劳工部启动2026至2035年职业技能发展政策咨询会

មន្រ្តីជំនាញ និងស្ថាប័នពាក់ព័ន្ធ បានផ្តល់មតិយោបល់ ដើម្បីប្រមូលធាតុចូលលើសេចក្តីព្រាងគោលនយោបាយជាតិស្តីពីការអភិវឌ្ឍជំនាញបច្ចេកទេស និងវិជ្ជាជីវៈ ឆ្នាំ២០២៦-២០៣៥ (បាត់ដំបង)៖ ក្រសួងការងារនិងបណ្តុះបណ្តាលវិជ្ជាជីវៈ បានរៀបចំសិក្ខាសាលាប្រឹក្សាយោបល់ប្រមូលធាតុចូលលើសេចក្តីព្រាងគោលនយោបាយជាតិស្តីពីការអភិវឌ្ឍជំនាញបច្ចេកទេស និងវិជ្ជាជីវៈ ឆ្នាំ២០២៦-២០៣៥ នាថ្ងៃទី៦-៧ ខែកក្កដា ឆ្នាំ២០២៦ ក្រោមអធិបតីភាពឯកឧត្តមបណ្ឌិត ជួប ឋិតឋេរឫទ្ធិ អនុរដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ។ សិក្ខាសាលានេះមានការចូលរួមពីឯកឧត្តម លោកជំទាវ លោក លោកស្រី ជាទីប្រឹក្សាក្រសួង ថ្នាក់ដឹកនាំអគ្គនាយកដ្ឋាន និងនាយកដ្ឋាន អភិបាលរងនៃគណៈអភិបាលខេត្ត និងជាអនុប្រធានគណៈកម្មាធិការបណ្តុះបណ្តាលខេត្ត មន្ទីរការងារ និងបណ្តុះបណ្តាលវិជ្ជាជីវៈ គ្រឹះស្ថានបណ្តុះបណ្តាលបច្ចេកទេស និងវិជ្ជាជីវៈ (TVET) សមាជិក និងសមាជិកាគណៈកម្មាធិការបណ្តុះបណ្តាលខេត្តបាត់ដំបង តំណាងវិស័យឯកជនជាដៃគូរបស់គ្រឹះស្ថាន TVET ក្នុងខេត្ត ព្រមទាំងសិស្ស និស្សិត នៃវិទ្យាស្ថានពហុបច្ចេកទេសភូមិភាគតេជោសែនបាត់ដំបង សរុបចំនួន ១៣៥នាក់។ ថ្លែងក្នុងឱកាសនេះ ឯកឧត្តម​អនុរដ្ឋលេខាធិការ បានបញ្ជាក់ថា គោលនយោបាយជាតិនេះ នឹងក្លាយជាឯកសារយុទ្ធសាស្ត្រដ៏សំខាន់សម្រាប់ជំរុញការអភិវឌ្ឍជំនាញបច្ចេកទេស និងវិជ្ជាជីវៈ សំដៅរួមចំណែកជំរុញការធ្វើពិពិធកម្មសេដ្ឋកិច្ច លើកកម្ពស់ភាពប្រកួតប្រជែងជាតិ បង្កើតការងារសមរម្យ និងបង្កើនប្រាក់ចំណូលរបស់ប្រជាពលរដ្ឋ។ ទន្ទឹមនឹងនេះ គោលនយោបាយនេះក៏នឹងដើរតួនាទីយ៉ាងសំខាន់ក្នុងការគាំទ្រការអភិវឌ្ឍសង្គម-សេដ្ឋកិច្ចជាតិ ការសម្រេចបាននូវចក្ខុវិស័យកម្ពុជាឆ្នាំ២០៥០ ការអនុវត្តយុទ្ធសាស្ត្របញ្ចកោណ-ដំណាក់កាលទី១ គោលនយោបាយអភិវឌ្ឍន៍វិស័យឧស្សាហកម្មដំណាក់កាលបន្ទាប់ គោលនយោបាយជាតិស្តីពីមុខរបរ និងការងារដំណាក់កាលបន្ទាប់ ព្រមទាំងការត្រៀមចាកចេញពីឋានៈប្រទេសដែលមានការអភិវឌ្ឍតិចតួច (LDC) ប្រកបដោយជោគជ័យ។ ​អង្គសិក្ខាសាលាបានចូលរួមពិភាក្សា និងផ្តល់ធាតុចូលយ៉ាងផុសផុលលើសេចក្តីព្រាងគោលនយោបាយ ព្រមទាំងបានបង្ហាញការគាំទ្រយ៉ាងពេញទំហឹងចំពោះការរៀបចំគោលនយោបាយនេះ ដែលមានគោលដៅកសាងកម្លាំងពលកម្មឱ្យមានជំនាញ សម្បទាការងារ និងសម្បទាបត់បែន អាចឆ្លើយតបទៅនឹងការប្រែប្រួលនៃតម្រូវការទីផ្សារការងារ ប្រកបដោយភាពធន់ និងបរិយាបន្ន៕ #MLVT #HENGSour #TVET