法国总统将于11月访柬 参加第20届法语国家峰会

ដំណើរទស្សនកិច្ចរបស់ប្រធានាធិបតីបារាំងនាខែវិច្ឆិកាខាងមុខនេះគឺជាព្រឹត្តិការណ៍ប្រវត្តិសាស្ត្រដ៏ សំខាន់មួយបន្ទាប់ពីដំណើរទស្សនកិច្ចរបស់លោកសេនាប្រមុខហ្សាល ដឺហ្គោលមកប្រទេសកម្ពុជាកាលពី៦០ ឆ្នាំមុន។ នេះបើតាមលោកនីកូឡា ហ្វ័ររីស្យេ រដ្ឋមន្ត្រីប្រតិភូអមរដ្ឋមន្ត្រីក្រសួងអឺរ៉ុប និងការបរទេសបារាំងលើកឡើងនៅក្នុងសន្និសីទសារព័ត៌មាននៅរសៀលនេះនៅស្ថានទូតបារាំង ខណៈលោកបានមកបំពេញទស្សនកិច្ចរយៈពេល ២ ថ្ងៃនៅកម្ពុជា។ ប្រធានាធិបតីបារាំងនឹងចូលរួមក្នុងជំនួបកំពូលលើកទី ២០ នៃអង្គការហ្វ្រង់កូហ្វូនីដែលជាលើកទីមួយរៀបចំនៅតំបន់អាស៊ី បន្ទាប់ពីខកខានអស់រយៈពេល ៣០ ឆ្នាំ ខណៈដែលប្រទេសកម្ពុជានឹងទទួលរៀបចំជំនួបកំពូលដ៏សំខាន់នេះ។ នៅក្នុងសន្និសីទ រដ្ឋមន្ត្រីប្រតិភូអមរដ្ឋមន្ត្រីក្រសួងអឺរ៉ុបនិងការបរទេសបារាំង ក៏បានគូសរំលេចពីកិច្ចសហការក្នុងការពង្រឹងភាពជាដៃគូយុទ្ធសាស្ត្រ និងសេដ្ឋកិច្ច និងការជំរុញការវិនិយោគ រួមទាំងលើកឡើងពីកិច្ចសហការលើវិស័យការពារជាតិផងដែរ៕