柬埔寨皇家行政学院与广西行政学院签署合作备忘录

"ទស្សនកិច្ចផ្លូវការ និងពិធីចុះអនុស្សរណៈនៃការយោគយល់គ្នា (MOU) រវាងសាលាភូមិន្ទរដ្ឋបាល ជាមួយវិទ្យាស្ថានរដ្ឋបាលសាធារណៈក្វាងស៊ី" (នៅប្រទេសចិន)៖ ចាប់ពីថ្ងៃទី២៣ ដល់ថ្ងៃទី២៧ ខែឧសភា ឆ្នាំ២០២៦ គណៈប្រតិភូសាលាភូមិន្ទរដ្ឋបាល ក្រោមការដឹកនាំរបស់ ឯកឧត្តម យក់ ប៊ុនណា រដ្ឋលេខាធិការប្រចាំការ​ និងជានាយកសាលាភូមិន្ទរដ្ឋបាល បានអញ្ជើញទៅបំពេញទស្សនកិច្ចផ្លូវការ និងចូលរួមពិធីចុះអនុស្សរណៈនៃការយោគយល់គ្នា នៅទីក្រុងណាននីង តំបន់ស្វយ័តក្វាងស៊ី សាធារណរដ្ឋប្រជាមានិតចិន។ ពិធីចុះអនុស្សរណៈនៃការយោគយល់គ្នា ត្រូវបានរៀបចំឡើងនៅថ្ងៃទី២៤ ខែឧសភា ឆ្នាំ២០២៦ ដោយមានការចុះហត្ថលេខាដោយ ឯកឧត្តម សូលី វណ្ណប៉ុក នាយករងសាលាភូមិន្ទរដ្ឋបាល និងលោកស្រី Cui Xiaolin នាយិការងវិទ្យាស្ថានរដ្ឋបាលសាធារណៈក្វាងស៊ី ក្រោមសហអធិបតីភាពរបស់ឯកឧត្តម យក់ ប៊ុនណា នាយកសាលាភូមិន្ទរដ្ឋបាល និ លោក Niu Xianfeng នាយករងវិទ្យាស្ថានរដ្ឋបាលសាធារណៈក្វាងស៊ី។ ការចុះអនុស្សរណៈនេះ មានគោលបំណងអភិវឌ្ឍសមត្ថភាព និងពង្រឹងកិច្ចសហប្រតិបត្តិការក្នុងពង្រឹងវិស័យមុខងារសាធារណៈ តាមរយៈការបណ្តុះបណ្តាលមន្រ្តីរាជការ ផ្លាស់ប្តូរ គ្រូឧទ្ទេស សិស្សមន្ត្រី កម្មសិក្សាការី ការសិក្សាស្រាវជ្រាវ និងការចែករំលែកចំណេះដឹង បទពិសោធ និងព័ត៌មាន ស្របតាមភាពជាដៃគូយុទ្ធសាស្ត្រ និងកិច្ចសហប្រតិបត្តិការគ្រប់ជ្រុងជ្រោយរវាងប្រទេសកម្ពុជា និងប្រទេសចិនផងដែរ។ ក្នុងឱកាសដ៏វិសេសវិសាលនោះ គណៈប្រតិភូសាលាភូមិន្ទរដ្ឋបាល បានចូលជួបសម្តែងការគួរសមជាមួយ ឯកឧត្តម Wang Xinfu សមាជិកអចិន្ត្រៃយ៍ ទទួលបន្ទុកជាប្រធានគណៈចាត់តាំងនៃគណៈកម្មាធិការបក្សកុម្មុយនីស្តចិនប្រចាំតំបន់ស្វយ័តក្វាងស៊ី និងជានាយកវិទ្យាស្ថានរដ្ឋបាលសាធារណៈក្វាងស៊ី។ បន្ថែមពីនេះ គណៈប្រតិភូសាលាភូមិន្ទរ្ឋបាល ក៏បានជួបពិភាក្សាការងារមួយលោកស្រី Wang Xinhong អគ្គនាយិការរងមន្ទីរទទួលបន្ទុកតំបន់ពាណិជ្ជកម្មសេរីក្វាងស៊ី ព្រមទាំងបានអញ្ជើញទៅទស្សនកិច្ចសិក្សានៅតំបន់អភិវឌ្ឍន៍សំខាន់ៗដូចជា៖ មជ្ឈមណ្ឌលបញ្ញាសិប្បនិម្មិត (AI) ស្ថានីយព័ត៌មានវិទ្យាអាស៊ាន-ចិន តំបន់ឧស្សាហកម្មសេដ្ឋកិច្ច និងមជ្ឈមណ្ឌលនវានុវត្តន៍កំពង់ផែវៃឆ្លាតផងដែរ។ នៅក្នុងដំណើរទស្សនកិច្ចផ្លូវការនោះ លោក តាំង សុខងន អគ្គកុងស៊ុលនៃព្រះរាជាណាចក្រកម្ពុជាប្រចាំទីក្រុងណាននីង ក៏បានចូលរួមអមដំណើរគណៈប្រតិភូសាលាភូមិន្ទរដ្ឋបាលផងដែរ។