតម្រូវការការងារបច្ចុប្បន្ន៕